राजनीति

प्रचण्डमाथि ‘कांग्रेस–भरोसा’

नवीन झा सोमबार, माघ २, २०७९ २०:४५

पुस २५ मा कांग्रेस सभापति शेरबहादुर देउवाको निवास धुम्बाराहीमा प्रधानमन्त्री पुष्पकमल दाहाल ‘प्रचण्ड’। फाइल तस्बिर।

काठमाडौं- माघ ५ को सभामुख निर्वाचन र चाँडै हुन लागेको राष्ट्रपति निर्वाचनतर्फ राजनीति केन्द्रित हुँदै गएको छ। प्रधानमन्त्रीलाई विश्वासको मत दिएर नेपाली कांग्रेसले एमाले र माओवादी केन्द्रका बीचमा शंकाको बिउ जगाएको चर्चाका माझ प्रधानमन्त्री पुष्पकमल दाहाल ‘प्रचण्ड’ले मंगलबार सर्वदलीय बैठक बोलाएका छन्।

त्यसअघि सोमबार बिहान मात्रै उनले एमाले अध्यक्ष केपी शर्मा ओलीलाई उनकै निवास बालकोटमा भेटेर लामो कुराकानी गरे। सोमबारै साँझ ओली नेतृत्वको उच्चस्तरीय राजनीतिक संयन्त्रको बैठक पनि बसेको छ। बैठक मुख्यरुपमा मन्त्रिपरिषद् विस्तारमा केन्द्रित रहेको जनाइएको छ।

पुस १० मा प्रचण्ड एमाले, माओवादी केन्द्र, राष्ट्रिय स्वतन्त्र पार्टी, राप्रपा, जसपा, जनमत पार्टी, नागरिक उन्मुक्ति पार्टी र केही स्वतन्त्र सासंदहरूको समर्थनमा प्रधानमन्त्री नियुक्त भएका थिए। त्यसको १६ दिनपछि पुस २६ मा विश्वासको मत लिँदा उनको पक्षमा प्रतिनिधि सभाका लगभग सबै शक्तिले मत दिए। तथापि, प्रतिनिधि सभाको सबैभन्दा ठूलो दल नेपाली कांग्रेसले दिएको विश्वासको मतको भने बढी चर्चा भयो।

कांग्रेसले प्रचण्डलाई विश्वासको मत दिनुभन्दा अघिल्लो साँझ प्रधानमन्त्री प्रचण्डले कांग्रेस सभापति शेरबहादुर देउवासँग भेटेका थिए। देउवानिवास धुम्बाराही पुगेर प्रचण्डले विश्वासको मत दिन आग्रह गरेका थिए। त्यसपछि देउवा पार्टीभित्र र बाहिरको आलोचना खेपेरै प्रचण्डलाई विश्वासको मत दिने पक्षमा उभिएका थिए। जसले सत्ता राजनीतिको अबको सम्भावनामाथि नै अन्योल उत्पन्न गराएको छ।

कांग्रेसका कतिपय नेताहरूले सार्वजनिक रुपमा सभामुख र राष्ट्रपति निर्वाचनलाई ध्यानमा राखेर पार्टीले प्रधानमन्त्री प्रचण्डलाई विश्वासको मत दिएको दाबी गरेका छन्। तर, पार्टी नेतृत्वले भने त्यसबारेमा अहिलेसम्म मुख खोलेको छैन। प्रधानमन्त्री प्रचण्डले भने गत शनिबार सम्पादकहरूसँगको छलफलमा सभामुख र राष्ट्रपति निर्वाचन बारेमा कांग्रेससँग पनि साझेदारी हुने संकेत गरेका छन्। यसले एमाले नेतृत्वलाई झस्काएको देखिन्छ। असन्तुष्ट एमालेका नेताहरूले आफ्ना प्रतिक्रियाहरूमा प्रचण्डलाई पुस १० को ‘सहमति’ प्रति इमानदार हुन सुझाउने गरेका छन्।

