काठमाडौं– प्रधानमन्त्री केपी शर्मा ओलीले चिनियाँ राष्ट्रपति सि जिन पिङलाई नेपाल भ्रमणको निम्तो दिएका छन्। आइतबार बालुवाटारमा चीनका उपविदेशमन्त्री वाङ वाजुनसँग भएको भेटमा प्रधानमन्त्री ओलीले राष्ट्रपति पिङलाई नेपालमा स्वागत गर्न आतुर रहेको बताएका छन्।
यस्तै, प्रधानमन्त्री ओलीले नेपाली भूमि चीनविरुद्ध प्रयोग हुन नदिने पनि बताएका छन्।
चिनियाँ मन्त्रीसँगको भेटमा प्रधानमन्त्रीले भने, ‘हामी एक चीन नीतिको पक्षमा छौं। यो हाम्रो स्थायी नीति हो। यस नीतिलाई हामी आघात पर्न दिदैनौं।’
प्रधानमन्त्री ओलीले आफ्नो अघिल्लो कार्यकालमा चीनसँग भएको ट्रान्सपोर्ट र ट्रान्जिट सन्धिलाई चाँडै कार्यन्वयनमा लैजाने पक्षमा रहेको बताएका थिए्। ‘सन् २०१६ को मार्चमा चीनसँग गरिएको सन्धिलाई हामी छिटै निष्कर्षमा पुर्याउँदैछौं, चिनियाँ उपविदेशमन्त्री वाजुनसँग प्रधानमन्त्री ओलीले भने, ‘हामी भूपरिवेष्टित देश भएकाले यो सन्धि मार्फत समुद्रसम्म आफ्नो पहुँच बढाउन चाहन्छौं।’
उपविदेशमन्त्री वाजुनले नेपाल–चीन सम्बन्ध विस्तारका लागि अहिले एकदमै उपयुक्त समय भएको बताएका थिए। गत महिना प्रधानमन्त्री ओलीको चीन भ्रमणका बेला नेपालको विकास र नेपाल–चीन सम्बन्धका विविध आयाममा सहमति भएकाले त्यसलाई कार्यान्वयन गर्नका लागि चीन तयार रहेको बताए।
उनले भने, ‘सरकार–सरकारबीच र जनस्तरबाट पनि नेपाल र चीनबीचको सम्बन्ध समुधुर बनाएर दुई देशको हितमा उपयोग गर्नुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
