राजविराज– सप्तरीको महुली खोला पुलको मर्मत र सुरक्षाका लागि कम्तिमा ७ दिन लाग्नसक्ने सडक विभागका पूर्वाञ्चल क्षेत्रीय निर्देशक दिपक कुमार भट्टराइले बताएका छन्।
सडक डिभिजन कार्यालयले यातायातमा अवरोध नहुने गरी पुलको सुरक्षा र मर्मतको काम सुरु भइसकेको जनाएको छ। भत्किएको ठाउँमा तारजाली लगाएर मर्मत र सुरक्षा गर्ने तथा क्षति पुगेको भागमा बाढीले असर नगरोस् भन्न माथिल्लो भागमा ‘स्पर’ निर्माणका लागि तयारी भइरहेको निर्देशक भट्टराइले जानकारी दिए।
शनिबार साँझ पूर्वपश्चिम राजमार्ग अन्तर्गत सप्तरीको महुली पुल एक साइडबाट भत्किएपछि सवारी आवागमन असहज भएको छ। अग्निसाइर कृष्णासवरण गाउँपालिका–५ स्थित महुली खोलामा रहेको ११ सय मिटर पुलमध्ये उत्तरपट्टिबाट करिब ५० मिटर भाग भत्किएको छ। चार दिन अघिको वर्षासँगै खोलामा आएको बाढीको कारण पुलमा क्षति पुगेको थियो। समयमा मर्मत नहुँदा शनिबार साँझ साढे ६ बजे पुल भत्किएको स्थानीय अशोक आचार्यले बताए।
पुलको एकातर्फको भाग भत्किएपछि हाल एकतर्फी रुपमा मात्रै यातायात सञ्चालन गरिएको छ। तर, समयमा मर्मतको काम नभए वर्षात सुरु भएपछि बढीले बाँकी रहेको भाग समेत बगाउन सक्ने खतरा रहेको स्थानीयवासीहरु बताउँछन्।
एकतर्फी रुपमा यातायात सञ्चालनमा आइरहेकाले तत्काल कुनै समस्या नदेखिएपनि पानी पर्न थालेपछि खोलामा आउने बाढीले खोलाको सतह कटान गरेर बाँकी भाग पनि बगाउन सक्ने सप्तरीका एसपी मुकेश कुमार सिंह बताउँछन्।
‘चार दिन अघि नै पूर्वपश्चिम राजमार्ग चिरिएर पुलको एक साइड भास्सिएको थियो। हामीले लहानस्थित सडक डिभिजन कार्यालयलाई जानकारी पनि गराएका हौँ।’, एसपी सिंहले भने, ‘तर, समयमा सुरक्षाको प्रवन्ध मिलाउन नसक्दा पुल भत्किएको हो।’ तत्काल सुरक्षाको उपाय नअपनाए जोखिम झनै बढ्ने उनको भनाइ छ।
बाढीले पुलमा क्षति गरेको जानकारी पाएपछि आवश्यक श्रोत साधन जुटाउँदा–जुटाउँदै सो भाग भत्किएको सडक विभागका पूर्वाञ्चल क्षेत्रीय निर्देशक भट्टराइको भनाइ छ। निर्देशक भट्टराइले भास्सिएको भाग भत्काएर मात्र मर्मत गर्नुपर्ने भएकाले त्यसलाई ठूलो कुरा बनाउन नहुने तर्क गरे। ‘क्षति भएकै ठाउँमा मर्मत हुने अवस्था थिएन, भत्किएको राम्रै भयो।’, उनले भने, ‘वर्षाको समय भएकाले यातायात अवरोध नहुने गरी तत्काल मर्मत र सुरक्षाको काम हुन्छ। त्यसपछि दिर्घकालिन के गर्न सकिन्छ, सवै गरिन्छ।’
यो पुल भएर दैनिक साना÷ठूला गरी करिब ३ हजार सवारी साधन आवतजावत गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
