काठमाडौं– सुनसरी क्षेत्र नम्बर ४ बाट प्रतिनिधि सभामा नेपाली कांग्रेसबाट ज्ञानेन्द्रबहादुर कार्की सिफारिस भएका छन्। नेपाली कांग्रेस सुनसरी क्षेत्र नम्बर ४ को क्षेत्रीय कार्यसमितिको आइतबार बसेको बैठकले सञ्चार तथा सूचना प्रविधि मन्त्री समेत रहेका कार्कीलाई प्रतिनिधि सभाको उम्मेदवारका लागि सिफारिस गर्ने सर्वसम्मत निर्णय गरेको हो।
२०७४ सालको प्रतिनिधि सभा निर्वाचनमा नेकपा एमाले र माओवादी केन्द्रको तत्कालीन वाम गठबन्धनका साझा उम्मेदवारलाई पराजित गर्दै कार्की उक्त क्षेत्रबाट प्रतिनिधि सभा सदस्य निर्वाचित भएका थिए। कांग्रेसका तर्फबाट उनले ३२ हजार ३४७ मत प्राप्त गरेका थिए। वाम गठबन्धनबाट उनका प्रतिद्वन्द्वी नेकपा एमालेका रमेश श्रेष्ठले जम्मा २५ हजार ७५० मत प्राप्त गरेका थिए।
पार्टीको क्षेत्रीय कार्यसमितिबाट उम्मेदवारका लागि सिफारिस भएका कार्की आगामी निर्वाचनमा सुनसरी ४ बाट उम्मेदवार बन्ने लगभग पक्कापक्कीजस्तै छ। प्रधानमन्त्री तथा पार्टी सभापति शेरबहादुर देउवाका ‘विश्वासपात्र’ मानिने कार्कीलाई गठबन्धनका अन्य दलले पनि सुनसरी ४ को उम्मेदवार बन्न ‘चुनौती’ दिने सम्भावना छैन।
सिट संख्या र निर्वाचन क्षेत्रको भागबण्डाका विषयमा गठबन्धनका दलहरु ‘सहमति’ जुटाउने प्रयास गरिरहेका छन्। तर, कार्की भने सुनसरी ४ बाट उम्मेदवार हुने सन्दर्भमा ढुक्क जस्तै छन्।
कार्की उम्मेदवार हुने मात्र होइन, सुनसरी ४ बाट विजयी हुनेमा पनि ढुक्क छन्। त्यसको कारण हो, स्थानीय तहको निर्वाचनमा उक्त क्षेत्रअन्तर्गत पर्ने पालिकाअन्तर्गत वडामा पार्टी (नेपाली कांग्रेस)ले प्राप्त गरेको मत।
उक्त क्षेत्रमा रामधुनी नगरपालिकाको ४, बराह क्षेत्र नगरपालिकाका ६, ७, ८, ९, १० र ११ नम्बर वडा, इनरुवा नगरपालिकाका ३, ४ र ८ नम्बर वडाका साथै कोशी, भोक्राह नरसिंह र हरिनगर गाउँपालिका पर्दछन्।
गत वैशाख ३० मा सम्पन्न स्थानीय तहको निर्वाचनमा वडाध्यक्षका उम्मेदवारहरुले प्राप्त गरेको मतअनुसार सुनसरी ४ मा कांग्रेस पहिलो पार्टी छ। कांग्रेसका वडाध्यक्षका उम्मेदवारले २९ हजार ८१९ ल्याएका छन् भने दोस्रो एमालेको २० हजार ९४० मत मात्रै छ। यसरी हेर्दा कांग्रेस एक्लै एमालेमाथि ‘भारी’ देखिन्छ।
सत्ता गठबन्धनमा रहेका जनता समाजवादी, एकीकृत समाजवादी र माओवादी केन्द्रको मत समेत राम्रै छ। जसपा ८ हजार ४०५, एकीकृत समाजवादी ४ हजार २४९ र माओवादी केन्द्रको ३ हजार ९२५ मत रहेको छ। यो समेत जोड्दा गठबन्धनको मत एमालेको भन्दा झन्डै दोब्बर अर्थात् ३८ हजार ८३८ पुग्छ।
कार्की आफू जित्नेमा ढुक्क हुनुको अर्को कारण हो– उक्त क्षेत्रमा प्रतिस्पर्धी दल एमालेका कुनै प्रभावशाली उम्मेदवार नहुनु। वामपन्थी मत एकजुट हुँदा पनि ६ हजार बढीको मतान्तरले जित हासिल गरेका कार्की यसपटक दुई कम्युनिस्ट पार्टी माओवादी केन्द्र र एकीकृत समाजवादीको मत पनि जोडेर फराकिलो जित हासिल गर्ने तयारीमा छन्।
क्षेत्रीय समितिबाट एकल रुपमा उम्मेदवार सिफारिस भएका कार्कीले पार्टीबाट ‘अहसयोग’ (अन्तर्घात) बेहोर्ने सम्भावना पनि कम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
