काठमाडौं– श्रम, रोजगार तथा सामाजिक सुरक्षा मन्त्रालयले प्रक्रिया पूरा भएर पनि मलेसिया जान रोकिएका कामदारको विवरण वैदेशिक रोजगार व्यवसायीसँग माग गरेको छ।
मन्त्री गोकर्ण विष्ट र वैदेशिक रोजगार व्यवसायी संघबीच मन्त्रालयमा आइतबार भएको छलफलमा सबै प्रक्रिया पूरा गरेर अन्तिम श्रम स्वीकृति रोकिएर मलेसिया जान वञ्चित कामदारहरुको विवरण मागेको हो।
छलफलमा मन्त्री विष्टले कामदारले रकम खर्चिसकेर अन्तिम श्रम स्वीकृति नपाउँदा जान रोकिएकाहरुलाई केही दिनपछि नै खुला गर्ने संकेत समेत गरेको मन्त्रालय स्रोतले जनाएको छ। स्रोतका अनुसार, जसका लागि व्यवयासीले केही दिनभित्रमा कामदारको सबै विवरण मन्त्रालयमा पेस गर्नुपर्नेछ।
श्रममन्त्री विष्टले बैसाख २६ गते कामदारलाई आर्थिक भार पारेर ठगी गरेको भन्दै स्वास्थ्य परीक्षण गर्ने संस्थाहरु बायोमेट्रिक, भिएलएन, माइग्राम्स, जिएसजी, वानस्टप सेन्टर र ओएससी खारेज गर्ने निर्णय गरेका थिए। उक्त निर्णयपछि मलेसिया रोजगारीका लागि जाने कामदारको प्रक्रिया रोकिएको थियो।
बैसाख २६ अघि अन्तिम श्रम स्वीकृतिका लागि निवेदन दिएका कामदारलाई मात्र श्रम स्वीकृति जारी गर्ने मन्त्रालयको तयारी छ।
स्वास्थ्य परीक्षण गराई रकम बुझाएर अन्तिम श्रम स्वीकृति नपाएका कामदारका लागि मात्र तत्कालका लागि खुला गरिने मन्त्री विष्टले व्यवसायीसँगको छलफलमा जानकारी गराएका थिए।
संघले विभिन्न मेनपावर कम्पनीसँग जानकारी माग्दा ४ हजारभन्दा बढी कामदार अन्तिम श्रम स्वीकृति नपाएर मलेसिया जान रोकिएको जानकारी मन्त्री विष्टलाई गराएको थियो।
मन्त्री विष्टले कामदार पठाउने विषयमा मलेसिया सरकारसँग कूटनीतिक पहल भइरहेको र नयाँ मापदण्ड बनाएर मात्र कामदार पठाउने बताए।
वैदेशिक रोजगार विभागको तथ्यांक अनुसार नेपालबाट रोजगारीका लागि मासिक १० हजारभन्दा बढी युवा मलेसिया जाने गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
