फाइल तस्बिर
काठमाडौं–अखिल नेपाल फुटबल संघ (एन्फा)का निवर्तमान अध्यक्ष कर्माछिरिङ शेर्पाले आफू नेपाली फुटबलबाट टाढा नहुने बताएका छन्।
अध्यक्षमा पराजित भएपछि सञ्चारकर्मीलाई प्रतिक्रिया दिँदै उनले भने, ‘म नेपाली फुटबलबाट टाढा हुन्न, तर डर्टी पोलिटिक्सबाट भने टाढा हुन्छु।’ उनले अब आफू क्लबलाई अझ व्यावसायिक बनाउने काममा लाग्ने, एकेडेमीहरु खोल्ने र ग्रासरुट तहका कार्यक्रम सञ्चालन गर्नतिर लाग्ने पनि बताए।
शेर्पाले निर्वाचित नयाँ टिमले नेपाली फुटबललाई व्यवस्थित ढंगले सञ्चालन गर्न सकोस् र फु्टबललाई व्यावसायिक खेलको रुपमा स्थापित गर्न सफलता मिलोस् भनी शुभकामना पनि दिए।
‘नेपाली फुटबल सञ्चालन गर्न गाह्रो छ, तर राम्रोसँग सञ्चालन गर्नुपर्छ। जुन हिसाबले हामीले चार वर्ष चलायौं त्यसले फाउण्डेसन पनि तयार भएजस्तो लाग्दैन,’ उनले भने, ‘अब नेपाली फुटबलको फाउण्डेसन बलियो बनाउनुपर्नेछ, बाह्रै महिना खेल हुनुपर्छ, व्यावसायिकताका लागि खेलाडीहरु बाह्रै महिना खेल्न पाउनुपर्छ, प्रशिक्षक बाह्रै महिना प्रशिक्षण दिन पाउनुपर्छ र रेफ्रीले बाह्रै महिना खेलाउन सक्ने वातावरण सिर्जना हुनुपर्छ।’
उनले नयाँ कार्यसमितिलाई आफ्नो तर्फबाट कुनै अवरोध नहुने प्रतिबद्धता जनाए। बरु ए डिभिजनका अध्यक्षको नाताले नेपालमा व्यावसायिक फुटबल होस् भन्ने आफ्नो चाहना रहेको र त्यसलाई पूर्ति गर्न नयाँ टिम सफल हुनुपर्ने बताए।
शेर्पाले अब नेपाली फुटबललाई ग्रासरुटबाटै पिरामिड शैलीमा विकास गर्नुपर्ने बताए। ‘ग्रासरुट र र युथ प्रोगामहरु बलियो बनाउनुपर्छ, त्यसपछि लिग प्रतिस्पर्धा व्यवस्थित बनाउनुपर्छ,’ उनले भने, ‘नयाँ टिमसामु धैरै चुनौती छन्, फुटबल गर्नु भनेको आर्थिक रुपमा पनि धैरै गाह्रो छ, सरकारबाट आउने अनुदान कम छ, स्पोन्सरबाट आउने पैसा कम छ, सरकारको नीति नै परिवर्तन गरेर फुटबलमा पैसा आउने वातावरण बनाउनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
