बेलायतका लागि नेपाली राजदूत ज्ञानचन्द्र आचार्यलाई ज्ञापनपत्र बुझाउँदै भूपूगोर्खा अगुवाहरू। तस्बिर साभार : नेपालीलिंक डटकम।
काठमाडौं– ब्रिटिश सेनाबाट सेवानिवृत्त भूतपूर्व गोर्खा सैनिकहरुको पेन्सन भारतीय बैंकमार्फत नभइ सिधै नेपाल आउने गरेको नेपाल राष्ट्र बैंकले जनाएको छ।
भारतको रिजर्भ बैंकमार्फत् पेन्सन नेपाल पठाउँदा नेपाललाई करोडौं रुपैयाँ घाटा भइरहेको भन्दै गोर्खा संगठनहरुले आपत्ति जनाइरहँदा राष्ट्र बैंकले त्यस्तो खुलासा गरेको हो।
नेपाल लाइभसँग कुरा गर्दै नेपाल राष्ट्र बैंकका सहप्रवक्ता नारायण प्रसाद पोखरेलले भूतपूर्व गोर्खाहरुको पेन्सन ब्रिटिश सरकारले स्ट्याण्डर्ड चार्टर्ड बैंकमार्फत् सिधै नेपाल आउने गरेको बताए। स्ट्याण्डर्ड चार्टर्ड बैंकको मुख्य कार्यालय लन्डनमा रहेको छ।
'ब्रिटिश सरकारले स्ट्याण्डर्ड चार्टर्ड बैंकमार्फत् भूतपूर्व गोर्खा सैनिकहरुको पेन्सन रकम सिधै नेपाल पठाउने गरेको धेरै वर्ष भइसक्यो। अहिले यसमा कुनै समस्या छैन', सहप्रवक्ता पोखरेलले भने।
हालै गोर्खा सत्याग्रह संयुक्त संघर्ष समिति यूके नेपालका प्रमुख संयोजक कृष्णबहादुर राई र ब्रिटिश गोरखा नेपाली नागरिकता निरन्तरता अभियान यूके नेपालका प्रमुख संयोजक सन्तोष थलङले लन्डनस्थित नेपाली दूतावासमार्फत अर्थमन्त्रीलाई एक पत्र पठाउँदै दशकौंदेखि स्टर्लिङ पाउण्डबाट भारु (भारतीय मुद्रा) हुँदै नेपाल आउने भूतपूर्व गोर्खाहरुको पेन्सन स्टर्लिङ पाउण्डमा सिधै नेपाल राष्ट्र बैंकमै आउने व्यवस्था मिलाउन माग गरेका थिए।
तर, यसबारे ब्रिटिश सरकारले गत वर्ष नै स्पष्ट पारिसकेको थियो। गैरआवासीय नेपाली संघ (एनआरएनए यूके) का अध्यक्ष प्रेम गाहा मगरले पठाएको एक पत्रको जवाफमा ब्रिटिश रक्षा मन्त्रालय (एमओडी) ले भूतपूर्व गोर्खाहरुको पेन्सन सिधै नेपाल पठाउने गरेको जनाएको थियो (हेर्नुहोस् पत्र)।
‘नेपालस्थित ब्रिटिश गोर्खाका अधिकारीहरुले प्रत्येक महिना आफ्नो नगद आवश्यकताको आधारमा खासगरी पेन्सनका लागि रकम माग गर्ने गर्दछन्। त्यसपछि रक्षा मन्त्रालयले अनुरोध गरिएको रकम स्टर्लिङ पाउण्ड सlधै काठमाडौंस्थित स्ट्याण्डर्ड चार्टर्ड बैंकमा रहेको स्टर्लिङ पाउण्ड खातामा पठाउने गर्छ,' पत्रमा भनिएको छ।
यसमा भारतीय बैंकहरु संलग्न नरहेको र नेपाली अर्थतन्त्रले वर्षेनी झन्डै १२ करोड पाउण्ड लाभ लिने गरेको पनि पत्रमा उल्लेख छ।
नेपालको विदेशी मुद्रा संचितिमा दबाब बढिरहेको बेला ब्रिटिश सरकारबाट भूतपूर्व गोर्खाहरुको पेन्सनमार्फत प्राप्त हुने विदेशी मुद्राले अर्थतन्त्रलाई भरथेग गरिरहेको अधिकारीहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768660147.png)
-1764146706.png)
-1768395492.png)
