काठमाडौं– मलेसियामा करार अवधि सकिएपनि स्वदेश नफर्की काम गरिरहेका कामदारलाई मलेसियास्थित नेपाली राजदूतावासले स्वदेश फर्कन आग्रह गरेको छ। मलेसिया सरकारले अवैधानिक आप्रवासी कामदारलाई वैधानिक बन्न दिएको समयसीमा सकिएकाले दूतावासले विज्ञप्तिमार्फत त्यस्ता नेपाली कामदारलाई तोकिएको समयमै स्वदेश फर्कन आग्रह गरेको हो।
मलेसियाको अध्यागमन विभाग र गृह मन्त्रालयले अवैधानिक रुपमा बसेर काम गरिरहेका आप्रवासी कामदारलाई धरपकड गर्ने भन्दै दूतावासले करार अवधि सकिएर काम गर्दै बसेका नेपाली कामदारलाई समयमै स्वदेश फर्किन आग्रह गरेको हो। अवैधानिक तबरबाट बसेको भेटिएमा प्रहरीको फन्दामा पर्ने भन्दै दूतावासले सचेत गराएको छ।
मलेसियाको अध्यागमन विभागले अवैधानिक रुपमा बसेर काम गरिरहेका आप्रवासी कामदारलाई वैधानिक हुनका लागि दिएको समयसीमा सकिए पनि स्वदेश फर्किन सन् २०१८ अगस्ट ३० सम्मको समय दिएको दूतावासले विज्ञप्तिमार्फत जानकारी गराएको छ। दूतावासले मलेसियामा अवैधानिक बसेर काम गरिरहेका नेपालीलाई समय अघिनै स्वदेश फर्किन बारम्बार आग्रह गर्दै आएको छ।
मलेसिया सरकारले अवैधानिक कामदारलाई आइतबारदेखि खोजेर पक्राउ गर्ने जानकारी सम्बन्धित देशका कुटनीतिक नियोगमा गराइसकेको छ।
मलेसिया सरकारले सन् २०१६ देखि अवैधानिक आप्रवासी कामदार र रोजगारदातालाई विवरणसहित दर्ता प्रक्रियामा आउन पटक–पटक अपिल गर्दै आएको छ। वैधानिक बन्न दिएको समयमा दर्ता प्रक्रियामा छुटेका अथवा नआएका अवैधानिक आप्रवासी कामदारलाई अब स्वदेश फर्किनुको विकल्प नभएको पनि मलेसिया सरकारले स्पष्ट पारेको छ। दोषी कामदार र रोजगारदातालाई ५० हजार रिंगिट जरिवाना, ५ वर्ष जेल एवम् दुबै सजाय गर्न सकिने मलेसियाको अध्यागमन विभागले जनाएको छ।
मलेसियामा १ लाखभन्दा बढी नेपाली अवैधानिक रुपमा काम गरिरहेका हुनुुसक्ने सरकारी अनुमान छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
