काठमाडौं– बुलेटसँगै बिताएका अवकाशप्राप्त केही पूर्वसुरक्षाकर्मीहरू ब्यालेट (मदतान) बाट निर्वाचित हुँदै पुनः सक्रिय राजनीति जीवन बिताउने दाउमा छन्।
३० वर्षे प्रहरी सेवाबाट अनिवार्य अवकाश बिताएपछिको समय पुनः राजनीतिमा होमिने सुरक्षाकर्मीहरूको सूची लामै भए पनि यो पटकको प्रतिनिधि सभामा आधा दर्जन सुरक्षाकर्मी होमिएका छन्। उनीहरूलाई अहिले चुनावी चटारोले छोइरहेको छ। आ–आफ्नो निर्वाचन क्षेत्रमा खटिएर ब्यालेटमार्फत् चुनिएर संसद्को यात्रा तय गर्ने दाउमा तीन वटै सुरक्षा निकायका पूर्वसुरक्षाकर्मीहरू छन्।
पूर्वडीआईजी नवराज सिलवाल
पूर्वडीआइजी नवराज सिलवाल पुनः दोस्रो पटक निर्वाचित हुँदै संसद्को यात्रालाई कायमै राख्ने दाउमा छन्। आईजीपी बन्न नसकेपछि डीआईजीबाटै राजीनामा दिएर राजनीति सुरु गरेका सिलवाल २०७४ सालको निर्वाचनमै विजयी भएका थिए।
लतिलपुर–१ बाट नेकपा एमालेको तर्फबाट निर्वाचन लडेका सिलवालले पहिलो पटकमै सफलता हात पारेका थिए। यो वर्ष पनि उनी सोही ठाउँबाट एमालेकै तर्फबाट प्रतिनिधि सभा सदस्यका लागि उम्मेदवार छन्।
यस क्षेत्रबाट यो पटक गठबन्धन दल नेपाली कांग्रेसको तर्फबाट उदय शमशेर राणाले उम्मेदवारी दिएका छन्। यी दुवै जना २०७४ सालको निर्वाचनमा पनि प्रतिस्पर्धामा उत्रिएका थिए।
त्यतिबेला सिलवाल २६ हजार ९५१ मत ल्याएर विजयी भएका थिए। राणाले २० हजार ७२९ मत मात्र पाएका थिए। यसपटक नेकपा माओवादी र एकीकृत समाजवादीको साथ राणाले पाएका छन्। सत्ता गठबन्धनको साथ पाएकाले राणा पाँच वर्षअघिको नतिजा उल्ट्याउने दाउमा छन्।
पूर्वआईजी सर्वेन्द्र खनाल
काठमाडौं–६ बाट पूर्वआईजी सर्वेन्द्र खनालले उम्मेदवारी दिएका छन्। टिकट पाउने निश्चित भएपछि केही समयअघि मात्रै एमालेमा प्रवेश गरेका खनालका प्रतिस्पर्धी कांग्रेसका भीमसेनदास प्रधान छन्।
भर्खर राजनीति सुरु गरेका खनाललाई खारिएका कांग्रेसका नेता प्रधान बलियो प्रतिस्पर्धी हुन्। त्यसमाथि प्रधानलाई माओवादी केन्द्र र एकीकृत समाजवादीको समेत साथ रहेकाले प्रधान खनालका लागि भारी पर्ने देखिन्छ।
पूर्वडीआईजी रमेश खरेल
सुशासन पार्टी नेपालका अध्यक्ष समेत रहेका पूर्वडीआईजी रमेश खरेल पनि चुनावी मैदानमा उत्रिएका छन्। काठमाडौं–१ बाट प्रतिनिधि सभा उम्मेदवार बनेका खरेलका प्रतिस्पर्धीहरू कांग्रेस नेता प्रकाशमान सिंहदेखि राप्रपा नेता रवीन्द्र मिश्रसम्म छन्। जसकारण खरेललाई यो क्षेत्रबाट चुनाव जित्न निकै गाह्रो पर्ने देखिन्छ।
