थाइल्यान्ड– थाइल्यान्डको गुफामा विगत १५ दिनदेखि फसिरहेका १२ किशोर र उनीहरुका फुटबल प्रशिक्षकलाई उद्दार गर्न आगामी ३ देखि ४ दिनको समय उत्तम रहेको उद्दार टोलीका प्रमुखले बताएका छन्। उद्दार टोलीका प्रमुख नारोंगसक ओसोटानाकोर्नले भने, ‘आगामी ३/४ दिनसम्म गुफाभित्रको पानी, मौसम र किशोरहरुको स्वास्थ्य अवस्थाको हिसाबले उद्दारका लागि अहिलेको समय निकै उत्तम छ। यसबीचमा हामीले के गर्न सक्छौं, स्पष्ट निर्णय लिनु जरुरी छ।’
उनले केही दिनपछि वर्षाको सम्भावना रहेकोले यो बीचमा नै उनीहरुलाई सकुशल बाहिर निकाल्नका लागि सक्दो प्रयास गरिरहेको उनले बताए। ‘हामीलाई चिन्ता छ की केही दिनमा पुनः मौसममा बदली भई पानी पर्नसक्छ। जसले गर्दा सुरुङको साँघुरो क्षेत्रमा बाढीका कारण अप्ठेरो पर्नसक्छ।’, उनले भने,‘त्यसकारण यसबीचमा नै सक्दो प्रयास गर्नु जरुरी रहन्छ।’
प्रवेशद्वार वरपरको स्थान खाली गराइयो
उद्दारका लागि पर्याप्त स्थानको आवश्यक पर्ने भन्दै थाई सेनाले आइतबार बिहानै गुफाको प्रवेशद्वार वरपरको स्थानबाट हटिदिन सञ्चारकर्मी तथा अन्य सबै अनावश्यक व्यक्तिहरुलाई सूचित गर्दै सो क्षेत्र खाली गराएको छ।
फुटबल खेलेर फर्किने क्रममा गत जुन २३ मा गुफा घुम्न छिरेका उनीहरु बाढीका कारण गुफाभित्रै फसेका थिए। हराइरहेको १० दिनपछि गएको सोमबार २ बेलायती उद्धारकर्ताहरुले गुफाको प्रवेशद्वारबाट करिब ४ किलोमिटर भित्र उनीहरु रहेको स्थान पत्ता लगाएका थिए।
वाइल्ड बोअर्स फुटबल क्लबका ११ देखि १६ वर्ष उमेर समूहका १२ किशोर र उनका फुटबल प्रशिक्षकको जीवनरक्षाका लागि गुफाभित्र अक्सिजन, औषधी तथा खानेकुराको व्यवस्था मिलाइएको छ।
उनीहरुको सकुशल उद्दारका लागि ठूलो संख्यामा अन्तर्राष्ट्रिय उद्दारकर्ताको टोली परिचालन गरिएको छ।
टोलीका प्रमुख ओसोटानाकोर्नले शनिबार बेलुका उद्दारको लागि उपयुक्त समय भएको बताएको केही समयपछि नै सो क्षेत्रमा वर्षा भएको थियो। मौसममा देखिएको बदलीले उद्दार कार्यमा असर गर्नसक्ने देखिएको छ।
पत्रमार्फत भावना साटासाट
शनिबार बिहान मात्रै थाई सेनाका उद्दारकर्ताहरुको सहयोगमा गुफाभित्र फसेका किशोर तथा प्रशिक्षक र उनीहरुका परिवारबीच आदानप्रदान भएका पत्रहरु सार्वजनिक गरेको थियो।
‘हामी सबै हिम्मतीला छौँ। हाम्रो चिन्ता लिनु पर्दैन।’, एक किशोरले आफ्नो चीठीमा लेखेका छन्। उनले हाँसो गर्दै आफ्ना शिक्षकलाई बढी गृहकार्य नदिनसमेत पत्रमा आग्रह गरेका छन्।
अर्का एक किशोरले रंगीन कागजमा आफ्ना आमाबुवा तथा सबै आफन्तहरुलाई सम्झिँदै मुटु तथा हाँसिरहेको चित्र बनाएर पठाएका छन्। ‘रातको समयमा मेरो चिन्ता नलिनुहोला। रातले सबैलाई मन पराउँछ।’, पत्रमा उनले लेखका छन्।
‘यदि तपाईं आफ्नो छोरा बाहिर आओस् भन्ने चाहनुहुन्छ भने मलाई खानका लागि मोकाथा(एक थाई खानाको परिकार) पठाइदिनुहोस्।’, अर्का किशोर निकले आमाबुवालाई लेखेका छन्।
प्रशिक्षकले मागे माफी
१२ मध्येका एक किशोर मिगले थाई सेनाले आफुहरुलाई सकुशल बाहिर निकाल्नेमा आफू ढुक्क रहेको उल्लेख गरेका छन्।
उता प्रशिक्षक एकापाेल चान्टाअाेङले भने किशोरहरुलाई गुफाभित्र लगेकोमा सबै अभिभावकसँग माफी मागेका छन्। फसेका किशोर तथा केही परिवारजनले भने प्रशिक्षकमाथि कुनै पनि आरोप नलगाउन आग्रह गरेका छन्।
उद्धारकाे प्रयास
गुफाभित्र खाना तथा औषधी पुर्याएर फर्किने क्रममा अक्सिजनको कमीका कारण गत शुक्रबार मात्रै एक थाई सैनिकको मृत्यु भएपछि उद्धार टोलीले उच्च सावधानी अपनाउने जनाएको छ।
गुफाभित्र सास फेर्नका लागि सहज होस् भन्नका लागि पनि करिब १ सय भन्दा बढी स्थानमा प्वाल बनाइएको छ। गुफाभित्र रहेको कार्वनडाइअक्साइड ग्यासलाई बाहिर निकाल्नका लागि करिब ३ सय मिटर लामो चिम्नीसमेत तयार गरिएको छ।
गुफाभित्रको पानीलाई विद्युतीय मोटरको सहयोगमा बाहिर निकाल्नेसमेत प्रयास भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
