काठमाडौं- नेपाल प्रहरीले मंसिर ४ गते हुने प्रतिनिधि सभा र प्रदेश सभा निर्वाचनका लागि सुरक्षाको खाका तयार पारेको छ। आफू मातहत रहेका प्रहरी र म्यादी प्रहरीलाई कसरी परिचालन गर्ने भन्नेबारे प्रहरी हेडक्वाटरले खाका तयार पारेको हो।
प्रहरी हेडक्वाटरको कार्य विभागको केन्द्रीय निर्वाचन सेलले प्रहरी र म्यादी प्रहरी खटाउने खाका तयार पारिसकेको छ। जसअनुसार निर्वाचन क्षेत्रलाई सामान्य, संवेदनशील र अतिसंवेदनशील गरी वर्गीकरण गरिएको छ। सोही अुनसार प्रहरी र म्यादी प्रहरी खटाउने संख्या समेत निर्धारण गरिएको नेपाल प्रहरीका केन्द्रीय प्रवक्ता तथा डीआईजी टेकप्रसाद राईले जानकारी दिए।
निर्वाचनस्थलको संवेदनशीलताका आधारमा ८ देखि १२ जनासम्म प्रहरी र म्यादी खटाउने गरी खाका तयार पारिएको छ। जसअनुसार सामान्यमा ८ सुरक्षाकर्मी (प्रहरी ३ र म्यादी ५ ) खटाइनेछ। संवेदनशीलमा ९ (प्रहरी ३, म्यादी ६) र अतिसंवेदनशीलमा १२ (प्रहरी ३, म्यादी ९) सुरक्षाकर्मी खटाउने गरी तयारी गरिएको छ।
१० हजार ८९२ मतदान केन्द्रमध्ये ३ हजार ४१२ मतदान केन्द्र अतिसंवेदनशीलको सूचीमा प्रहरीले राखेको छ। यी मतदान केन्द्रमा म्यादी र प्रहरी गरी १२ सुरक्षाकर्मी खटिनेछन्। यसका साथै सशस्त्र प्रहरी र नेपाल आर्मीले बाहिरी घेरामा रहेर सुरक्षा प्रदान गर्नेछन्।
त्यसैगरी ४ हजार ४२० मतदान केन्द्र संवेदनशीलको सूचीमा छन्। यी मतदान केन्द्रहरुमा प्रहरी र म्यादी गरी ९ सुरक्षाकर्मी खटिनेछन्। सुरक्षाका दृष्टिले सामान्य देखिएका ३ हजार ६० मतदान केन्द्रमा प्रहरी र म्यादी गरी ८ जना सुरक्षाकर्मी खटाउने गरी तयारी गरिएको प्रवक्ता राईले बताए। यसका अलवा आवश्यकता अनुसार सबै मतदान केन्द्रहरुमा सशस्त्र र नेपाल आर्मीले सुरक्षा प्रदान गर्नेछन्।
प्रहरीले यस पटकको चुनावमा अघिल्ला चुनावहरुमा जस्तो सशस्त्र गतिविधि गर्दै आएका समूहहरुबाट भन्दा पनि मुख्य राजनीतिक दलहरुबाट सुरक्षा चुनौती हुनसक्ने विश्लेषण गरेको छ।
मुख्य पार्टीहरुबाट चुनाव बिथोल्ने प्रयास नभए पनि आफू अनकुल नहुँदा विभिन्न हर्कत हुनसक्ने औंल्याइएको छ।
सत्ता गठबन्धन दल तथा प्रमुख प्रतिपक्षी एमालेसँग गठजोड गरेका दलहरुबाट मतदानस्थल तथा बुथ कब्जा, मतपेटिका लुटपाट, मतपत्र च्यात्ने, मतदान कार्य तथा मतगणना बिथोल्ने विभिन्न अफवाह तथा दुस्प्रचार गरी मनोवैज्ञानिक त्रास फैलाउन सक्ने हर्कतहरु हुनेसक्ने विश्लेषण गर्दै सोही अनुसार सुरक्षा रणनीति तयार पारिएको प्रवक्ता राईले बताए।
मुख्य प्रतिस्पर्धी दलहरुबाट विपक्षी तथा मतदाताहरुलाई बाटो छेक्ने, धम्क्याउने र आचारसंहिताको उल्लंघनसम्मका घटना हुनसक्ने औंल्याइएको छ।
अर्कोतर्फ प्रदेश २ मा अराजक गतिविधि गर्दै आएको सिके राउत नेतृत्वको जनमत पार्टीले पनि आफू अनुकुल माहोल बनाउन अराजक गतिविधि गर्नसक्नेसम्मको विश्लेषण प्रहरीले गरेर सुरक्षा रणनीति तयार पारेको छ।
त्यसैगरी भौगोलिक विकटता, सञ्चारको अभावजस्ता कारणले पनि सुरक्षामा केही समस्या हुनसक्ने उल्लेख गरिएको छ। सोही अनुसार अन्तरपार्टी विवाद तथा झडप, भौगोलिक विकटता, उम्मेदवारहरुको पृष्ठभूमि लगायतलाई आधार मानेर मतदान केन्द्रको वर्गीकरण गरिएको छ।
निर्वाचनको अवधिमा भीआईपी, कारागार, विमानस्थल लगायतको सुरक्षामा सशस्त्र र नेपाल आर्मीलाई खटाएर नेपाल प्रहरीका जतिशक्दो धेरै जनशक्ति निर्वाचनमा खटाउने गरी तयारी अघि बढाइएको छ। यसअघिका निर्वाचनहरुमा समेत कारागार लगायतको सुरक्षामा आर्मी खटाइँदै आएकोमा यो पटक पनि त्यसलाई निरन्तरता दिन लागिएको छ।
सुरक्षाका हिसाबले संवेदनशील र अतिसंवेनशील रहेका तराईका जिल्लाहरुमा बढी म्यादी प्रहरी खटाउने गरी तयारी भएको छ। मोरङ, धनुषा, झापा, सर्लाही, सप्तरी लागयतका जिल्लाहरुमा धेरै मतदान केन्द्र रहेकोले अतिसंवेदनशीलको वर्गीकरणमा परेका यी जिल्लामा धेरै म्यादी प्रहरी खटाइने प्रवक्ता राईले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