सोमबार प्रचण्ड बालकोट जानुअघि आइतबार साँझ ओली बालुवाटार नै पुगेर प्रचण्डसँग छलफल गरेका थिए। यसअघि पनि दुई नेताबीच बारम्बार छलफल भइरहेको छ। तर, मन्त्रिपरिषद् विस्तार लगायतका कुनै थप घटना विकास भएको भने देखिँदैन।

आइतबार साँझ प्रधानमन्त्री र एमाले अध्यक्ष बालुवाटारमा छलफल गरिरहँदा नेकपा एकीकृत समाजवादीका अध्यक्ष माधवकुमार नेपाल देउवासँग छलफल गर्न धुम्बाराही पुगेका थिए। आइतबार देउवासँग छलफल गरेका नेपालले शनिबार प्रधानमन्त्री प्रचण्डसँग भेटेका थिए। यसरी प्रधानमन्त्री प्रचण्ड एमाले र कांग्रेस मात्रै होइन, एकीकृत समाजवादीसँग पनि संवादमा देखिन्छन्।

बुधबार हुँदै गरेको सभामुखको उम्मेदवारी मनोनयन र बिहीबार हुने निर्वाचन तथा केही हप्तापछि नै हुने राष्ट्रपति निर्वाचनमा माओवादी केन्द्रले कांग्रेसलाई सघाउँछ कि एमालेलाई? त्यो पनि अन्योलपूर्ण नै छ।

कांग्रेस सभापति देउवानिकट एक नेताका अनुसार, पुस २५ गते साँझ ‍प्रधानमन्त्री प्रचण्ड धुम्बाराही पुगेर कांग्रेसलाई राष्ट्रपति वा सभामुखमध्ये एक पद दिने वचन दिएका छन्। उनी भन्छन्, ‘प्रधानमन्त्री प्रचण्डले राष्ट्रपति, सभामुख र उपसभामुखमा कांग्रेस, एमाले र माओवादी केन्द्रबीच भागबन्डा गर्ने आश्वासन दिएका छन्। त्यही भएर हामीले विश्वासको मत दिएका हौँ।'

विश्वासको मत दिएपछि देउवाले पुस २८ मा पार्टीका पदाधिकारी र पूर्वपदाधिकारीहरूको बैठक गर्दै सभामुख निर्वाचनका बारेमा सतारुढ दलहरूसँग छलफल गरेर निष्कर्षमा पुगिने बताएका थिए। त्यसयता देउवानिकट केही नेताहरूले प्रधानमन्त्री प्रचण्डसँग कुराकानी गरिरहेको पनि देउवानिकट स्रोतको दाबी छ। तर, कांग्रेसको प्रयत्न कसरी परिणाममुखी हुन्छ भन्नेचाहिँ सोमबार साँझसम्म प्रष्ट देखिएको छैन।

कांग्रेस प्रवक्ता प्रकाशशरण महतले मंगलबार प्रधानमन्त्री प्रचण्डले बोलाएको सर्वदलीय बैठकमा उनले ल्याउने प्रस्ताव हेरेर मात्रै कांग्रेस कसरी अगाडि भन्ने तय हुने बताए।

‘प्रधानमन्त्रीजीले मंगलबार सर्वदलीय बैठक बोलाउनु भएको कुरालाई हामीले सकारात्मक रुपमै लिएका छौँ’, महतले नेपाल लाइभसँग भने, ‘हामीले विश्वासको मत दिने काम गरिसकेकाले अब बल प्रधानमन्त्रीको कोर्टमा छ।’

महतको भनाइले राष्ट्रपति र सभामुखमध्ये एक पद पाउनेमा कांग्रेस प्रधानमन्त्री प्रचण्डमाथि भरोसामा रहेको देखिन्छ।

तर, पुस १० मा प्रधानमन्त्री बन्दै गर्दा प्रचण्डले राष्ट्रपति र सभामुख दुवै पद एमालेलाई दिने समझदारी गरेको बताइएको छ। विश्वासको मतसँगै उब्जिएका विभिन्न आशंका र गत शनिबारको प्रधानमन्त्री प्रचण्डको अभिव्यक्तिले राष्ट्रपति र सभामुखमा कांग्रेससँग साझेदारी हुन्छ कि हुँदैन? सम्भवतः मंगलबारको बैठकले संकेत गर्नेछ।