काठमाडौं- नेपालमा पहिलोपटक बुधबारदेखि द्रुत बस सेवा सञ्चालन हुने भएको छ। संविधान दिवसको अवसर पारेर भक्तपुरको सूर्यविनायकदेखि काठमाडौंको रत्नपार्कसम्म द्रुत बस सेवा सञ्चालन गर्न लागिएको हो।
काठमाडौं र भक्तपुरका विभिन्न क्षेत्रमा द्रुत बस सेवाका लागि ‘डेडिकेटेड लेन’ बनाइएको छ।
द्रुत सेवाका लागि २५ वटा बस सञ्चालनमा ल्याउने योजना सरकारको छ। यद्यपि, उद्घाटन २ वटा बसबाट हुनेछ। बुधबार रत्नपार्कमा यातायातमन्त्री प्रकाश ज्वालाले बिहान ९ बजे उक्त सेवा उद्घाटन गर्ने कार्यक्रम रहेको छ।
1695118814.jpg)
उक्त सेवाका लागि ट्राफिक प्रहरीहरु परिचालन गरेर लेन खाली गरिने छ। उक्त लेनमा अन्य गाडी रोक्नु हुँदैन, द्रुत सेवाका लागि बाटो छाड्न पर्छ भन्ने संकेत पनि दिइ यातायात व्यवस्था विभागले जनाएको छ।
विभागका महानिर्देशक उद्धपप्रसाद रिजालले रत्नपार्कदेखि सूर्यविनायकसम्म ४५ मिनेटमै पुग्नेगरी उक्त सेवा सुरु गर्न लागिएको जानकारी दिए। सेवा सुरु भएपछि अहिले डेढ घण्टादेखि २ घण्टा समय लाग्ने उक्त बाटो आधामा छोट्टिने उनको भनाइ छ।
यस्तो सेवा बिहान ९-११ र साँझ ४ बजेदेखि ६ बजेसम्म कार्यालय समयमा ४ घण्टा सञ्चालन हुनेछ। यस अवधिमा ट्राफिक प्रहरीले बसको ओहोरदोहोरमा व्यवस्थापन गर्न उक्त लेनमा अन्य सवारी चल्न दिनेछैन। यस अवधिमा उक्त लेनमा अन्य सवारीसाधन चल्न पाउनेछैनन्। द्रूत सेवा दिने बसलाई ट्राफिक प्रहरीले एम्बुलेन्स जस्तै सुविधा दिनेछ। ट्राफिक प्रहरीले यस्ता बसलाई एम्बुलेन्सलाई जसरी नै लाइट पास गराउने छ।
1695118969.jpg)
सूर्यविनायकदेखि रत्नपार्कसम्मको उक्त १३.४ किलोमिटर सडकमा जाँदा-आउँद लेन रहने विभागका महानिर्देशक रिजालले बताए।
द्रुत मार्ग सञ्चालनका लागि मंगलबार साँझसम्म पनि डेडिकेटेड लाइन तयार गर्नेगरी ‘रेड मार्क’ लगाउने काम भइरहेको काठमाडौं उपत्यका ट्राफिक प्रहरी कार्यालयले जनाएको छ।
कार्यालयका प्रहरी वरिष्ठ उपरीक्षक राजेन्द्रप्रसाद भट्टले सम्बन्धित जिल्लाका सडक डिभिजन कार्यालयमार्फत डेडिकेटेड लेनका लागि रेड मार्क बनाउने कार्य भइरहेको बताए। विभिन्न चोक तथा घुम्तीहरुमा सोही अनुसारको मार्क लगाउने कार्य जारी छ। उनले दिउँसो भीडभाड हुने भएकाले धेरै काम राति भइरहेको पनि जानकारी दिए। केही ठाउँमा दिउँसो पनि काम भइरहेको छ।
कहाँ कहाँ रुक्नेछन् बस?
द्रुत रुपमा चल्ने यस्ता बस सडक निश्चित स्टपमा मात्रै ‘पिक एण्ड ड्रप’ गर्न पाउनेछन्। त्यहाँ १ मिनेटमा यात्रु चढाउने र ओराल्न पाइने विभागले जनाएको छ। यात्रु चढाउन र ओराल्नका लागि सूर्यविनायकदेखि रत्नपार्कसम्म जम्मा १९ वटा मात्रै स्टप रहनेछन् । तर, यी सबै स्टपहरू मानिसको सबैभन्दा बढी आवतजावत हुने ठाउँमा राखिएको विभागका महानिर्देशक रिजालले जानकारी दिए।
विभागका अनुसार सूर्यविनायक, थिमि, चारदोबाटो, कौशलटार, जडीबुटी कोटेश्वर, शान्तिनगर, नयाँ बानेश्वर, बबरमहल, माइतीघर, भद्रकाली, रत्नपार्कलगायत क्षेत्रमा स्टपहरू हुनेछन्।
प्रत्यक ५ मिनेटमा यस लेनमा बसहरू चल्नेछन्। एउटा बस र अर्को बसको दूरी १ किलोमिटर रहनेगरी व्यवस्थापन गरिनेछ। द्रुत बस सेवा लिनका लागि थप भाडा तिर्न पर्नेछैन। पुरानै भाडादरमा बस सञ्चालन गरिने विभागले जनाएको छ।
निकट भविष्यमा यस्ता बसहरू कहाँ छन् र स्टपमा पुग्न कति समय लाग्छ भन्ने जानकारी दिनेगरी मोबाइल एप पनि बनाइने विभागका महानिर्देशक रिजालले बताएका छन्।
1695118828.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
