जनता समाजवादी पार्टीको केन्द्रीय कार्यकारिणी समितिको बैठक जारी छ। विभिन्न चार अजेन्डामा छलफल गरिरहेको बैठक हिजोदेखि सुरु भएर आज सकिँदैछ। उसको यो बैठक मुख्यतयाः आगामी स्थानीय तहको निर्वाचनलाई केन्द्रित छ। स्थानीय तहको निर्वाचनमा पार्टीको रणनीतिदेखि पछिल्लो समय पार्टीभित्र रहेको भनिएको विवादका विषयमा जसपाका प्रचार विभाग प्रमुख डम्बर खतिवडासँग नेपाल लाइभले गरेको कुराकानी :
जसपाको केन्द्रीय कार्यकारिणी समितिको बैठक जारी छ। हिजो र आज के-के विषयमा छलफल केन्द्रित छ?
२८ गते हाम्रो संघीय परिषद्को बैठक भएको थियो। त्यसमा बाबुराम भट्टराईले राजनीतिक प्रतिवेदन प्रस्तुत गर्नुभयो। राजनीतिक विषय त्यही नै हो। पार्टीको केन्द्रीय कमिटी बैठकमा छलफल गर्नका लागि मुख्यतया: चारवटा एजेन्डाहरु थिए। पहिलो, स्थानीय निकायको निर्वाचन र निर्देशिका हो। जसलाई हामीले हिजो नै छलफल गरेर पारित गरिसक्यौं।
दोस्रो, आज केन्द्रीय सदस्यहरुको कार्यविभाजन हो। त्यसमा केन्द्रित छौं। निर्वाचनसम्मका लागि ७५३ वटै गाउँपालिका, नगरपालिकालाई लक्षित गरेर केन्द्रीय सदस्यको कार्यविभाजन हुनेछ। तेस्रो, पार्टीको आगामी विधान अधिवेशनको कार्य विधिबारे छलफल हो। चौंथो, केही समयसामयिक प्रस्तावहरु पारित गर्ने भन्ने हो। यिनै विषयमा छलफल केन्द्रित भइरहेका छन्।
यी सबैमध्ये महत्त्वपूर्ण स्थानीय तहको निर्वाचन नै होला। निर्वाचनमा तालमेल गरेर जानुहुन्छ कि एक्लाएक्लै जानुहुन्छ?
हाम्रो बुझाइ के हो भने हाम्रो कारण वा निर्णयले मात्रै अन्तिम हुन्छ भन्ने हुँदैन। गठबन्धनमा रहेका दलका पार्टीका नेताहरुको धारणा के छ भन्ने कुरा पनि महत्त्वपूर्ण नै हो। राष्ट्रिय जनमोर्चाबाहेक अहिले चार दल छौं। उहाँहरुको एमसीसीको विषयमा मात्रै विमत्ति थियो तर, चुनावमा सहकार्य गरेर जादैनौँ भन्नुभएको छैन। अन्य दलहरुको पनि धारणा के हो भन्ने कुरा प्रष्ट भएको छैन। हिजोको बैठकबाट हामीले केही निर्देशिका पारित गरेका छौं। हामीले के आधारबाट निर्देशिका पारित गर्यौं भने स्थानीय तहको निर्वाचनमा केन्द्रीयस्तरको गठबन्धन देशभरि नै आमरुपमा सम्भव छैन। खास-खास ठाउँ महानगर र उपमहानगरमा मात्रै गठबन्धन हुन सक्छ। त्यसको अधिकार केन्द्रीय समितिमा रहन्छ। बाँकी सबै अधिकार स्थानीय कमिटीलाई दिएका छौं। जिल्ला र पालिकास्तरका कमिटी हुन्। जहाँ एक्लै जितिन्छ त्यहाँ साथीहरुले एक्लै लड्ने निर्णय गर्नुहुन्छ।
गठबन्धन गर्दा कुन पार्टीसँग गर्ने भन्ने तय भयो कि भएन?
गठबन्धन यो पार्टीसँग गर्ने, यो पार्टीसँग नगर्ने भन्ने छैन। सबैतिर खुला छौं। यसको निर्णय गर्ने सबै अधिकार स्थानीय कमिटीलाई छाडिदिएका छौं। कुन पार्टीले गठबन्धन गर्न चाहन्छ, कसले चाहँदैन, अवस्था के छ? के लिने वा के दिने? सबै स्थानीय कमिटीले मूल्यांकन गर्छन्। त्यसैले खास पार्टीसँग मात्रै गठबन्धन गर्ने भन्ने छैन।
जसपाका नेता र जनप्रतिनिधि एमालेमा गइरहेका छन्। यसलाई कसरी लिनुभएको छ?
