काठमाडौं– जिल्ला सरकारी वकिलको कार्यालय काठमाडौंले सुन तस्करी प्रकरणमा हटाइएका त्रिभुवन अन्तर्राष्ट्रिय विमानस्थलका तत्कालीन प्रमुख अरुण पोखरेलमाथि अनुसन्धान गर्न पत्र पठाएको छ। सरकारी वकिलको कार्यालयले उनीमाथि अकुत सम्पत्ति र भ्रष्टाचार मुद्दामा छानबिन गर्न पत्र पठाएको हो।
विमानस्थल भन्सारबाट ६० किलो र त्यसअघि पनि भेपमार्फत् सुन तस्करी भएको देखिएको भन्दै उनीमाथि अनुसन्धान गर्न सोमबार पत्र लेखेको हो।
जिल्ला सरकारी वकिल कार्यालय काठमाडौंले अख्तियार दुरुपयोग अनुसन्धान आयोगलाई पत्र लेखेर पोखरेलमाथि सुन प्रकरणमा अनुसन्धान गर्न भनेको हो।
उनी सरकारी कर्मचारी भएकाले भ्रष्टाचारमा अनुसन्धान गर्ने निकाय अख्तियारलाई पत्र लेखिएको छ। सीआईबीले पनि उनको संलग्नता बारे ६० किलो सुन प्रकरणमा अनुसन्धान गरिरहेको छ। तत्कालीन विभानस्थल भन्सारका प्रमुख पोखरेलमाथि अनुसन्धान हुनुपर्ने प्रमाणहरु फेला परेकाले अख्तियारलाई पत्र लेखिएको जिल्ला सरकारी वकिल कार्यालय काठमाडौंका एक अधिकृतले बताए।
यसअघि भेपमा भएको ९ किलो सुन तस्करी र ६० किलो सुन तस्करी हुँदा पोखरेल विभानस्थल भन्सार प्रमुखको जिम्मेवारीमा थिए। चिनियाँ नागरिकले भेपमा लुकाएर ल्याएको ९ किलो सुन भन्सारका कर्मचारीले गायब पारेका थिए। साउन ३ गते राजश्व अनुसन्धान विभागले बरामद गरेको ६० किलो सुन पनि भन्सार विभागबाट जाँच पास भएर बाहिरिएको थियो।
भन्सारको गेट बाहिर पुगेपछि राजश्व अनुसन्धान विभागको टोलीले पक्राउ गरेको थियो। त्यसपछि गठन भएको छानबिन समितिले तस्करीको सुन चेकजाँचमा भन्सारको गम्भीर लापरबाही र मिलेमतो देखिएको सिफारिस गरेको थियो। दुवै घटनामा भन्सारका कर्मचारी र एजेन्ट संलग्न रहेको हुनसक्ने आशंका देखिएपछि पोखरेललाई अनुसन्धान गर्न अख्तियारलाई पत्र पठाइएको हो।
भेपमार्फत् ल्याइएको ९ किलो सुन प्रकरणमा भन्सारका कर्मचारीहरु पनि पुर्पक्षका लागि थुनामा छन्। भेपमा ल्याएको ९ किलो सुन तस्करीको घटनापछि पनि भन्सारमै कार्यरत रहेका प्रमुख पोखरेललाई अर्थ मन्त्रालयले ६० किलो सुन तस्करीको घटना सार्वजनिक भएको केही दिनपछि नै हटाएको थियो।
सुन पक्राउ गर्दा पोखरेल लामो समय बिदा लिएर बसेको र उनी किन यसरी बिदा बसे भन्ने कुरा शंकास्पद देखिएको अध्ययन प्रतिवेदनले ठहर गरेको देखेपछि सरकारी वकिलको कार्यालयले अनुसन्धानका लागि पत्र लेखेको हो। तस्करी गरिएको ६० किलो सुन पक्राउ पर्दा उनी बिरामी बिदामा रहेका थिए।
उनको लापरबाही देखिएपछि अर्थमन्त्रालयले साउन ९ गते उनलाई सरुवा गर्दै टोकराज पाण्डेलाई विमानस्थल भन्सारको प्रमुखमा सरुवा गरेको थियो। राजश्वले साउन ३ गते सुन बरामद गरेको र पोखरेल त्यसको एक महिना अघिदेखि बिदामा बसेको पाइएको थियो। विमानस्थलको भन्सारजस्तो संवेदनशील स्थानको प्रमुखले किन यति लामो बिदा लिए भन्ने प्रश्नमै अध्ययन समितिले प्रश्न उठाएको थियो। उनले भदौ १७ गतेसम्मको बिदा लिएका थिए।
६० किलो सुन तस्करी प्रकरणको अनुसन्धान अन्तिम चरणमा रहेको छ। सीआईबीले हालसम्म गरेको अनुसन्धानको विषयमा सरकारी वकिलसँग छलफल गरेपछि यस्तो निर्देशन दिएको हो। राजश्व अनुसन्धान विभागले १८ जनालाई पक्राउ गरेर सीआईबीमा बुझाएको थियो। तीमध्ये एकजना स्वास्थ्यका कारण रिहा भएकी थिइन्। अन्य १७ जनालाई सीआईबीले हिरासतमा राखेर अनुसन्धान गरिरहेको छ।
सीआईबीले केही दिनमै आफ्नो अनुसन्धान प्रतिवेदन बुझाउने तयारी गरेको छ। यस्तै ६ जना चिनियाँ पनि पक्राउ परेका छन्। उनीहरु नै अहिलेसम्म यो तस्करी गर्ने कार्यमा मुख्य देखिएका छन्। तर यही बीचमा सरकारी वकिल कार्यालयले भने तत्कालीन भन्सार प्रमुखलाई अनुसन्धान गर्न अख्तियारलाई पत्र पठाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
