नयाँ सरकारबारे निजी क्षेत्रको अपेक्षा– राजनीतिक भागबण्डा होइन, समृद्धि हासिल गर्ने नेतृत्व आवस्

अर्थ समाचार

नेपाल लाइभ शुक्रबार, मंसिर १६, २०७९ १५:५८

काठमाडौं– मंसिर ४ गते भएको प्रतिनिधि सभा र प्रदेश सभा निर्वाचन सम्पन्न भएर देशभरको मतपरिणामको टुंगो लाग्दै गर्दा आम चासोको विषय बनेको छ– अब सरकार कसको बन्छ?

चुनावी परिणामअनुसार प्रतिनिधि सभामा दलहरुको संख्या बढेको छ। मतदाताले कुनै एउटा दललाई स्पष्ट बहुमत दिएका छैनन्। निर्वाचन क्षेत्रको बाँडफाँट नै गरेर चुनावमा गएको सत्ता गठबन्धनले पनि सरकार गठन गर्नका लागि स्पष्ट बहुमत पुर्‍याउन सक्ने अवस्था छैन, हालसम्मको चुनावी नतिजाअनुसार।

चुनावपछि पनि स्थिर सरकार नबन्ने देखिएपछि देशको समग्र अर्थतन्त्र र आर्थिक विकासलाई लिएर चिन्ता व्यक्त हुन थालेको छ। अबको समय पनि राजनीतिक अस्थिरता र खिचातानी मै बित्ने हो कि? भन्ने चिन्तामा निजी क्षेत्र पनि छ।

नेपाल उद्योग वाणिज्य महासंघले शुक्रबार आयोजना गरेको पत्रकार सम्मेलनमा महासंघका अध्यक्ष शेखर गोल्छाले सबै नेपालीहरुको आर्थिक समृद्धि चाहेकाले मुलुकमा समृद्धि ल्याउन सक्ने नेतृत्व सरकारमा आउनुपर्ने धारणा राखे। उनले अहिलेसम्म सबै राजनीतिक दलहरुले आर्थिक अजेन्डा बोके पनि त्यस्तो अजेन्डा लोकप्रियता कमाउनको लागि मात्रै प्रयोग हुने गरेको सुनाए।

अब बन्ने सरकारले राजनीतिक भन्दा पनि आर्थिक अजेन्डालाई ध्यान दिएर आफ्ना लक्ष्य र उद्देश्यहरु तय गर्नुपर्ने गोल्छाको भनाइ छ। विशेष गरेर अर्थतन्त्रको वर्तमान संकटलाई समाधान गरी दिगो आर्थिक विकासका लक्ष्यहरु हासिल गर्नसक्ने सरकार बन्नुपर्ने गोल्छाको भनाइ छ। संकटमा रहेको अर्थतन्त्रलाई सम्हाल्ने र अर्थतन्त्रलाई सवल बनाउनसक्ने नेतृत्व सरकारमा आउनेमा निजी क्षेत्र आशावादी रहेको गोल्छाले सुनाए।

‘नेपाली जनताले चाहेकको मुलुकको समृद्धि हो। अब बन्ने सरकारले मुलुकमा कसरी समृद्धि प्राप्त गर्न सकिन्छ भनेर निजी क्षेत्रसँग सहकार्य बिना सम्भव छैन,’ उनले भने, ‘मुलुकमा समृद्धि प्राप्त गर्नसक्ने नेतृत्व सरकारमा आउनुपर्छ भन्ने विश्वास छ।’

त्यस्तै, नेपाल चेम्बर अफ कमर्सका अध्यक्ष राजेन्द्र मल्लले राजनतिक अजेन्डालाई भन्दापनि आर्थिक अजेन्डा प्राथमिकता दिने नेतृत्व सरकारमा आउनुपर्ने बताए। उनले चुनावको परिणामले एउटा पार्टीको सरकार बन्नसक्ने अवस्था नदेखिएकाले मिलिजुली सरकार भए पनि आर्थिक स्थायित्व दिनसक्ने नेतृत्वको सरकार बन्नुपर्ने बताए। राजनीतिक पार्टीका फरक–फरक धारणा भए पनि आर्थिक अजेन्डामा सबै दलका नेताहरुको एउटै धारणा भएको सरकार आउनु आवश्यक रहेको मल्लको भनाइ छ।

‘अहिले निर्वाचनको परिणाम आउँदैछ। कुनै पनि एउटा पार्टीको बहुमतको सरकार बन्ने देखिएन। निजी क्षेत्र के चाहन्छ भने नयाँ बन्ने सरकार मिलिजुली भए पनि आर्थिक स्थायित्व दिने हुनुपर्छ ’ उनले भने ‘जनतालाई सेवा सुविधा दिने विषयमा सहज सरल बनाउन सकोस्। राजनीतिक पार्टीका फरकफरक धारणा भएपनि आर्थिक अजेन्डामा सबै दलका नेताहरुको एउटै धारणा भएको सरकार आउनुपर्छ भन्ने धारणा राख्दछु।’

त्यस्तै, उद्योगी तथा गोल्यान ग्रुपका अध्यक्ष पवन गोल्यानले दिगो आर्थिक विकास गरी देश र जनताको लागि काम गर्ने सरकार आउन आवश्यक रहेको बताए।

उनले अब बन्ने सरकार राजनीतिक भागबण्डालाई छाडेर देश बनाउने अजेन्डामा केन्द्रित बन्नुपर्ने बताए। अध्यक्ष गोल्यानले ५ वर्षमा देशको माटो सुहाउँदो र आर्थिक विकासमा सहज हुने नीति बनाउनसक्ने नेतृत्व सरकारमा आउनुपर्ने बताए। उनले नेपालका राजनीतिक दलहरुले सोचमा परिर्वतन गर्न आवश्यक भएको पनि बताए।

‘अब बन्ने सरकारको पहिलो अजेन्डा नै आर्थिक अजेन्डा हुनुपर्छ। अब राजनीतिक भागबण्डा र राजनीतिलाई छाडेर देश बनाउने अजेन्डामा केन्द्रित हुनुपर्छ,’ उनले भने, ‘देशको माटो र नेपाली जनता सुहाउँदो नीति आउनुपर्‍यो। सानो देश भएकाले ५ वर्षमा देशको माटो सुहाउँदो नीति बनाउन सक्छौं।’

गोल्यानले अब बन्ने नयाँ सरकारले कृषिलाई पहिलो प्राथमिकता दिएर कृषिलाई सबैभन्दा बढी नाफामूलुक उद्योग बनाउनसक्ने गरी कार्यक्रम ल्याउनुपर्ने बताए। उनले पर्यटन विकासका लागि भौतिक संरचना बनाउन लगानी बढाउनुपर्ने बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

भारत-पाकिस्तान सीमा क्षेत्रमा पुनः गोलाबारी सुरु

नेपालमा लगानी गर्न व्यवसायीलाई अध्यक्ष ढकालको आग्रह

सगरमाथा संवादको अन्तिम तयारीमा छौँ : परराष्ट्रमन्त्री