काठमाडौं– नेपाल राष्ट्र बैंकले शुक्रबार सार्वजनिक गरेको आर्थिक वर्ष २०७९/८० को वार्षिक तथ्याङ्कले नेपालको अर्थतन्त्र सुदृढ हुँदै गएको देखाएको छ। आर्थिक वर्ष ०७८/०७९ को तुलनामा पछिल्लो आर्थिक वर्षमा आर्थिक सूचकहरु सुधारोन्मुख भएको देखिएको छ।
विदेशी मुद्रा सञ्चिति १५ खर्ब ३९ अर्ब माथि, १० महिनाको आयात धान्न पुग्ने
बैंकिङ क्षेत्रमा विदेशी मुद्राको सञ्चिति बढेको छ। नेपाल राष्ट्र बैंकले सार्वजनिक गरेको पछिल्लो तथ्याङ्कअनुसार बैंकिङ क्षेत्रसँग विदेशी मुद्राको सञ्चिति बढेको देखिएको छ।
शुक्रबार सार्वजनिक आर्थिक वर्ष २०७९/०८० को वार्षिक तथ्याङ्कअनुसार विदेशी विनिमय सञ्चिति २६.६ प्रतिशतले बढेर २०८० असार मसान्तमा १५ खर्ब ३९ अर्ब ३६ करोड रुपैयाँ पुगेको छ। अघिल्लो वर्ष २०७९ असार मसान्तसम्म नेपालको विदेशिक मुद्राको सञ्चिति १२ खर्ब १५ अर्ब ८० करोड रुपैयाँ बराबर रहेको थियो।
असार मसान्तसम्मको सञ्चितिले १० महिनासम्म वस्तु तथा सेवाको आयात धान्नसक्ने राष्ट्र बैंकले सार्वजनिक गरेको तथ्याङ्कमा उल्लेख गरिएको छ।
‘आर्थिक वर्ष २०७९/८० को आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति ११.७ महिनाको वस्तु आयात र १० महिनाको वस्तु तथा सेवा आयात धान्न पर्याप्त रहने देखिन्छ,’ अध्ययन प्रतिवेदनमा भनिएको छ।
एक वर्षमा बढे करिब ५ लाख पर्यटक
आर्थिक वर्ष २०७९/८० मा ८ लाख ६२ हजार ९९२ पर्यटक नेपाल भित्रिएका छन्। यस आर्थिक वर्षमा पर्यटकको संख्यामा उल्लेख्य वृद्धि भएको छ।
अघिल्लो आर्थिक वर्षमा नेपाल आउने पर्यटकको संख्या ३ लाख ७४ हजार १४७ रहेको थियो।
शोधनान्तर स्थिति २ खर्ब ९० अर्बले बचतमा
अघिल्लो आर्थिक वर्षको तुलनामा आर्थिक वर्ष २०७९/८० मा शोधनान्तर स्थितिमा उल्लेख्य सुधार भएको छ। अघिल्लो वर्ष करिब २ खर्ब ५५ अर्ब घाटामा रहेको शोधनान्तर स्थिति अहिले २ खर्ब ९० अर्बले बचतमा रहेको छ।
‘समीक्षा वर्षमा शोधनान्तर स्थिति २ खर्ब ९० अर्ब ५२ करोडले बचतमा रहेको छ। अघिल्लो वर्ष शोधनान्तर स्थिति २ खर्ब ५५ अर्ब २६ करोडले घाटामा रहेको थियो,’ राष्ट्र बैंकको प्रतिवेदनमा भनिएको छ।
भित्रियो १२ खर्ब २० अर्ब बढी रेमिट्यान्स
आर्थिक वर्ष २०७९/८० मा नेपालमा १२ खर्ब २० अर्ब रुपैयाँभन्दा बढी विप्रेषण (रेमिट्यान्स) भित्रिएको छ।
यस वर्ष १२ खर्ब २० अर्ब ५६ करोड रुपैयाँ रेमिट्यान्स भित्रिएको हो। यस आर्थिक वर्षमा रेमिट्यान्सको आप्रवाह २१.२ प्रतिशतले वृद्धि भएको छ।
अध्ययन प्रतिवेदनअनुसार अघिल्लो आर्थिक वर्षमा रेमिट्यान्स आप्रवाह ४.८ प्रतिशतले बढेको थियो।
राजस्व संकलनमा भने घट्यो
गत आर्थिक वर्ष ०७९/८०मा राजस्व संकलन घटेको छ। अघिल्लो आर्थिक वर्षको तुलनामा १ खर्ब १० अर्बले राजस्व संकलन घटेको हो।
यस आर्थिक वर्षमा प्रदेश सरकार तथा स्थानीय तहमा बाँडफाँट हुने रकमसमेत गरेर ९ खर्ब ५७ अर्ब १५ करोड रुपैयाँ राजस्व संकलन भएको छ।
अघिल्लो आर्थिक वर्ष २०७८/७९ मा कुल राजस्व संकलन १० खर्ब ६७ अर्ब ९६ करोड रुपैयाँ भएको थियो।
ऋण बढ्यो
नेपाल सरकारको ऋण २२ खर्ब १८ अर्ब पुगेको छ। २०८० को असार मसान्तसम्म ऋण २२ खर्ब १८ अर्ब ५४ करोड रुपैयाँ पुगेको हो।
नेपाल सरकारको कुल तिर्न बाँकी ऋणमध्ये बाह्य ऋण १० खर्ब ९३ अर्ब ३५ करोड रहेको छ। यसैगरी आन्तरिक ऋण ११ खर्ब २५ अर्ब १९ करोड रुपैयाँ रहेको राष्ट्र बैंकले जनाएको छ।
तथ्याङ्कअनुसार प्रतिनेपाली ऋणको भार ७४ हजार १०८ रुपैयाँ पुगेको छ।
विदेश गए नयाँ ५ लाख नेपाली
त्यस्तै, आर्थिक वर्ष २०७९/८० मा करिब ५ लाख नेपालीले वैदेशिक रोजगारीका लागि अन्तिम श्रम स्वीकृति लिएका छन्।
‘समीक्षा वर्षमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत)नयाँ लिने नेपालीको संख्या ४०.३ प्रतिशतले वृद्धि भइ ४ लाख ९७ हजार ७०४ पुगेको छ,’ राष्ट्र बैंकले आफ्नो प्रतिवेदनमा भनेको छ।
त्यसअघिको आर्थिक वर्षमा सो स्वीकृति लिने ३९२.० प्रतिशतले बढेको राष्ट्र बैंकले जनाएको छ। त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्यामा समीक्षा वर्षमा १.८ प्रतिशतले कमी आइ २ लाख ७७ हजार २७२ पुगेको सो प्रतिवेदनमा उल्लेख छ। अघिल्लो वर्ष यस्तो संख्या १९८.५ प्रतिशतले बढेको उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
