काठमाडौं– गत असार १६ गतेदेखि जुम्लामा अनसनरत प्राडा गोविन्द केसीको तौल ९ केजी घटेको छ। उनको पिसाबमा 'केटोन बडी' अत्याधिक देखिन थालेको छ भने शरीरमा सञ्चित बोसोहरु पग्लेर मांसपेशी पनि टुक्रिन थालिसकेको छ। यसैका कारण पहिलो दिनको तुलनामा डा केसीको तौल ९ केजी घटेको चिकित्सकहरु बताउँछन्।
सुरुकै दिनबाट निरन्तर घटिरहेको सेतो रक्तकोषिकाको संख्या रगतको रिपोर्ट अनुसार ४ हजारभन्दा कम भइसकेको छ। यसका कारण डा केसी विभिन्नखाले संक्रमणको उच्च जोखिममा छन्। चिकित्सकहरुका अनुसार सामन्य रुघाखोकी र ज्वरो आएको खण्डमा पनि त्यसले अकल्पनीय क्षति निम्त्याउन सक्छ।
कमजोरी, चक्कर लाग्ने, वाकवाकी लाग्ने, मांसपेशी बाउँडिने समस्यामा खास सुधार हुन सकेको छैन।
डा केसीको स्वास्थ्य अवस्था भने बिग्रँदो छ। विगतका अनसनको तुलनामा जुम्लाको चिसो मौसम र उच्च क्षेत्रको हावापानीका कारण नयाँ-नयाँ समस्या देखिन थालेको उपचारमा संलग्न चिकित्सक बताउँछन्। दोस्रो-तेस्रो दिनदेखि रगतमा अक्सिजनको मात्रा घट्न थालेको थियो। अहिले त्यसैका कारण सास फेर्न गार्हो हुने, बोल्दा सास बढ्ने, उठ्न गाह्रो हुने समस्या छ। उनलार्इ निरन्तर कृत्रिम अक्सिजन दिइएको छ।
बिहीबार दिउँसो दुर्इपटक अर्ध बेहोसीजस्तो अवस्था देखिएको चिकित्सक बताउँछन्। उपचाररत चिकित्सकहरुका अनुसार ब्रेनसम्म जाने रगतमा अक्सिजन र ग्लुकोजको मात्रा दिनानुदिन कम भएका कारण यस्तो भएको हो। उनीहरुका अनुसार केही दिनसम्म अझै यस्तै रगतको सञ्चार भइरहे डा केसी बेहोस हुने र स्वास्थ्यमा गम्भीर असर पर्ने हुन सक्छ।
छातीको दुखाइ पहिलेको तुलनामा झन् बढेको बताइएको छ। मुटुको चालमा त्यति विघ्न गडबढी नदेखिए पनि गति असामान्य छ। कोल्टे फेर्दा वा हलचल गर्दा मात्रै पनि मुटुको गति १०० भन्दामाथि पुग्ने गरेको छ (सामान्यतः स्वस्थ मानिसको मुटुको गति ७०-८० को बीचमा रहन्छ)।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
