काठमाडाैं-जब जोनी बेयरस्टोको ब्याटको बाहिरी किनारामा लाग्दै बल मिडविकेटमा रहेका डेभिड मिलरको हातमा पुग्यो, तब इङ्ग्ल्यान्डको टोलीले टी-२० आईमा सबैभन्दा ठूलो पराजय भोगिसकेको थियो। उनी आउट हुनुअघि नै द एजस बाउल मैदानमा उपस्थित आधा दर्शक बाहिरिइसकेका थिए।
घरेलु समर्थकहरूले पहिले नै जित्ने आशा त्यागिसकेका थिए। त्यसैले होला इङ्गल्यान्डको लज्जास्पद हारभन्दा अघि घर गएर टीभीमा महिला युरो फुटबल २०२२ फाइनल हेर्न राम्रो ठाने। घरेलु मैदानमा आयोजना भएको टी–२० आई सिरिजमा यति फराकिलो हार व्यहोर्नु इङ्ग्ल्यान्डका लागि पक्कै पनि राम्रो संकेत होइन।
बेयरस्टोको ब्याटले यो वर्ष धेरै पटक शतक प्रहार गरेको छ। तर, यसपटक भने उनको ब्याट चल्न सकेन। उनले २९ बलमा २ चौकासहित २७ रनको अनौठो इनिङ्स खेले। अर्को छेउमा भने निरन्तर विकेट झर्न थाल्यो।
इङ्ग्ल्यान्डको इनिङ्सका क्रममा धेरै समर्थकले ‘बू...’ आवाज निकालेर आफ्नो असन्तुष्टि व्यक्त गरेका थिए। कप्तान बटलरले खेलपछि भने, ‘हामीले धेरै समयपछि यो कुरा सुन्नु परेको छ। हामीले यति लामो समयसम्म समर्थकहरूलाई मनोरञ्जन दिएका छौं। आज यो देख्दा दुःख लाग्छ।’
ओएन मोर्गनले कप्तानीबाट राजीनामा दिएपछि इङ्गल्यान्डले एकदिवसीय र टी–२० आई क्रिकेटमा ४ खेल जितेको छ भने ९ मा हार व्यहोरेको छ। यता, इङ्ग्ल्यान्डले सन् २०१३ पछि पहिलो पटक घरेलु मैदानमा सीमित ओभरको सिरिज गुमाएको छ।
जुन २०१८ र जुलाई २०२१ बीच खेलेका १३ द्विपक्षीय सिरिजमध्ये १० इङ्ल्यान्डले जितेको थियो। तर, गत विश्वकपमा शारजाहमा श्रीलंकालाई हराएपछि इङ्ल्यान्डले तीन वटै सिरिज गुमाएको छ।
अहिले इङ्ग्ल्यान्डको लय हेर्दा अस्ट्रेलियामा हुने विश्वकप जित्ने उसको सम्भावना न्यून छ। यो सिजन असफल हुनुको प्रमुख कारण इङ्ग्ल्यान्डको ब्याटिङमा देखिएको समस्या पनि एक हो। जेसन रोय लामो समयदेखि लयमा छैनन्। यता, बटलर र लियाम लिभिङ्स्टनले पनि यो सिजन जम्मा १०० रन पनि बनाउन सकेका छैनन्। सबै खेलमा मोइन अली, बेयरस्टो र डेभिड मलान मात्रै हाबी भइरहेका छन्।
बटलरले भने, ‘हामीले ब्याटिङमा प्रभुत्व जमाउन सकेका छैनौं, विपक्षी टोलीलाई कहिल्यै दबाब दिन सकेका छैनौं। म यो हतारोपनबाट सबैभन्दा असन्तुष्ट छु। एक टोलीको रूपमा हामी निडर छौं र जोखिम लिन्छौं। तर, हामीले ब्याट चलाउन सकेका छैनौं। सायद हामीमा आत्मविश्वासको कमी छ।’
इङ्ग्ल्यान्डलाई बलिङले पनि निराश बनाएको छ। साउथह्याम्प्टनमा दक्षिण अफ्रिकाले ५ विकेट गुमाउँदै १९१ रन बनाएको थियो। यस सिजन ६ टी–२० मा यो दोस्रो सबैभन्दा बढी स्कोर हो। कहिलेकाहीँ यति ठूलो लक्ष्यको सामना गर्न ब्याट्सम्यानलाई सुरूदेखि नै आक्रामक खेल्नुको विकल्प छैन।
तर, नयाँ बलमा विकेट लिन र त्यसपछि डेथ ओभरमा रन रोक्नु इङ्ल्यान्डका लागि ठूलो समस्या बन्यो। यता, पछिल्ला खेलहरूमा इङ्ग्ल्यान्डका बलरहरूले मध्य ओभरमा सबैभन्दा बढी संघर्ष गरिरहेका छन्। सातौं ओभरको सुरूदेखि १६औं ओभरको अन्त्यसम्म उनीहरूले प्रति ओभर १०.२ रन दिएर १४ विकेट मात्र लिएका छन्।
६ खेलमा स्पिन बलरको इकोनोमी ११.५ छ र सिम बलरले पनि निकै रक्षात्मक बलिङ गरेका छन्। आइतबारको खेलमा साम कुरानले ‘राउन्ड द विकेट’ कोणबाट पिचको बीचमा कटरहरू राख्न जारी राखे। यता, दक्षिण अफ्रिकाका ब्याट्सम्यानहरूले विकेट गुमाउने चिन्ता नगरी सहज रन बनाए र अन्तिम ओभरहरूमा स्कोरिङ रेट बढाए।
बटलरले भने,‘हामीले खेलको प्रत्येक चरणमा पर्याप्त विकेट लिन सकेका छैनौं। क्रिकेटमा स्कोरिङ रेट नियन्त्रण गर्न विकेट लिनुपर्छ र ब्रेकिङ पार्टनरसिप चाहिन्छ।’ इङ्ग्ल्यान्ड पनि आफ्ना बलरको चोटको लामो सूचीबाट प्रभावित भएको छ। जोफ्रा आर्चर, मार्क वुड, क्रिस वोक्स, ओली स्टोन, साकिब महमूद र टम कुरान यसपटक उपलब्ध थिएनन्। टिमल मिल्स पनि खुट्टाको चोटका कारण दक्षिण अफ्रिकासँगको सिरिजअघि टोलीबाट बाहिरिएका थिए।
यद्यपि, यीमध्ये कुनै पनि चोटबाट निको भएर विश्वकप अघि छनोटका लागि उपलब्ध हुनेछन् भन्नेमा कुनै ग्यारेन्टी छैन। बटलरले भने,‘चोटपटक खेलको हिस्सा हो। फिट भएकाहरूसँग खेल्न सक्छौं। हामीले अहिले बलरहरूलाई प्रोत्साहन र समर्थन गर्नुपर्छ, जो अहिले राम्रो प्रयास गरिरहेका छन्।’
टी–२० विश्वकपमा जे पनि हुन सक्छ। गत वर्ष अस्ट्रेलियाले प्रतियोगिताको तयारीमा बंगलादेश र वेस्ट इन्डिजसँग हार व्यहोरेको थियो। तर, त्यसपछि विश्वकपमा इङ्ल्यान्डसँग ठूलो हार बेहोरेपछि बाँकी रहेका चारमध्ये चार खेल जितेको थियो। तर, मिलरको क्याच लिँदा इङ्ल्यान्डबाट यस्तो अपेक्षा राख्नु अत्याधिक आशावादी हुनु बराबर देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
