काठमाडौं– राप्रपाको अध्यक्षका लागि भएको निर्वाचनमा कमल थापा पराजित भए। त्यसपछि उनी सुषुप्त रहेको राप्रपा नेपालको अध्यक्ष भए। तर आफ्नो पार्टीलाई अघि बढाउने भन्दा पनि एमालेसँग निकट हुने र उसकै साथमा अघि बढ्ने प्रयत्नमा लागे। तर बिहीबारको अन्तिम मत परिणाममा पराजित भए। त्यसअघि नै उनले हार स्वीकार गरिसकेका थिए।
मकवानपुर–२ मा राप्रपा नेपालले एमालेसँग गठबन्धन गरेर चुनावी मैदानमा होमिएको थियो। राप्रपा नेपालको अध्यक्ष पदमै रहेर एमालेको चुनाव चिह्नबाट उम्मेदवार बनेका उनले आलोचना पनि खेपेका थिए। तर एमाले अध्यक्ष केपी शर्मा ओलीको प्रशंसा गरेर एमाले पंक्तिको मत तान्ने उनको प्रयास सफल हुन सकेन। थापालाई हारको उपहार दिने अरु कोही होइनन्, उनकै पूर्वसहयात्री दीपकबहादुर सिंह हुन्।
‘२०७९ सालको चुनावले सकारात्मक परिवर्तनको पक्षमा दिएको सशक्त सन्देशलाई सबैले मनन गर्नु जरुरी छ। प्रजातान्त्रिक अभ्यासमा हारजित स्वभाविक हो। व्यक्ति हारे पनि देश, जनता र लोकतन्त्र बलियो हुँदै जानुपर्छ’, उनको भनाइ छ, ‘सनातन धर्म संस्कृति रक्षाको आवाज कमजोर हुँदै जान लागेकोमा भने केही खिन्नता लागेको छ।’
२०५६ सालदेखि सांसदको लागि चुनावी प्रतिस्पर्धामा रहेका सिंहले २३ वर्षपछि आफ्नो लक्ष्य भेट्टाएका छन्। उनको यो विजयी किन पनि उल्लेखनीय बन्यो भने, उनले दुई बलिया गठबन्धनका उम्मेदवारलाई पराजित गरे। एमाले र राप्रपा नेपालका गठबन्धनबाट उम्मेदवार रहेका थापा र सत्ता गठबन्धनको उम्मेदवार रहेकी नेपाली कांग्रेसकी सहमहामन्त्री महालक्ष्मी उपाध्याय डिनालाई पराजित गर्दै सांसदमा निर्वाचित भएका हुन्।
मनोनयन दर्तापछि उक्त क्षेत्रमा थापा र डिनाको मात्र चर्चा रहेको थियो। सबैको नजर यी दुई उम्मेदवारमा मात्र केन्द्रित भइरहेका थिए। मतगणनाको अन्तिम समय चलिरहँदा पनि डिना नै विजय हुने आकलन भइरहेको थियो। मतगणना नसकिँदै थापाले पराजय स्वीकार गरेको र डिनाले अग्रता लिइरहेको परिप्रेक्ष्यमा उनको जित हुने ठानिएको थियो। तर अन्तिममा सिंहले सरप्राइज दिए।
निरन्तर पराजित हुने छविमा पूर्णविराम
सिंहको निर्वाचन अनुभव लामो रहेको छ। उनी निरन्तर चुनावी मैदानमा छन्। २०७९ वैशाख ३० गते स्थानीय निर्वाचनमा पनि उनी हेटौंडा उपमहानगरपालिकामा मेयर पदका प्रत्यासी थिए। उक्त निर्वाचनमा कडा प्रतिस्पर्धाका बीच उनी पराजित भए। तर उनले हार मानेनन्। मंसिर ४ को निर्वाचनका लागि फेरि उम्मेदवार बनेर मैदानमा आए।
यो प्रतिस्पर्धा उनका लागि सहज थिएन। केही महिनाअघि सम्पन्न स्थानीय निर्वाचनमा भोगेको हारको चर्चा सेलाएकै थिएन। निर्वाचनको मैदानमा दुईवटा गठबन्धनका उम्मेदवारसँग प्रतिस्पर्धा गर्नुपर्ने बाध्यता आइहाल्यो। तर उनी मतदाता समक्ष आफ्ना कुरा लिएर पुगे। मतदाताको पनि विश्वास जिते।
दुवै गठबन्धनका उम्मेदवारलाई अविश्वास गर्दै मतदाताले सिंहको पोल्टामा २७ हजार ८१६ मत दिए। उनका निकटतम प्रतिस्पर्धी डिनाले २५ हजार ४ सय २३ मत पाइन्। सिंहले २३ सय ९३ मतान्तरले जित हात पारे। योसँगै निरन्तर चुनावी मैदानमा हुने तर पराजय भोग्ने आफ्नो पुरानो छवि पनि उनले मेटाएका छन्।
सिंहको राजनीतिक यात्रा २४ वर्षको उमेरदेखि नै सुरु भएको थियो। २४ वर्षको उमेरमा नेपाल राष्ट्रिय युवा संघका केन्द्रीय अध्यक्षबाट उनको राप्रपाको राजनीति सुरु भएको थियो।
२०५४ सालमा उनी हेटौंडा नगरपालिकाको मेयरमा उम्मेदवार बने। त्यतिबेला उनी डोरमणि पौडेलसँग पराजित भए। उनै पौडेल २०७४ मा बागमती प्रदेशको मुख्यमन्त्री बनेका थिए।
पौडेलसँग मेयरमा पराजित भए पनि उनी फेरि चुनावी मैदानमा उत्रे। २०५६ को प्रतिनिधि सभा निर्वाचनमा विरोध खतिवडासँग र २०६० को संविधान सभा निर्वाचनमा अनन्तप्रसाद पौडेलसँग पराजित भए।
२०७४ सालको प्रतिनिधि सभाको निर्वाचनमा सिंह प्रत्यक्षतर्फ उम्मेदवार भएनन्। समानुपातिकतर्फ बसे। त्यतिबेला राप्रपाले समानुपातिकका लागि ३ प्रतिशत मत कटाउन सकेन। उनी सांसद बन्न पाएनन्। यसरी पटकपटक सांसदमा पराजित भएका उनी वैशाखमा मेयरका लागि उम्मेदवार बनेर पराजित भए।
अन्तिम समयमा ‘सरप्राइज’ जित
मंसिर ४ मा भएको निर्वाचनमा सिंहको चर्चा कम मात्रै थियो। सबैको नजर एमालेबाट उम्मेदवार बनेका कमल थापा र सत्ता गठबन्धनबाट उम्मेदवार बनेका महालक्ष्मी उपाध्याय डिनामा थियो। मतगणनाको अन्तिम समयसम्मै थापा र डिनाबीच नै प्रतिस्पर्धा देखिएको थियो।
सिंहले वैशाखको स्थानीय निर्वाचनमा २० हजार ५ सय ३१ मत ल्याएका थिए। सो निर्वाचनमा एकिकृत समाजवादीकी मीनाकुमारी लामाले जित हात पारेकी थिइन्। सिंहले स्थानीय निर्वाचनमा पाएको मतमा ७ हजार २८५ मत बढाएको देखिन्छ।
मतगणनामा बिहीबार बिहानसम्मै सिंह पछि थिए। तर अन्तिम समयमा उनले अग्रता लिए। र जित सुनिश्चित गरे। यसरी उनको सांसद बन्ने उनको वर्षौंको सपना पूरा भयो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1734785000.jpg)
-1734781846.png)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
-1734781523.png)