काठमाडौं–१ मा २०७४ सालको निर्वाचनमा नेपाली कांग्रेसका नेता प्रकाशमान सिंहलाई विवेकशील साझा पार्टीबाट उम्मेदवारी दिएका रवीन्द्र मिश्रले कडा टक्कर दिएका थिए। यसपटक फेरि सिंह र मिश्र आमुन्ने–सामुन्ने भएका छन्। उनीहरूसँगै पुकार बमले पनि उक्त क्षेत्रमा स्वतन्त्र उम्मेदवारी दिएका छन्।
पूर्वआईजी ध्रुबबहादुर प्रधान
पूर्वआईजी ध्रुबबहादुर प्रधानले राप्रपाको तर्फबाट नवलपरासी पश्चिम बाट प्रतिनिधि सभाको उम्मेदवारी दर्ता गराएका छन्। उक्त क्षेत्रमा कांग्रेसबाट देवेन्द्रराज कँडेल तथा एमालेबाट दीपेन्द्र अधिकारीले पनि उम्मेदवारी दिएका छन्। जसकारण पूर्वआईजी प्रधानको संसद् छिर्ने यात्रा भने त्यति सहज देखिँदैन।
अदालतको आदेशपछि आईजीपीबाट हटेपछि प्रधान प्रधानमन्त्रीको सुरक्षा सल्लाहकार बनेका थिए। सल्लाहकारबाट राजीनामा दिएर उनी २०५६ को आम निर्वाचनमै होमिए। नवलपरासी–४ बाट चुनाव लडेका उनले हार बेहोरे। २०६४ र २०७० पनि सोही ठाउँबाट चुनाव लडेका उनी विजयी हुन सकेनन्।
प्रत्यक्ष निर्वाचनमा पटक–पटक हार बेहोरेका उनी गत चुनावको बेला राप्रपाको समानुपातिक सूचीमा बसे। तर, ३ प्रतिशत थ्रेसहोल्डका कारण सांसद बन्ने उनको सपना पूरा हुन सकेन।
पटक–पटक असफलता ब्यहोरेका पूर्वआईजी प्रधान संसद् छिर्ने सपनासहित यो पटक फेरि राप्रपाबाट उम्मेदवारी दिएका छन्।
पूर्वएआईजी ठाकुरमोहन श्रेष्ठ
सशस्त्र प्रहरीका पूर्वएआईजी ठाकुरमोहन श्रेष्ठले पनि योटक प्रतिनिधि सभामा उम्मेदवारी दिएका छन्। काठमाडौं– ४ मा राप्रपाको तर्फबाट श्रेष्ठले उम्मेदवारी दर्ता गराएका छन्। संसद् छिर्ने पूर्वएआईजी श्रेष्ठको सपना पूरा हुन सम्भावना निकै कम देखिन्छ।
यही क्षेत्रबाट कांग्रेसका महामन्त्री गगनकुमार थापा र एमालेका नेता राजन भट्टराई समेतले उम्मेदवारी दिएका छन्।
पूर्वसैनिक अधिकृत प्रणय शमशेर राणा
काठमाडौं–५ बाट पूर्वसैनिक अधिकृत डा प्रणय शमशेर राणाले उम्मेदवारी दिएका छन्। राष्ट्रिय स्वतन्त्र पार्टीको तर्फबाट उनी उम्मेदवार बनेका हुन्।
यही क्षेत्रबाट नेपाली कांग्रेसबाट प्रदीप पौडेल र एमालेबाट ईश्वर पोखरेलले पनि उम्मेदवारी दिएका छन्।
पूर्वसई शम्भू ढकाल (सुस्केरा)
रवि लामिछाने नेतृत्वको राष्ट्रिय स्वतन्त्र पार्टीको तर्फबाटमै पूर्वसई शम्भू ढकाल (सुस्केरा) प्रतिनिधि सभा उम्मेदवार बनेका छन्। झापा–४ बाट उनले उम्मेदवारी दिएका छन्।
सईबाट अवकाश पाएका उनी साहित्यक क्षेत्रमा कलम चलाउँदै आएका थिए। उनीसँगै यो क्षेत्रमा एमालेको तर्फबाट लालप्रसाद साँवा लिम्बू, कांग्रेसबाट देउकुमार थेवेले उम्मेवारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
