काठमाडौं- नेपाली कांग्रेसले सरकार र डा गोविन्द केसीबीच भएको सहमति अक्षरशः पालना हुनुपर्ने बताएको छ। डा केसीसँग भएको सहमति र पार्टीका आन्दोलनका विषयमा जानकारी दिन आयोजित पत्रकार सम्मेलनमा प्रवक्ता विश्वप्रकाश शर्माले सरकारले सहमतीलाई इमान्दार ढंगले कार्यान्वयन गर्नुपर्ने बताए।
पार्टी केन्द्रीय कार्यालयमा आयोजित कार्यक्रममा शर्माले सरकारलाई दम्भको ठाउँमा विवेक प्रयोग गर्न सुझाव दिए। माथेमा कार्यदलको निष्कर्ष र अध्यादेशको मूल मर्मविपरीत वर्तमान सरकारले संसद्मा विधेयक ल्याएका कारण नै बितेको एक महिनाभरि मुलुकमा द्वन्द्व चर्किएको शर्माले बताए। 'विगत एक महिना सरकार व्याक गियरमा चल्यो,’ उनले भने।
नेपाली कांग्रेसको नेतृत्वको सरकारले जारी गरेको अध्यादेश नै विद्यमान समस्याको हलको कारण भएको कांग्रेसले दाबी गरेको छ।
सभामुख र उपसभामुखको मुद्दा चर्काउने
कांग्रेसले संविधानमा भएको व्यवस्था सरकारी पक्षले कुल्चेको जनाएको छ। सभामुख र उपसभामुख फरक दलको हुने संविधानमा व्यवस्था गरिएको छ। सोही अनुरुप संविधानको धारा ९१ को उपधारा २ को कार्यान्वयन गर्न शर्माले माग गरे।
कांग्रेसले निषेधाज्ञा, चर्को मूल्य वृद्धि, उपकुलपतिप्रति अपमानजनक व्यवहार लगायतका मुद्दामा भने आन्दोलन जारी राख्ने जनाएको छ। तिनै मुद्दामा केन्द्रित रहेर साउन १५ मा ७७ जिल्ला सदरमुकाममा हुने एकदिने विरोध प्रदर्शनको कार्यक्रम प्रभावकारी बनाउने प्रवक्ता शर्माले बताए।
पार्टीभित्रको आन्तरिक विषयमा थोरै बोलेका शर्माले महासमिति बैठक निर्धारित मिति भदौमै हुने दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
