धनगढी– नेकपा (माओवादी केन्द्र) सुदूरपश्चिम प्रदेश संसदीय दलका नेता खगराज भट्टलाई मंसिर २८ गते प्रदेशका मुख्यमन्त्री राजेन्द्रसिंह रावलले मन्त्री पदमा नियुक्त गरे। मंसिर २७ गते मुख्यमन्त्रीमा नियुक्त भएका रावलले २८ गते पद तथा गोपनीयताको सपथ लिँदै भट्टलाई विना विभागिय मन्त्रीमा नियुक्त भए। मन्त्रीमा नियुक्त भएको तीन साता पुग्नलाग्दा समेत अहिलेसम्म मन्त्रालयविहीन छन्।
मन्त्रालयविहीन भएपछि मन्त्री भट्ट अहिले काठमाडौंमा छन्। धनगढीमा हुँदा नेता भट्ट सेती प्रादेशिक अस्पतालका अध्यक्ष निर्मल शाहको घरमा आश्रय लिएर बस्छन्। राम्रै मन्त्रालयको दौडमा नेता भट्ट काठमाडौंमा विभिन्न नेताहरुसँग भेटघाट गरिरहेका छन्।
सोहीदिन विना विभागियमन्त्रीमा नियुक्त भएकी नेतृ हुन् नेकपा (एमाले)की प्रदेश सभा सदस्य सन्तोषकुमारी शर्मा थापा। उनको धनगढी उपमहानगरपालिका वडा नम्बर ५ मा आफ्नै घर भएकाले उनी घरबाटै पार्टीको कार्यक्रम तथा अन्य भेटघाटमा निस्कन्छिन्। उनलाई पनि कुनै मन्त्रालयको जिम्मेवारी दिइएको छैन। उनले भनिन्, ‘मन्त्रालयको जिम्मेवारी छैन। कुन र कसको कार्यकक्षमा जाने र के गर्ने होला? त्यसैले घरबाटै पार्टीको कार्यक्रम तथा अन्य भेटघाटमा निस्कन्छु।’ उनले मन्त्रालयको जिम्मेवारी छिट्टै मिल्ने विश्वास व्यक्त गरिन्।
माओवादीका नेता भट्टले मुख्यमन्त्री रावलले विश्वासको मत लिने र सोहीदिन मन्त्रिपरिषद् विस्तार गरिने बताए। उनले भने, ‘मुख्यमन्त्रीको विश्वासको मत र मन्त्रिपरिषद् विस्तार सँग–सँगै हुन्छ।’ मन्त्रीमा नियुक्त भए पनि मन्त्रालयको जिम्मेवारी नपाउँदा दुई मन्त्रीहरुले मन्त्रालयबाट पाउनुपर्ने क्वाटर (आवास), सवारी साधन, इन्धन लगायतका सेवा–सुविधा उपभोग गर्न पाएका छैनन्।
विश्वासको मत नपाउने आशंकामा रहेका मुख्यमन्त्री रावल पनि विश्वासको मत पछिमात्र मन्त्रिपरिषद् विस्तार गर्ने तयारीमा छन्। नागरिक उन्मुक्ति पार्टीले माग र मुद्दा पूरा नभएसम्म सरकारलाई समर्थन नगर्ने र सरकारमा नजाने प्रतिक्रिया दिँदै आएको छ।
एमालेका एक प्रदेश सभा सदस्यले भने, ‘ मन्त्रिपरिषद् विस्तारबारे केन्द्रमा छलफल र सहमति भइरहेको छ।’
मुख्यमन्त्री रावल केन्द्रको सत्ता गठबन्धन दलको सहमति कुरिरहेको उनको भनाइ छ। सत्ता गठबन्धनको छलफलबाटै दलहरुबीच मन्त्रालय बाँडफाँड र सहमति हुनेछ। सोही आधारमा प्रदेशमा मन्त्रिपरिषद् विस्तार गर्ने तयारीमा मुख्यमन्त्री रावल रहेका छन्।
रावलले प्रदेशमा सत्ता गठबन्धन दलभित्र अहिलेसम्म कुनै छलफल अघि बढाउन सकेका छैनन्। विश्वासको मत कायम गराउन काठमाडौं पुगेका रावलले प्रदेशमा सत्ता गठबन्धन दलभित्र रहेका संसदीय दलका नेताहरुसंग विश्वासको मत तथा मन्त्रिपरिषद् विस्तारबारे वार्ता तथा छलफल अघि बढाएका छैनन्। उनी केन्द्रको सहमतिका आधारमा प्रदेशमा विश्वासको मत पाउनेमा विश्वस्त देखिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
