काठमाडौं– वरिष्ठ अधिवक्ता सुरेन्द्र भण्डारीले प्रधानमन्त्री केपी शर्मा ओली र नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले संसदलाई नियन्त्रणमा लिन खोजेको आरोप लगाएका छन्।
जुम्लामा अनसनरत डा गोविन्द केसीको समर्थनमा आज भएको प्रदर्शनपछि बानेश्वरमा आयोजित कोणसभामा बोल्दै भण्डारीले सरकारले एकतर्फी रुपमा अध्यादेश ल्याउन खोजेको आरोप लगाए।
उनले प्रधानमन्त्री ओली र प्रचण्डलाई लक्षित गर्दै भने, ‘पहिले लोकतन्त्र र संसदको अधिकार बुझ्नुहोस्। कानुन बन्नुअघि कुनै पनि विषय ठिक छ कि छैन भनेर छलफल हुनुपर्छ। तर, तपाईंहरुले संसदलाई डिक्टेट गरिरहनुभएको छ। तपाईंहरु संसदको डिक्टेटर हो।’
वरिष्ठ अधिवक्ता भण्डारीले डा केसीको पक्षमा आन्दोलन लहडमा नउठेको बताए। अहिले डा केसीको समर्थनमा उठेको आवाज नागरिकको भएको जिकिर गर्दै भण्डारीले उक्त आवाज सरकारले नै गठन गरेको माथेमा कार्यदलको प्रतिवेदनका आधारमा उठेको बताए।
उनले पछिल्लो समय संसदमा पेश गर्न लागिएको चिकित्सा शिक्षा विधेयकमा प्रत्येक प्रदेशमा एक/एक मेडिकल कलेज हुनुपर्छ भन्ने माथेमा प्रतिवेदनको व्यवस्थालाई हटाइएकोप्रति असन्तुष्टि व्यक्त गरे।
‘विधेयकमा प्रत्येक प्रदेशमा एक/एक मेडिकल कलेज हुनुपर्छ भन्ने व्यवस्थालाई हटाइएको छ। यस्तो विधेयक जबसम्म फिर्ता हुँदैन तबसम्म वार्ता हुन सक्दैन’, भण्डारीले भने।
उनले यसअघिकै अध्यादेश अनुसारको विधेयक ल्याउनुपर्नेमा जोड दिँदै भने, ‘यदि जनताको पक्षमा भएको अध्याधेश ल्याउन सक्दैन भने यो सरकार राजनीतिक आँटविहीन सरकार हो।’
माथेमा प्रतिवेदनमा प्रत्येक सरकारी मेडिकल कलेजहरुमा ७५ प्रतिशत छात्रवृत्ति दिने व्यवस्था रहे पनि अध्याधेशमा भने सो कुरा हटाइनु नागरिकविरोधी भएको उनले बताए।
‘एमबिबियस पढ्दा जति पनि पैसा लिन पाउनेगरी तपाईंहरु माफियाहरुको सहयोग गरिरहनुभएको छ। त्यो नागरिकको हितमा छैन। प्रधानमन्त्री ओली नेपाली नागरिक र यो राज्यकै विरोधी हो’, वरिष्ठ अधिवक्ता भण्डारीले भने।
उनले प्रधानमन्त्री ओली लगायत केही नेताले मनमोहन मेमोरियल कलेज र प्रचण्ड लगायत केही नेताले बिएन्डसी मेडिकल कलेजको पक्षमा लगानी तथा हितमा कार्य गरिरहेको भन्दै यो अन्तर्राष्ट्रिय कानुन विपरीत रहेको टिप्पणी गरे।
‘आफ्नो हितमा कानुन बनाएर व्यवसाय सञ्चालन गर्नु कानुनसम्मत छैन। त्यसकारण तपाईं अपराध गरिरहनुभएको छ’, उनले भने।
उनले प्रधानमन्त्री ओलीले अदालतका धेरै आदेशहरु विपरीत अभिव्यक्ति दिएको बताउँदै उनलाई मानहानिको मुद्दा लगाउनुपर्ने जिकिर गरे।
वार्ताका लागि डा केसीलाई जुम्लाको अनसनस्थलबाटै काठमाडौं ल्याउने शिक्षामन्त्री गिरिराजमणि पोखरेलको भनाइलाई इंगित गर्दै वरिष्ठ अधिवक्ता भण्डारीले सत्यग्राहीलाई छोएर देखाउन चुनौती दिए।
‘वार्ताका लागि डा केसीका प्रतिनिधि काठमाडौंमै तयार छन्', उनले भने, 'डा केसीलाई जुम्लाबाट ल्याएर वार्ता गर्ने भन्दै झुट नबोल्नुस्!’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821309.webp)
-1789993953.png)
-1789992067.jpeg)
-1786602170.png)
-1789631269.jpg)
