काठमाडौं– प्रधानमन्त्री पुष्पकमल दाहाल ‘प्रचण्ड’ले आफ्नो नेतृत्वको सरकार एक वर्ष पूरा भएको अवसरमा सम्बोधन गर्दै कृषिमा राज्यको लगानी नघटेको तर उत्पादकत्व बढ्न नसकेको बताए।
उनले आफूले नेतृत्व लिएको एक वर्ष पुरा हुँदा किसानहरुलाई ४ लाख १ हजार मेटिक टन मल समयमै सुनिश्चित भएको दाबी गरे। यस्तै सतह र भूमिगत सिँचाइ आयोजनाहरुबाट थप २१ हजार १६९ हेक्टर क्षेत्रमा सिँचाइ सुविधा पुर्याइएको बताए।
सो अवधिमा २९६ डीप ट्युबेल र ३ हजार २४४ स्यालो ट्युबेल सिँचाइ प्रणालीको निर्माण भएको उनको भनाइ छ।
प्रचण्डको नेतृत्व एक वर्ष पूरा हुँदासम्म रासायनिक मल आयातबाहेक कृषि क्षेत्रमा खासै उपलब्धि भएको देखिएन। तर आगामी दिनमा उनले कृषि क्षेत्रको सुधार गर्न कृषिमा लगानी बढाउने घोषणा गरे।
‘कृषिमा अब परम्परागत ढंगले सोचेर पुग्ने अवस्था छैन। खाद्यान्न प्रणली तथा कृषि क्षेत्रको रुपान्तरणको लागि कृषि क्षेत्रमा सरकारी, निजी विकास साझेदार र सहकारी क्षेत्रको लगानी बढाउन कृषि क्षेत्रमा लगानी दशक (२०८१/२०९१) नै घोषणा गरी अगाडि बढ्ने सरकारको तयारी छ,’ उनले भने।
प्रचण्डले आगामी दिन कृषि क्षेत्रमा सुधारका लागि घोषणा गरेका ७ बुँदामा
१. खाद्यान्न प्रणली तथा कृषि क्षेत्रको रुपान्तरणको लागि कृषि क्षेत्रमा सरकारी, निजी विकास साझेदार र सहकारी क्षेत्रको लगानी बढाउन कृषि क्षेत्रमा लगानी दशक (२०८१/२०९१) नै घोषणा गरी अगाडि बढ्ने,
२.हुलियत दरमा कृषि ऋण वास्तविक किसानसम्म पुर्याउने,
३. कृषि क्षेत्रमा उपलब्ध गराइएका अनुदानहरुलाई यसै आर्थिक वर्षभित्र एकीकृत गरी आगामी वर्षदेखि किसानको सूचीकरणका आधारमा अनुदान तथा मल वितरण गर्न सुरु गरिने,
४. प्रमुख खाद्यान्न दूध तथा तरकारीमा उत्पादनमा आधारित अनुदान प्रणाली लागू गरिने दूध किसानहरुको बाँकी बक्यौता चैतभित्र भुक्तानी गर्ने,
५.आगामी असार मसान्तसम्म ३० वटा प्रयोगशालासहितको एकीकृत कृषि तथा पशुसेवा केन्द्रको निर्माण सम्पन्न गर्ने,
६. कृषि उपजको बढ्दो आयात जलवायु परिवर्तन लगायतका कारणले कृषिमा परेका चाप कम गर्न र प्रमुख कृषि उपजमा आत्मनिर्भरता हासिल गर्न ठूला सिँचाइ आयोजनाको कमाण्ड क्षेत्रमा मल बीउको सुनिश्चितता एवं संरचनागत सुधारसहित १७ हजार हेक्टरमा चैते धान खेती प्रबर्द्धन गर्ने,
७.कृषि उत्पादनको प्रमुख आधार सिँचाइको विस्तार गर्न समग्र तराई क्षेत्र सिँचित हुने गरी नहार प्रणाली विकास गर्ने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
