निर्वाचन विशेष

गण्डकीमा मतदानः कतै हवाई फायर त, कतै मतपेटिकामा आगलागी

रिखिराम जिसी आइतबार, मंसिर ४, २०७९ २३:०७

फाइल तस्बिर

पोखरा– प्रदेश सभा तथा प्रतिनिधि सभा सदस्यका लागि आइतबार मतदानका क्रममा गण्डकी प्रदेशको एक क्षेत्रमा मतपेटिकामा आगलागी हुँदा सोमबार पुनः मतदान हुने भएको छ।

नवलपुरको देवचुली नगरपालिका–४ स्थित केन्द्रमा मतपेटिकामा मतदानका क्रममा आगो लगाइएपछि प्रदेश समानुपातिकतर्फको मतदान स्थगित भएको थियो। शान्ति सिर्जना आधारभूत विद्यालयको बूथमा प्रदेश सभा समानुपातिकतर्फको मतपेटिकामा स्थानीय नारायण भण्डारीले आइतबार दिउँसो एसिड हालेर आगो लगाएका थिए। रोकिएको मतदान सकिएको र प्रदेश समानुपातिकतर्फ सोमबार बिहान ७ बजेदेखि पुनः मतदान हुनेछ।

कास्कीको माछापुच्छ्रे गाउँपालिकामा नेकपा बहुमतका एक कार्यकर्ताले मतपेटिका फुटाएका थिए। वडा नम्बर ८ तारेबराह आधारभूत विद्यालय लुम्रे मतदान स्थलमा सूर्य परियारले मतपेटिका फुटाएपछि केहीबेर मतदान रोकियो। मतपेटिका फुटाएका परियारलाई प्रहरीले नियन्त्रण लिएपछि केही समयपछि मतदान सुरु भयो।

बागलुङको जैमिनी नगरपालिका ४ स्थित जनता मावि मतदानस्थलमा मतदान अधिकृतको हस्ताक्षर नभएको मतपत्र भेटिएपछि केही समय मतदान रोकियो। स्थगित भएको मतदान सर्वदलीय बैठकपछि सञ्चालन भएको थियो।

यस्तै स्याङ्जाको चापाकोट नगरपालिका १ स्थित आधिचौघेरास्थित भानु मावि मतदानस्थलमा हवाई फायर भयो। मतदानको विषयलाई लिएर एमाले र कांग्रेसका कार्यकर्ताबीच झडप हुँदा स्थिति नियन्त्रण लिन हवाई फायर भएको थियो। पछि स्थिति सामान्य भएपछि पुनः मतदान सुचारु भएको थियो।

गोरखामा ५० प्रतिशत मात्र मत खसेको छ। माओवादी केन्द्रका अध्यक्ष पुष्पकमल दाहाल उम्मेदवार बनेको गोरखामा करिव ४५ देखि ५० प्रतिशत मत खसेको अनुमान गरिएको मुख्य निर्वाचन अधिकृत तेजेन्द्रप्रसाद शर्माले बताए। ‘करिब ४५ देखि ५० प्रतिशत मत खस्यो भन्ने हाम्रो आकलन हो। मतपेटिकाहरु संकलन गरेर मतगणना स्थलमा ल्याउने तयारी भइरहेको छ,’ उनले भने। गोरखामा कूल २ लाख २० हजार ६ सय ३७ मतदाता कायम भएका थिए।

नेपाली कांग्रेस र माओवादी केन्द्रले कास्कीको रुपा गाउँपालिका ७ को इन्द्रेणी आधारभूत विद्यालयको मतदान स्थलमा पुनः मतदानको माग गरेका छन्। कांग्रेसका वडा सभापति अर्जुनकुमार श्रेष्ठ र माओवादी केन्द्रका वडा अध्यक्ष माधव पौडेलले निर्वाचन कार्यालयलाई पत्र लेखेर पुन: मतदानको माग गरेका हुन्।

उनले पत्रमा लेखेका छन्, ‘सवारी चालक अनुमति पत्र, जग्गाधनी लालपुर्जा र नागरिकता प्रमाण पत्रको प्रतिलिपिका आधारमा यस निर्वाचन केन्द्रका मतदान अधिकृत बन्धुराज रेग्मी र मदनबहादुर केसीसँग मतदानका विषयमा आवश्यक छलफलका नगरी पार्टी प्रतिनिधिहरुलाई बेवास्ता गरी जनताको मतदान गर्न पाउने अधिकारलाई कुण्ठित गर्न खोजेको छ।’