राजविराज– पूर्वपश्चिम राजमार्ग अन्तर्गत सप्तरीको अग्निसाइर कृष्णासवरण गाउँपालिका–५ स्थित महुली पुल भत्किएको छ।
तिन दिन अघिको वर्षासँगै खोलामा आएको बाढीका कारण भास्सिएकाे पुल साँझ साढे ६ बजे करिब ५० मिटरजति भत्किएको सप्तरीका एसपी मुकेशकुमार सिंहले जानकारी दिए। पुलको एक तर्फको भाग मात्र भत्किएकाले एकतर्फी रुपमा यातायात सञ्चालन गरिएको उनले जानकारी दिए।
‘पुलको एकातर्फबाट आधा भाग भत्किएको छ।’, उनले भने, ‘जन्डौपट्टिबाट पुल भत्किएको हो, एकतर्फी आवागमन सञ्चालन भएकोले आत्तिनुपर्ने अवस्था छैन।’ तर, समयमा मर्मतको काम नभए वर्षात सुरु भएपछि बढीले माटो बगाएर पुल भत्काउन सक्ने उनको भनाइ छ।
‘अहिले त कुनै समस्या देखिएको छैन तर पानी पर्न थालेपछि समस्या हुन सक्छ।’, सिंहले भने,‘सपोर्टका लागि तत्काल बाँधको काम भएन भने बाढीले तलको माटो बगाएर बाँकी रहेको भाग पनि बगाउन सक्छ।’
पुलको पछिल्लो अवस्थाको बारेमा सिरहाको लहानस्थित सडक डिभिजन कार्यालयलाई जानकारी गराइएको उनले बताए। एसपी सिँहले तीन दिन अघिनै मर्मतको काम सुरु भएको भए पुल भत्किने अवस्था नआउने दावी गरे। ‘सडकको बीचमा चिरा परेर एक साइड भासिएको थियो।,’ उनले थपे, ‘तर, त्यसको मर्मत सम्भार भएन र आज पुल भत्कियो।’
प्रहरीले आफनो स्तरबाट सुरक्षा गर्ने काम गरिरहे पनि बाँकी रहेको भाग जोगाउन पानी पर्न सुरु हुनपूर्व नै तारजाली सहितको बाँध बनाउनु पर्ने आवश्यकता रहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
