काठमाडौं– कामको खोजीमा विदेशिने युवाको संख्यामा मासिक रुपमै गिरावट आएको छ। चैत महिनादेखि रोजगारीको खोजीमा विदेशिने कामदारको संख्या घट्दै गएको वैदेशिक रोजगार विभागले जनाएको छ।
गत बैसाख महिनामा ३६ हजार ७ सय ७८ जना नेपाली कामदार श्रम स्वीकृति लिएर संस्थागत रुपमा(इजाजत प्राप्त म्यानपावर कम्पनीमार्फत) विभिन्न देश गएका थिए। बैसाखको तुलनामा जेठ महिनामा यसरी विदेश जाने कामदारको संख्यामा १२ हजारले कमी आउँदै २४ हजार ६ सय ७० जनामा झरेको विभागको तंथ्याकमा उल्लेख गरिएको छ। बैसाखको तुलनामा जेठमा १२ हजार १ सय ६६ जना कम कामदार विदेशिएका छन्।
चैत्र महिनामा ३१ हजार ६ सय १५ जना वैदेशिक रोजगारीमा गएको विभागको तंथ्याकमा उल्लेख छ। चालु आर्थिक वर्षको ११ महिनामा ४ लाख ९० हजारभन्दा बढी नेपाली युवा रोजगारीको खोजीमा विभिन्न देश गएको पनि विभागले जनाएको छ।
नेपाली युवाको प्रमुख गन्तव्य मुलुक मलेसिया जाने कामदारको संख्यामा ठूलो गिरावट आएपछि समग्र विदेशिने कामदारको संख्यामा उल्लेख्य कमी आएको वैदेशिक रोजगार विभागका प्रवक्ता उद्धवराज रिजालले बताए। धेरै वर्षपछि देशले स्थिर सरकार पाएकाले देशमै केही गर्नुपर्छ भन्ने युवाहरुमा मनोभाव बढ्दै गएकाले विदेशिनेको संख्यामा कमी आएको उनको भनाइ छ।
श्रम रोजगार तथा सामाजिक सुरक्षा मन्त्रालयले रोजगारीमा मलेसिया जाने कामदारमाथि आर्थिक भार थप्दै आएका विभिन्न संस्था खारेज गर्ने निर्णयसँगै त्यहाँ जाने श्रमिकको श्रम स्वीकृति दिने कार्य स्थगित भएको थियो। मन्त्रालयले गत जेठ महिनादेखि मलेसिया जान रोक लगाए पनि करिब ५ हजार कामदार जेठ महिनामा नै मलेसिया पुगेको विभागको तंथ्याकमा उल्लेख छ। अन्तिम श्रम स्वीकृति लिएर उडान तयारी अवस्थामा रहेका कामदार मलेसिया गएको श्रम कार्यालय ताहाचालको भनाइ छ।
बैसाख महिनादेखि नै मलेसिया जाने नेपाली कामदारको संख्या घट्दै गएको थियो। बैसाख महिनामा ४ हजार ३ सय ९६ जना नेपाली कामदार मलेसिया गएका थिए भने जेठमा त्यसभन्दा केही बढी ४ हजार ८ सय १ जना त्यहाँ पुगेको विभागको तंथ्याकमा उल्लेख छ। विभागकै तंथ्याक हेर्ने हो भने सरकारले मलेसियाको श्रम स्वीकृति रोक्नुअघि करिब मासिक १० हजारभन्दा बढी संस्थागत रुपमा मलेसिया जाने गरेका थिए। चालु आर्थिक वर्षको पछिल्लो ११ महिनामा ९८ हजारभन्दा बढी युवा रोजगारीका लागि मलेसिया पुगेको सरकारी तंथ्याकमा छ।
जेठ महिनामा कतारमा सबैभन्दा धेरै नेपाली कामदार गएका छन्। जेठ महिनामा ८ हजार १ सय ६६ जना संस्थागत रुपमा कतार गएका हुन्। दोश्रोमा युएई रहेको छ। उक्त मुलुकमा ४ हजार ८ सय ६९ जना गएको विभागले जनाएको छ। विभागका अनुसार जेठ महिनामा साउदी अरबमा ३ हजार १ सय १५ जना, कुवेतमा २ हजार ४४ जना, बहराइनमा २ सय ८९ जना, ओमानमा ३ सय २ जना, अफगानिस्तानमा ३७ जना र जापानमा १२ जना रोजगारीका लागि गएका छन्। जेठमा यूरोपियन मुलुक पोल्याण्डमा ३ सय ३० जना कामदार रोजगारीका लागि गएको विभागको तथ्यांकमा देखिन्छ।
सरकारले विदेशबाट कामदारको माग ल्याइँदा त्यहाँ रहेको नेपाली नियोगले प्रमाणिकरण गर्नुपर्ने प्रावधान बैसाख अन्तिम सातादेखि लागू गरेसँगै विदेशबाट कामदारको माग घट्दै गएको रोजगार व्यवसायीको आरोप छ। सरकारले कुटनीतिक पहल र छलफल नै नगरी जबरजस्ती निर्णय गर्दा कामदारको डिमान्ड घट्दै गएको उनीहरुको भनाई छ।
गएको आर्थिक वर्ष ६ लाख ५६ हजार नेपाली कामदार वैदेशिक रोजगारीमा विभिन्न देशमा गएका थिए। गत वर्षको तुलनामा यो वर्ष १ लाखभन्दा कम नेपाली विदेशिने सरकारी अनुमान छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
