काठमाडौं– प्रधानमन्त्री केपी शर्मा ओलीले चीनसँग नेपालमा रेल भित्र्याउन सहमति गरेसँगै देशभरि नै अहिले रेलको चर्चा चलेको छ। यही चर्चाका बीच मोनोरेल निर्माणका लागि प्रारम्भिक अध्ययनमा सहभागी भएको एक कम्पनी सर्वोच्च अदालत पुगेको छ।
लगानी प्रवर्द्धन बोर्डले विस्तृत अध्ययनका लागि १० करोड धरौटी माग गरेको भन्दै मोनोरेल कम्पनी प्रालि सर्वोच्च पुगेको हो। सर्वोच्चले बोर्डको बैठकबाट अनुमोदन नभई कार्यकारी निर्देशकले १५ दिनभित्र पैसा जम्मा गर्नू भनी पत्राचार गरेको देखिएको भन्दै मुद्दाको अन्तिम किनारा नलागेसम्म उक्त कार्य यथास्थितिमा राख्न भनेको हो।
न्यायाधीशद्वय ओमप्रकाश मिश्र र पुरुषोतम भणडारीको संयुक्त इजलासले यो मुद्दालाई यथाशीघ्र निर्णय हुन आवश्यक भन्दै प्राथमिकता समेत राखेको छ। सर्वोच्चले दुवै पक्षको लिखित जवाफ परेको १५ दिनभित्र अन्तिम सुनुवाइको पेसी राख्न समेत आदेश गरेको छ।
सर्वोच्चको यो आदेशपछि उक्त कम्पनीले मोनोरेल निर्माणका लागि विस्तृत अध्ययन गर्ने बाटो खुलेको छ।
काठमाडौं चक्रपथभरि २८.५३ किलोमिटरमा मोनोरेल सञ्चालन गर्न सार्वजनिक सूचनाका आधारमा मोनोरेल कम्पनीले लगानी प्रवर्द्धन बोर्डमा आशयपत्र पेश गरेको थियो। उक्त निवेदनमा मोनोरेल एक्लैको प्रस्ताव परेपछि प्रारम्भिक अध्ययनको अनुमति पाई काम समेत गरेको थियो।
अध्ययन सकिए लगत्तै उसले बोर्डलाई विस्तृत अध्ययनका लागि प्रस्ताव पेश गरेको थियो। विस्तृत अध्ययनका लागि दिएको प्रस्तावमा बोर्डका कार्यकारी निर्देशकले सेक्युरिटीका लागि १० करोड रुपैयाँ धरौटी राख्न पत्र लेखेपछि कम्पनी उक्त निर्णय गैरकानुनी भन्दै सर्वोच्च पुगेको हो।
डिपिआर चित्तबुझ्दो नभएमा आफूले जम्मा गरेको १० करोड जफत गर्नेसम्मको सर्त बोर्डले राखेको कम्पनीले दायर गरेको निवेदनमा उल्लेख छ। धरौटी रकम किन राख्नुपर्ने भनी सोधेको प्रश्नमा बोर्ड प्रमुखले कारण दिन उचित नभएको भनी जिकिर गरेकाले सर्वोच्च आउनुपरेको रिटमा उल्लेख छ। गत बैसाख २० गते बोर्डले कम्पनीसँग ठेक्का खारेज गर्ने भनी पत्र पठाएको र उक्त जानकारी आफूहरुले सार्वजनिक सञ्चार माध्यमबाट पाएकाले सर्वोच्चमा रिट दायर गरेको निवेदनमा उल्लेख छ।
२०७३ असारमै सम्भाव्यता अध्ययन सकेर प्रतिवेदन बुझाई विस्तृत अध्ययनको डिपिआर समेत पेश गरेको अवस्थामा एकपक्षीय रुपमा लगानी बोर्डका प्रमुखले यस्तो निर्णय गरेको रिटमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_bCQoRa7C09-1776741913.jpg)
-1764146706.png)
