काठमाडौं– आर्थिक चलखेल गरी गलत फैसला गरेको अभियोगमा सरुवामा परेका उच्च अदालत जनकपुरको राजविराज इजलासका ३ न्यायाधीशको काज सरुवा न्याय परिषदले सदर गरेको छ।
न्याय परिषद्ले न्यायाधीशहरु मोहनबहादुर कार्की, सलाहुद्दिन अख्तर सिद्दिकी र नसरुलाह अन्सारीको काज सरुवा गरेको थियो। कार्कीको जनकपुर उच्च अदालत, सिद्दिकीको सर्वोच्च अदालत र अन्सारीको दिपायल उच्च अदालतमा काज सरुवाको निर्णय परिषदले सदर गरेको हो। उनीहरुको सरुवा सदर गर्दै थप छानबिन गर्ने परिषदको तयारी छ।
सिद्दिकी र अन्सारीको स्थानमा परिषदले सीताराम मण्डल र तिलप्रसाद श्रेष्ठलाई पठाउने निर्णय गरेको छ।
राजविराज उच्च अदालत बार एसोसिएसनको अगुवाइमा कानुन व्यवसायीले सुरु गरेको आन्दोलनका कारण राजविराजमा गत साताको मंगलबारदेखि चार दिनसम्म न्याय सेवा प्रभावित भएको थियो। कानुन व्यवसायीले राय किताब र फैसला फरक पार्ने न्यायाधीशलाई कारबाहीसहित सम्पूर्ण न्यायाधीशको सरुवा माग गरेका थिए।
आन्दोलनका कारण उच्च अदालतको कारबाही रोकिएपछि परिषदका सदस्य ओमप्रकाश मिश्र वार्ताका लागि राजविराज पुगेर समाधान गरेका थिए। त्यहाँ मंगलबारदेखि नियमित मुद्दा सुनुवाइ हुन थालेको छ।
सप्तरीको बलान बिहुल गाउँपालिका–४ बेल्हीकी सुमित्रादेवी साह र धनमायादेवी साह समेत प्रतिवादीको मिलापत्र बदर, जालसाजी र अंशबन्डा मुद्दामा राजविराज इजलासका न्यायाधीशद्वय अन्सारी र बबिता उप्रेतीले आर्थिक चलखेल गरेर फैसला सुनाएको भन्दै कानुन व्यवसायी आन्दोलनमा उत्रेका थिए। उप्रेतीको भने सरुवा भएको छैन।
२०७४ कात्तिक ६ को संयुक्त इजलासले जिल्ला अदालतको ०७१ जेठ २६ को फैसला सदर हुने भनी राय किताबमा लेखेकोमा फैसलाको पूर्ण विवरण लेख्दा भने बकसपत्रको २ बिघा ८ कठ्ठा १५ धुर जग्गाबाहेक सुरु सदर थपेर फैसला फरक पारेको आरोप कानुन व्यवसायीको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790066546.png)
-1786602170.png)
-1789631269.jpg)
