काठमाडौं– नेपाल कम्युनिस्ट पार्टी (नेकपा) का सांसद योगेश भट्टराईले डा गोविन्द केसीको माग सम्बोधन गर्ने नाममा इमोसनल ब्ल्याकमेल नगर्न नेपाली कांग्रेसका सांसदलाई चेतावनी दिएका छन्।
डा गोविन्द केसीको जीवनरक्षा सम्बन्धमा कांग्रेसले संसदमा दर्ता गराएको जरुरी सार्वजनिक महत्वको प्रस्तावमाथिको छलफलमा भाग लिँदै भट्टराईले मेडिकल कलेज कहाँ खोल्ने भन्ने विषय डा केसीले अनसन बसेर नभई चिकित्सा शिक्षा आयोगले निर्णय गर्ने बताए। उनले डा केसीलाई जुम्लाबाट काठमाडौंको खुलामञ्चमा छलफलमा आउन चेतावनी दिए।
सांसद भट्टराईले भने, ‘केसी आफूखुसी जुम्लामा गएर अनसन बस्नुभएको हो। सरकारको कुनै पनि हिरासतमा हुनुहुन्न। यस्तो झुटो प्रस्ताव संसदमा ल्याउनु हुँदैन।’
मेडिकल कलेजलाई अहिले मात्र सम्बन्धन दिन लागिएको नभई यसअघि पनि यो प्रक्रिया चलेको भट्टराईको भनाइ छ। उनले मेडिकल कलेजका सञ्चालकहरुले मार्सी धानको भात चरेसको थालमा खुवाएका छन् कि दुना–टपरीमा खुवाएका छन् भन्नेबारे छानबिन हुनुपर्ने बताए।
भट्टराईले यसअघि सम्बन्धन पाएका निजी मेडिकल कलेजहरुको गुणस्तरबारे छानबिन गर्न एक उच्चस्तरीय संसदीय समिति बनाउन समेत माग गरे।
विगतमा सम्बन्धन पाएका मेडिकल कलेजका उत्पादनहरु मेडिकल काउन्सिलको लाइसेन्स परीक्षामा कम उत्तीर्ण भएको भन्दै सांसद भट्टराईले सरकारी मेडिकल कलेजका ९८ प्रतिशत पास हुँदा निजीका ८२ प्रतिशत मात्र पास भएको बताए।
‘हिजो मेडिकल कलेज सञ्चालनका लागि सम्बन्धन पाएकाहरुको योग्यतामाथि प्रश्न उठेको छ’, उनले भने, ‘संसदबाट शक्तिशाली छानबिन समिति गठन गरेर सबै मेडिकल कलेजबारे छानबिन हुन जरुरी छ।’
विकृतिको स्रोत कांग्रेस : खगराज अधिकारी
नेकपाका सांसद खगराज अधिकारीले पछिल्लो समय संसदमा रमाइलो प्रस्ताव दर्ता हुने गरेको भन्दै कांग्रेस सांसदहरुलाई व्यंग्य गरे।
अघिल्लो पटक डा केसीको १४औं अनसनका बेला कांग्रेस नै सत्तामा रहेको भन्दै त्यो बेला माग पूरा नगर्ने को हो भनेर प्रश्न समेत गरे।
विकृतिको स्रोत केन्द्र कांग्रेस नै भएको भन्दै उनले डा केसीलाई अनसनबाट फिर्ता बोलाएर छलफल गर्नुपर्नेमा जोड दिए।
‘विपी कोइराला स्वास्थ्य विज्ञान प्रतिष्ठानमा भर्ना शुल्क नेपाली विद्यार्थीलाई ६७ लाख र सार्कका विद्यार्थीलाई ९० लाख छ’, अधिकारीले भने, ‘कति बनाउँदा केसीको माग सम्बोधन हुन्छ, प्रस्तावकले जवाफ दिनुपर्दैन?’
अधिकारीले काठमाडौंका महँगा निजी विद्यालयहरुको नाम लिँदै ती विद्यालय राष्ट्रियकरण गर्न सहमत भएको हो भनी प्रश्न समेत गरे।
सांसदहरुको अधिकार खोस्न डा केसीको अनसन : कृष्णभक्त पोखरेल
अर्का सांसद कृष्णभक्त पोखरेलले कांग्रेसले दर्ता गरेको विधेयक संसदीय मर्यादा विपरीत भएको टिप्पणी गरे।
उनले स्वास्थ्य सम्बन्धी नीति बनाउँदा डा केसीलाई सोधेर मात्र बनाउनुपर्ने हो भनेर समेत प्रश्न गरे।
सांसद पोखरेलले विधेयक संसद् सचिवालयमा दर्ता भई छलफलका क्रममा रहेकाले सांसदहरुले आवश्यक संशोधन गर्न सक्ने अधिकार खोस्न केसीले अनसन थालेको आरोप लगाए।
विगतमा निजीकरणको पक्षमा रहेको नेपाली कांग्रेस अहिले त्यसको विपक्षमा उभिएको समेत उनले लगाए।
‘हिजो २० भन्दा धेरै उद्योग एकै पटक निजीकरणको नाममा बिक्री गर्यो, अहिले उसैले स्वास्थ्य शिक्षा सार्वजनिक हुनुपर्ने भनिरहेको छ’, उनले भने।
यसअघि काठमाडौंमा ६ वटा मेडिकल कलेज खोल्ने प्रस्तावमा कसले सहमति दिएको थियो भन्दै पोखरेलले संसदको सर्वोच्चता कुण्ठित गर्नेगरी दर्ता भएको प्रस्ताव फिर्ता लिन माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789992067.jpeg)
-1789631269.jpg)
