पोखरा- निर्वाचन आयोगले मंसिर ४ गते भएको प्रदेश सभा तथा प्रतिनिधि सभा निर्वाचनको अन्तिम नतिजा ८ दिनभित्र अर्थात् मंसिर १२ गतेसम्म सार्वजनिक गर्ने दाबी गरेको छ। देशका धेरैजसो क्षेत्रमा अहिले मतगणना जारी छ। केही स्थानको अन्तिम नतिजा आइसकेको छ भने केही स्थानमा मतगणना सुरु हुनै बाँकी छ।
कास्कीका प्रतिनिधि सभा र प्रदेश सभाका ३÷३ क्षेत्रको मतगणना जारी छ। अहिलेकै गतिमा गणना हुने हो भने कास्कीमा निर्वाचन आयोगले तोकेको मितिमा मतगणना सकिन कठिन हुने देखिन्छ।
कास्कीको क्षेत्र नम्बर २ प्रतिनिधि सभा प्रत्यक्षतर्फ सबैभन्दा पहिले मतगणना सुरु भएको थियो। जहाँ मंसिर ४ गते राति १२ बजेबाट मत गणना सुरु भएको थियो। तर मतगणना सुरु भएको ४२ घन्टासम्म १५ हजार मतमात्र गणना भएको छ। मंगलबार साँझ ६ बजेसम्म १५ हजार ८१ मत गणना भएको तथ्यांक छ।
यसलाई हिसाब गर्ने हो भने १ घन्टामा करिब ३ सय ५९ मतगणना भएको देखिन्छ। कास्की २ मा मंसिर ४ को निर्वाचनमा ७९ हजार १ सय ३८ मत खसेको थियो। यस अनुसार नै गणना गर्ने हो भने अझै १ सय ७८ घन्टा अर्थात् ७ दिन ६ घन्टा लाग्नेछ। यसो त अन्य निर्वाचन क्षेत्रमा पनि मत गणना छरितो हुन सकेको छैन।
अहिलेको मतपत्र स्थानीय तह निर्वाचनभन्दा छरितो छ। उम्मेदवार नभएको पार्टीका चिह्न मतपत्रमा छैनन्। स्थानीय तहको निर्वाचनमा एउटा मतपत्रमा वडा सदस्यदेखि मेयर, उपमेयरसम्मको मत गणना गर्नुपर्थ्यो तर अहिलेको मतपत्रमा एउटामात्र छाप लगाउने अवस्था छ। त्यस कारण पनि मत गणना गर्न सहज हुन्छ। तर पनि मत गणनामा छरितो हुन सकेको छैन।
कास्कीका मुख्य निर्वाचन अधिकृत प्रकाश खरेलले सबै प्रकारका मत एकै पटक गणना गर्दा गणना ढिलाइ भएको तर्क गरे। ‘४ वटा मतपत्रसँगै गणना गर्नपर्यो। हामीले के अनुमान गरेका थियौं भने प्रत्यक्षको सानो मतपत्र छ, छिट्टै गन्छौं, प्रत्यक्ष सकेर समानुपातिक गर्ने योजना थियो। तर सँगै गन्ने भएपछि प्रत्यक्षको छिटो सकिए पनि समानुपातिकलाई पर्खनुपर्यो,’ उनले भने।
फरक ब्यालेट बक्समा मतपत्रको भेटिँदा पनि मत गणनामा ढिलाइ भएको उनको भनाइ छ। ‘यताको मतपत्र उता छ, उताको मतपत्र यता छ। सबैलाई सदर गर्नका लागि सँगै नगनी नहुने परिस्थिति भयो,’ खरेलले भने।
सबै मतपत्रको अभिलेख राख्नुपर्ने खरेलले बताए। ‘कहिले समानुपातिकको मतपत्र प्रत्यक्षमा भइदिन्छ, कहिले प्रदेश सभाको समानुपातिकको प्रतिनिधि सभाको समानुपातिकतिर भइदिन्छ। त्यसको सबै अभिलेख राख्नुपर्यो,’ उनले भने, ‘एकापसमा परिवर्तन गर्नुपर्यो।’
प्रतिनिधि सभाको प्रत्यक्ष, समानुपातिक, प्रदेश सभाको प्रत्यक्ष र समानुपातिक ४ वटैको समानान्तर रुपमा गणना भइरहेको खरेल जानकारी दिए। प्रदेश सभा प्रत्यक्षतर्फको मत गणना बुधबारसम्म सक्ने लक्ष्य रहेको खरेलले सुनाए। ६ दिनभित्र कास्कीका सबै क्षेत्रको नतिजा आइसक्ने उनले दाबी गरे। ‘मत गणनाले विस्तारै गति लिन्छ, ६ दिनभित्र कास्कीका सबै क्षेत्रको नतिजा आइ सक्छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
