राजविराज– प्रदेश २ का सामाजिक विकासमन्त्री नवलकिशोर साह (रामबाबु) ले संघीय सरकार प्रदेश सरकारलाई ‘कुपोषित बालक’ बनाएर ५ वर्षभित्र पूर्ण रुपमा मृत घोषणा गर्ने षड्यन्त्रमा लागेको आरोप लगाएका छन्।
संविधानमा ३ तहका सरकारबीच समन्वयको व्यवस्था रहे पनि प्रदेश सरकारलाई भूमिका विहीन बनाएर प्रदेशको संरचना नै औचित्यहीन पुष्टि गर्ने षड्यन्त्र भइरहेको उनको आरोप छ।
विश्वकप फुटबल प्रतियोगितालाई लक्षित गरी स्थानीय नटखट दैनिक पत्रिकाले सञ्चालन गरेको प्रतियोगिताको पुरस्कार वितरण समारोहमा मन्त्री साहले प्रदेश सरकारलाई भूमिका विहीन बनाउने योजनाबाट केन्द्र सरकार पछि नहटे प्रदेशको समृद्धिका लागि सरकारले आफ्नो बाटो आफैं बनाउने चेतावनी दिए।
‘विकाश, निर्माण र समृद्धिसँग जोडिएका अधिकांश संरचना स्थानीय तहमा र त्यसबाहेकका केन्द्र सरकारको मातहतमा छन्,’ साहले भने, ‘कुनै पनि निकायको परिचालन, अनुगमन र नियन्त्रण गर्ने अधिकार नै नभएपछि प्रदेश सरकारको भूमिका के हुन्छ?’
शिक्षा, स्वास्थ्य लगायतका निकाय स्थानीय तह मार्फत् व्यवस्थापन हुनै नसक्ने बताएका साहले जनतासँग प्रत्यक्ष जोडिएका त्यस्ता निकायबाट प्रदेश सरकारलाई अलग्याइएको गुनासो गरे। केही समयअघि सातवटै प्रदेशका सामाजिक विकासमन्त्रीले यसबारे केन्द्रमा गुनासोसमेत गरेको उनको भनाइ छ।
‘केन्द्र सरकारमा रहेका नेताजस्तै हामी पनि जनताकै मतबाट जितेर जिम्मेवारीमा आएका हौं,’ उनले भने, ‘जनमतको यसरी अपमान गर्न त मिलेन नि।’
मन्त्री साहले केन्द्रको षड्यन्त्र जारी रहे १–२ साताभित्रै छुट्टै प्रादेशिक र जिल्ला खेलकुद विकास समिति निर्माण गरी अघि बढ्ने चेतावनी पनि दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
