काठमाडौं– परम्परागत राजनीतिक दलभन्दा फरक रहेको उद्घोष गरेर निर्वाचनमार्फत ‘अनपेक्षित’ जनमतसहित सत्तारोहण गरेको राष्ट्रिय स्वतन्त्र पार्टीका सबै मन्त्रीका गतिविधि विवादमा परेका छन्।
विषय विज्ञलाई सरकारमा पठाउने निर्णय गरेको यस पार्टीका मन्त्रीहरू स्वार्थ बाझिने मन्त्रालय सम्हाल्दै सत्तामा पुगे पछि त्यसको आलोचना भइरहेको छ। आलोचनाको ग्राफ दिनदिनै उकालो लाग्दो छ।
रास्वपाको तर्फबाट सरकारमा उपप्रधानसहित तीन मन्त्री र एक राज्यमन्त्री छन्। र, यी सबैजना विवादभन्दा पर छैनन्।
नागरिकता विवादमा फसेका व्यक्ति नै गृहमा
रास्वपाका सभापति रवि लामिछाने नागरिकता सम्बन्धी विवादमा परेका छन्। तत्कालीन समयमा अमेरिकी नागरिकता लिँदा नेपाली नागरिकता त्यागेको तर पुन: प्राप्त गर्ने कानुनी प्रकृया पूरा नगरि पुरानै नागरिकता बोकेको उनीमाथि आरोप छ। उनै लामिछाने उपप्रधानसहित गृह मन्त्रीका रूपमा सरकारमा सहभागी छन्।
लामिछानेको उक्त मुद्दा सर्वोच्चमा विचाराधीन छ। सम्भवत: शुक्रबार उक्त मुद्दामा फैसाला आउनेसक्ने सम्भवाना छ।
अर्कोतर्फ आफ्नै नागरिकता र रहादानीको अनुसन्धन गरिरहेको विभागको तालुकदार मन्त्रालय सम्हाल्न पुगेपछि प्रहरी प्रशासन लामिछानेको अनुसन्धनबाट पछि हटेको छ। यता, लामिछाने भने आफूमाथि उठेका सार्वजनिक प्रश्नमा मौन छन्।
म्यानपावर व्यवसायी श्रम मन्त्रालयको नेतृत्वमा
रास्वपाले ‘म्यानपावर’ व्यवसायी डोलप्रसाद अर्याललाई श्रममन्त्री बनाएको छ। अर्याल सृष्टि अभोरसिज प्रालिका सञ्चालक समितिका सदस्य हुन्। उनी उक्त प्रालिको इन्टरनेसनल मार्केटिङ डाइरेक्टर हुन्।
अर्याल रेमिट्यान्स सञ्चालक पनि रहेको पाइएको छ। उनी इजिलिङ्क रेमिट्यान्स कम्पनीका सञ्चालक हुन्। तर, रास्वपाबाट समानुपातिक संसद् बनेका उनै अर्यालले श्रम, रोजगार तथा सामाजिक सुरक्षा मन्त्रालयको जिम्मा पाएका हुन्।
रेमिट्यान्स कम्पनी कम्पनीको ब्रान्ड एम्बेसडरको रूपमा पार्टी सभापतिसमेत रहेका उपप्रधान तथा गृहमन्त्री रवि लामिछाने भएको कम्पनीको सामाजिक सञ्जालमा उल्लेख गरिएको छ। यो विषय बाहिरएपछि अर्याल र लामिछानेको चर्को आलोचना भइरहेको छ।
शिक्षामन्त्रीको पहिलो निर्णय नै विवादमा
यसअघि सार्वजनिक शिक्षा सुधारका अभियन्ताको परिचय बनाएका रास्वपा सांसद शिशिर खनाल शिक्षामन्त्री बनेका छन्। तर, उनको पहिलो निर्णय नै विवादमा परेको छ।
शिक्षामन्त्री खनालले कक्षा १ देखि कक्षा ५ सम्मको पाठ्यपुस्तक निजी क्षेत्रलाई छपाइका लागि दिने निर्णय गरेका थिए। सो निर्णयपछि निजी क्षेत्रलाई पाठ्यपुस्तक छपाउन दिएर घुस खानका लागि यस्तो निर्णय गरेको र यो निर्णयले झनै विद्यार्थीहरूलाई महंगो मूल्यमा पुस्तक किन्न बाध्य हुनुपर्ने अवस्था आउने भन्दै विद्यार्थी संगठनले बिरोध जनाएका छन्।
खनालको उक्त निर्णयको विरोध गर्दै नेकपा (एकीकृत समाजवादी) निकट विद्यार्थी संगठन अनेरास्ववियूले शिक्षामन्त्रीका पुत्ला दहन गरेको छ। शुक्रबार रत्नराज्य क्याम्पसअगाडि अनेरास्ववियूका विद्यार्थी नेता भेला भइ शिक्षामन्त्री खनालको पुत्ला दहन गरेका हुन्।
उनीहरूले शिक्षामन्त्री खनालले सरकारमा गएर गरेको पहिलो निर्णय नै जनताका लागि अभिशाप भएको आरोप लगाएका छन्।
अभियन्ताबाट राज्यमन्त्री बनेकी कार्की विवादमा
सार्वजनिक स्वास्थ्यको सुधार अभियानकी अभियन्ताका रुपमा उदाएकी स्वास्थ्य राज्यमन्त्री डा तोसिमा कार्कीका हरेक गतिविधि विवादमा परेका छन्। शपथपछि मन्त्रालयमा पदभार सम्हाल्न पुगेकी कार्कीले ‘प्रोटकल’विपरीत फुल मन्त्रीले गरेको पहिलो निर्णयमा चासो राखेका समाचार सार्वजनिक भएका थिए।
यस्तै, स्वास्थ्यमन्त्री पदम गिरीसँगै रिवन काटेर उद्घाटन गर्न पुगेकी कार्कीको उक्त कार्यको पनि सार्वजकि भर्त्सना भएको थियो। नयाँ राजनीति गर्ने उद्घोष गरेकी कार्की उही पुरानै शैलीमा उद्घाटनको ‘राम–रमाइलोमा’ लागेको आरोप लागेको छ।
राज्यमन्त्रीको उक्त विषय सेलाउन नपाउँदै अस्पतालको संवेदनशील क्षेत्र मानिने आईसीयूभित्र क्यामरा र पत्रकार लिएर गएको भन्दै सार्वजनिक आलोचना भएको छ। काठमाडौं बानेश्वरमा मंगलबार आत्मदाहपश्चात उपचाररत प्रेम आचार्यलाई हेर्न कीर्तिपुरस्थित बर्न अस्पताल पुगेकी कार्कीको आईसीयूभित्र संवाद गरेको भिडियो सार्वजनिक भएको थियो। आचार्यको बुधबार बिहानै निधन भइसकेको छ।
यस विषयमा आलोचना भएपछि डा कार्कीले शुक्रबार सामाजिक सञ्जाल फेसबुकमार्फत खण्डन गरेकी छन्। कार्कीले आफूलाई कसले र कसको अनुमतिमा भिडियो खिचेको भन्ने जनाकारी नरहेको बताएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
