निर्वाचन विशेष

तनहुँ–२ : तीन दशकदेखिको एमालेको वर्चश्व ‘ब्रेक’ गर्ने शंकर

रिखिराम जिसी बुधबार, मंसिर ७, २०७९ १७:१२

पोखरा– नेपाली कांग्रेसको सरकार ढलेपछि, २०५१ साल असार २७ गते राजा वीरेन्द्रले प्रतिनिधि सभाको निर्वाचनको घोषणा गरे। उनले घोषणा गरेअनुसार कार्तिक २९ नेपालमा तेस्रो संसदीय निर्वाचन भयो।

उक्त निर्वाचनबाट नेकपा एमालेले ८८ सिट जित्दै सबैभन्दा ठूलो दल बन्न सफल भयो। पहिलो पटक नेपालमा कम्युनिस्ट पार्टी ठूलो दल बनेको थियो। निर्वाचनमा पहिलो पटक नेपाली कांग्रेस दोस्रो पार्टीका रुपमा खुम्चिन पुगेको थियो।

जसमा तत्कालीन तनहुँ–२बाट कांग्रेसका अमरराज कैनी विजयी भएका थिए। कांग्रेसले धेरै ठाउँमा पराजय भएको बेला सो ठाउँ विजय हासिल गरेको थियो। उनले नेकपा एमालेका टुकराज सिग्देललाई पराजित गरेका थिए।

त्यसयता भने नेपाली कांग्रेसले उक्त निर्वाचन क्षेत्रमा जित्न सकेको थिएन। ०७० सम्म तनहुँ–३ रहेको यस क्षेत्रमा ०५१ यता एमालेले निरन्तर जित्दै आएको थियो। यसपालि भने कांग्रेसका उम्मेदवार शंकर भण्डारीले एमालेको २८ वर्षको विजयी यात्रालाई बे्रक लगाउन सफल भएका छन्।

भण्डारीले एमालेका उम्मेदवार किरण गुरुङलाई पराजित गर्दै करिब ३ दशकको विजयी यात्रा ब्रेक गरेका हुन्। भण्डारीले ३० हजार ६ सय ४ मत र पराजित भएका गुरुङ २५ हजार १ सय ३० मत प्राप्त गरे।

अघिल्लो पटकको संसदीय निर्वाचनमा सोही क्षेत्रमा एमालेका केदार सिग्देलसँग पराजित भएका भण्डारीले यसपटक बदलसँगै वर्चश्व समेत ब्रेक गरे।

सो क्षेत्रमा ०४८ सालमा भएको निर्वाचनमा कांग्रेसबाट उम्मेदवार बनेका पदम आले पराजित भएका थिए। उनलाई एमालेका किरण गुरुङले १ हजार ६ सय ६२ मतले पराजित गरेका थिए। उक्त निर्वाचनमा कांग्रेस पहिलो पार्टी बन्दा पनि तनहुँ–२ गुमाएको थियो।

०५१ को निर्वाचनमा दोस्रो दल बनेको कांग्रेस २०५६ सालमा भएको निर्वाचनमा पहिलो दल बन्न सफल भयो। त्यसमा पनि तनहुँ–२ मा कांग्रेस उम्मेदवार पराजित भए। कांग्रेसका विष्णु बिरालेलाई एमालेका टुकराज सिग्देलले २ हजारभन्दा बढी मतान्तरले पराजित गरे।

सो क्षेत्रमा ०६४ भएको संविधान सभाको पहिलो निर्वाचनमा पनि पराजित हुँदै कांग्रेसले ह्याट्रिक हार व्यहोर्‍यो। त्यतिबेला एमालेका किरण गुरुङले कांग्रेसका उम्मेदवारलाई पराजित गर्दै प्रतिनिधि सभा सदस्य बने।

०७० सालमा भएका दोस्रो सविधान सभाको निर्वाचनमा सो क्षेत्रमा कांग्रेसका जित प्रकाश एमालेका उम्मेदवारसँग पराजित भए। उनलाई एमालेका टुकराज सिग्देलले १५ हजार ९ सय ७४ मत प्राप्त गर्दै पराजित गरे।

०७४ को निर्वाचनमा अहिले विजयी भएका शंकर भण्डारी पराजित भएका थिए। उनलाई एमालेका केदार सिग्देलले पराजित गरेका थिए। त्यसबेला केदारले ३ हजार २ सय ७९ मतान्तरले शंकरलाई पराजित गरेका थिए।

कांग्रेसका भण्डारीले यसपाली एमालेको २८ वर्षे विजयी यात्रालाई ब्रेक गराएका छन्। हाल भण्डारी नेपाल कांग्रेसको केन्द्रीय सदस्य छन्। विसं ०७०को संविधानसभा निर्वाचनमा तनहुँ–१ बाट निर्वाचित भण्डारीले वन तथा भू–संरक्षणमन्त्रीको जिम्मेवारी सम्हालिसकेका छन्।

उनी कांग्रेसको १३औं र १४औं महाधिवेशनबाट केन्द्रीय सदस्यमा निर्वाचित भएका हुन्। पार्टीको १२औं महाधिवेशनदेखि केन्द्रीय सदस्यमा निर्वाचित भण्डारीले दुईपटक तरुण विभागको जिम्मेवारी सम्हालिसकेका छन्।

दाइको प्रेरणाबाट विद्यार्थी राजनीति सुरु गरेका भण्डारी ०३६ र ०४६को आन्दोलनमा २९ दिन हिरासत बसेका थिए।

उक्त क्षेत्रको प्रदेश सभामा एउटामा एमाले र कांग्रेस विजयी भएका छन्। प्रदेश सभा २ ‘क’ मा एमालेका श्यामराजा महत र ‘ख’ मा कांग्रेसका जितप्रकाश आलेमगर विजयी भएका छन्।