लोकतन्त्रमा पार्टी रोज्ने अधिकारका पक्षपाति हौं। लोकतन्त्र भनेको नागरिकको सार्वभौमस सत्ता हो। मन लागे पार्टीमा बस्छन्, नलागे छाड्छन्। मन लागे भोट दिन्छन्, मन नलागे भोट दिँदैनन्। त्यसमा हाम्रो आपत्ति कहिल्यै पनि हुँदैन। जहाँसम्म हाम्रा केही साथीहरुले छोड्नुभयो भन्ने कुरा छ। त्यसमा त व्यक्तिगत मनोविज्ञान होला उहाँहरुको। त्यसमा मैले टिप्पणी गरिरहनु उचित हुन्छ जस्तो लाग्दैन।
सत्ता गठबन्धनका दलहरुबीच तालमेल नहुने स्थिति बन्यो भने जसपाले के गर्छ?
जसपा एक्लै पनि चुनाव लड्छ। जति सक्छ, लड्छ। त्यसको तयारी हामीले सुरु गरिसकेका छौँ। सरकार चलाउने गठबन्धन भन्नु र चुनाव लड्ने गठबन्धन भन्नु बेग्लाबेग्लै हो। सरकार चलाउने गठबन्धनले चुनाव पनि गठबन्धन बनाएरै लड्नुपर्छ भन्ने छैन।
एक्लै चुनाव जित्छौँ भन्ने आत्मविश्वास छ?
लोकतन्त्र हो। ७५३ पालिकामा सबै जित्छौँ भन्ने होइन। त्यस्तो दाबी गर्नु हास्यास्पद पनि हुन्छ। यो त बहुदलीय प्रणाली हो। मलाई लाग्छ, सात सयभन्दा बढी पालिकाहरुमा हामी शानदार प्रतिस्पर्धा गर्न सक्छौँ। यद्यपि, हार्न पनि सक्छौँ, जित्न पनि सक्छौँ। तर, प्रतिनिधित्वको संघर्षचाहिँ हामी सजिलै गर्न सक्छौँ। तर, चर्चा गरिएजस्तो कमजोर संस्था होइन हाम्रो। पहाडतिर केही कमजोर होला। त्यहाँ पनि सबै जिल्लाहरुमा एउटै स्थिति होइन। त्यसैले हामीलाई एक्लै चुनाव लड्न पनि खासै गाह्रो छैन।
पार्टीमा संघीय परिषद् अध्यक्ष डा बाबुराम भट्टराई र केन्द्रीय समिति अध्यक्ष उपेन्द्र यादवबीच खटपटको चर्चा पनि छ। त्यस्तो अवस्था हो र?
तीन महिनायता मिडियाहरुले लेखेको देख्छु। तर, हामीभित्रको आन्तरिक आयाम खासै त्यस्तो थिएन। म पार्टीको प्रचार विभाग प्रमुख पनि हुँ। तीन महिनादेखि मिडियाले सोध्दा मैले बारम्बार एउटै कुरा भनिरहेको छु, तपाईंहरु जसपा फुट्दैछ र फुटको संघारमा भनेर पनि लेख्नुभयो। तर, त्यो गलत साबित भयो भने त लेख्नेहरुलाई पनि मजा भएन। त्यसैले अड्कलेर लेख्नुस् भनेर भन्ने गरेको थिएँ। मैले पार्टी फुट्ने कुनै सम्भावना पनि देखेको थिइनँ। मलाई अहिले पनि पूर्ण आत्मविश्वास छ, यो पार्टी एकताबद्ध भएरै अगाडि बढ्छ।
विवाद त भएकै हो नि?
हेर्नुस्, लोकतन्त्रमा विवादका दुई–तीन वटा रुपहरु हुन्छन्। एउटा, राष्ट्रिय महत्त्वका विषयहरुमा। जस्तै एमसीसी। त्यस्ता विषयमा मानिसहरु बाँडिन सक्छन्। एउटै पार्टीका मानिसहरु पनि बाँडिन सक्छन्। अर्को, पार्टी पार्टीबीचका बहसहरुमा। अर्को, पार्टीभित्रका बहसहरुमा। यी तीन फरकफरक विषयहरु हुन्। केही बहस हामीभित्र थिए। तर, पछिल्ला १०/१५ दिनयता त्यस्ता विषयहरुलाई हामीले टुंग्याएका छौँ। र, अब यो पार्टी एकताबद्ध भएर चुनावमा जान्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768538433.png)
-1764146706.png)
-1768395492.png)
