पार्टी फुटको संघारमै पुगेको भनेर चर्चा भइरहेको जनता समाजवादी पार्टी (जसपा)ले स्थानीय तहको निर्वाचन, पार्टीभित्रको विवाद, एमसीसी, सांगठनिक संरचनालगायत विषयमा कार्यकारिणी समिति, संघीय परिषद् र केन्द्रीय समिति बैठकमा छलफल गरेको छ। पार्टीको बैठक सकिएपछि नेताहरुले ‘जिम्मेवारी बाँडफाँट’मार्फत् फुटको सम्भावना टरेको सन्देश प्रवाह गरेका छन्। र, स्थानीय निर्वाचनमा केन्द्रित भएका छन्। जसपा बैठकमा उठेका सवाल, स्थानीय निर्वाचन र पार्टी विवादका विषयमा कार्यकारिणी समिति सदस्य एवम् पूर्वमन्त्री राजकिशोर यादवसँग नेपाल लाइभले गरेको कुराकानी :
तपाईंहरूले कार्यकारिणी समिति, संघीय परिषद् र केन्द्रीय समिति बैठक सक्नुभयो। ती बैठकले खासमा के गरे?
बैठकमा धेरै विषयमा छलफल भएपनि मुख्य रुपमा स्थानीय निर्वाचनमा केन्द्रित भएर बढी छलफल भयो। त्यसपछि निर्वाचनका निम्ति नेता र कार्यकर्तालाई उर्जा थप्ने काम भयो। निर्वाचनमा कसरी गएमा जित हासिल गर्न सकिन्छ भन्नेगरी मिहिन ढंगले बहस र छलफल भयो।
यस्तै, चुनावमा कस्ता व्यक्तिलाई उम्मेदवार बनाउने, कसले त्यसमा निर्णय गर्ने र कुन-कुन केन्द्रीय सदस्यलाई कहाँ खटाउने भन्ने विषयमा निर्णय भयो। चुनावमा के कस्ता नाराहरु बनाउने भन्ने विषयमा पनि छलफल भयो।
अर्को, संगठनको सवालमा तीन जनाको नेतृत्वमा मुख्यालय बनाउने काम भयो। त्यसबाट सामूहिक निर्णय गर्न सकियोस् भनेर बनायौं। कार्यकारिणी वा केन्द्रीय समिति बस्न नसकेको अवस्थामा मुख्यालय बसेर निर्णय गर्ने छ। त्यो निर्णय कार्यकारिणी र केन्द्रीय समितिबाट पास गराउने काम भयो। उम्मेदवारको टिकटमा हस्ताक्षर गर्ने जिम्मा अशोक राईलाई पनि दिइएको छ।
यसअघि जसपामा विवाद छ भनिएको थियो। त्यसलाई पनि सम्बोधन गर्नेगरी असार १ र २ गते विधान अधिवेशन गर्ने भएका छौं। त्यसलगत्तै महाधिवेशनमा जाने निर्णय भयो। पार्टी कस्तो बनाउने? पार्टीलाई वैचारिक र सांगठनिक रुपमा कस्तो बनाउने भन्ने विषयमा विधान अधिवेशन र महाधिवेशनमा छलफल गर्ने छौं। अब जसपा एक भएको छ। जसपा एक भएर जानुपर्छ भन्ने छ। जुन वैकल्पिक शक्ति निर्माण गर्ने अभिभारा हो, त्यसलाई परिपूर्ति गरेर जाने निर्णय भएको छ।
जसपाको विधानले मुख्यालयको व्यवस्था गरेको छैन। तीन जनाको मुख्यालय बनाउने निर्णय विधान विपरीत भएन र?
पार्टीको कार्यकारिणी र केन्द्रीय समितिबाट निर्णय भइसकेपछि विधान परिमार्जन गरेर जान सकिन्छ। त्यो बनाउँदा विधान विपरीत हुँदैन।
पार्टीमा उपेन्द्र यादव र बाबुराम भट्टराई पक्षबीच विवाद छ भनिएको थियो। अब विवाद साम्य भयो?
पार्टीमा देखिएको विवाद साम्य भयो। अरु समस्याहरु विधान अधिवेशन र महाधिवेशनबाट टुंगो लगाउँछौं।
उपेन्द्र यादव अल्पमतमा परेपछि मुख्यालय बनाउनेदेखि अशोक राईको टिकटमा हस्ताक्षर चल्ने व्यवस्था गरिएको भन्ने छ नि?
त्यस्तो हुँदै होइन। पार्टीमा विगतदेखि त्यो अधिकार अरुलाई पनि दिएको स्थिति हो। यसअघिको चुनावमा महासचिव रामसायप्रसाद यादवको टिकटमा हस्ताक्षर चल्ने व्यवस्था गरिएको थियो। पार्टी भनेको सामूहिक नेतृत्वको अभिव्यक्ति हो। त्यसैले पार्टीमा सामूहिकता झल्कियोस् भनेरै निर्णय भयो। त्यसैले उपेन्द्र यादव अल्पमत वा बहुमतमा परेको भन्ने कुरै होइन। सर्वसम्मत रुपमा निर्णय गरेका छौं।
तपाईंहरु स्थानीय चुनावमा गठबन्धन बनाएर जानुहुन्छ कि एक्लै जानुहुन्छ?
आवश्यकताका आधारमा स्थानीय चुनावमा जान्छौं। सबै स्थानीय तहमा गठबन्धन हुने स्थिति छैन। जहाँ गठबन्धनको आवश्यकता देखिन्छ, त्यहाँ गठबन्धन बनाएर जान्छौं। जहाँ हुँदैन त्यहाँ एक्लाएक्लै भिडेर जान्छौं। केही महानगर, उपमहानगर, नगरपालिकामा केन्द्रबाटै तालमेल गरेर जाने हुन सक्छ। त्यो पनि स्थानीय नेतृत्वले तालमेल गर्ने देख्छ भने तालमेल हुन्छ। तालमेल गर्ने देख्दैन भने हुँदैन। स्थानीय निर्णयलाई केन्द्रले अनुमोदन मात्रै गर्ने हो।
तपाईंकै पार्टीबाट जनप्रतिनिधिहरु अहिले अरु पार्टीमा प्रवेश गरिरहेका छन्। यस्तो अवस्थामा एक्लै चुनाव लडेर जित्न सकिन्छ?
चुनावका बेला सबै पार्टीमा यस्ता छिटफुट घटनाहरु हुने गर्छन्। पार्टीमा आउने–जाने क्रम जारी रहन्छ। यस्ता कुराहरु व्यक्तिले भन्दा संगठनले तय गर्छ। यसरी एउटा व्यक्ति अर्को पार्टीमा जाँदा क्षति त हुन्छ। जहाँ–जहाँ जसपाको संगठनको आधार छ, त्यहाँ हामी राम्रैसँग विजयी हुन्छौं। धेरै साथीहरुको ग्राउण्डबाट एकल रुपमै चुनावमा जानु पर्छ भन्ने सुझाव आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
