राजविराज– असार १० गतेभित्र आगामी आर्थिक वर्षको बजेट ल्याउनुपर्ने कानुनी व्यवस्थालाई लत्याएर अघि बढेको भन्दै राजविराज नगरपालिकाका विरुद्ध आन्दोलनको घोषणा भएको छ। पूर्वमेयर तथा स्थानीय तह निर्वाचनका मेयर पदका उम्मेदवारहरुको सोमबार सम्पन्न संयुक्त बैठकले नगरपालिकाविरुद्ध आन्दोलन गर्ने निर्णय गरेको हो।
अन्तर–सरकारी वित्त व्यवस्थापन ऐन, २०७४ ले प्रत्येक वर्ष असार महिनाको १० गतेभित्र आगामी आवको राजस्व र व्ययको अनुमान सम्बन्धित गाउँ वा नगरसभामा पेस गर्नुपर्ने व्यवस्था गरेको छ। परिच्छेद ७ को दफा २१ को उपदफा ३ मा भएको उक्त व्यवस्थाविपरीत सप्तरीमा भने ९ नगरपालिका सहित १८ वटै स्थानीय तहले बजेट सार्वजनिक गरेका छैनन्। सोही सन्दर्भमा बसेको संयुक्त बैठकले राजविराज नगरपालिकाविरुद्ध आन्दोलन गर्ने निर्णय गरेको बैठकका सहभागी पूर्वमेयर गोविन्द सिंहले बताए।
स्थानीय तहको निर्वाचनमा एमालेका तर्फबाट मेयरका प्रत्यासी रहेका सुखराम यादवले असार १० गतेभित्रै बजेट ल्याउनुपर्ने कानुनी व्यवस्था रहे पनि मेयर शम्भुप्रसाद यादवले सो व्यवस्थाको धज्जी उडाउँदै हालसम्म पनि प्रक्रिया अघि नबढाएको बताए।
संघीय 8वादी फोरम नेपालका मेयर पदका उम्मेदवार भीमराज यादवले नगरपालिकाले हालै गरेको आन्तरिक कर निर्धारण प्रक्रियामा समेत कसैलाई सहभागी नगराई मनोमानी ढंगले कर निर्धारण गरी नगरवासीको ढाड सेक्ने काम गरेको आरोप लगाए।
पूर्वमेयरहरु गोविन्द सिंह, अनिस अन्सारी तथा स्थानीय तह निर्वाचनमा राजविराज नगरपालिकाको मेयर पदका उम्मेवदारहरु ध्रुव देव, सुखराम यादव, भीमराज यादव तथा मीना ठाकुर लगायत सहभागी बैठकले असार १३ गते राजविराज हटियामा भण्डाफोर र खबरदारीसभा तथा असार १४ गते नगरपालिकामा ध्यानाकर्षणपत्र बुझाउने निर्णय गरेको छ।
यसैगरी, विकास निर्माणमा भइरहेको आर्थिक अनियमितता, मनपरी कर संकलन तथा फोहोर मैला व्यवस्थापनमा बेवास्ता लगायतका विषयलाई पनि आन्दोनलको एजेन्डाका रुपमा अघि बढाउने बैठकले निर्णय गरेको सहभागीहरुले बताए।
राजविराज नगरपालिकाका मेयर शम्भुप्रसाद यादवले भने योजना छनौटमै ढिलाइ भएका कारण बजेट ल्याउन ढिला भएको बताए। जतिसक्दो चाँडो प्रक्रिया पूरा गरी बजेट ल्याउने तयारी भइरहेको उनले बताएका छन्। राजविराज नगरपालिकाबाहेक अन्य कतिपय स्थानीय तहमा भने कर्मचारीको बेवास्ता र गैरजिम्मेवारीका कारण बजेट आउन ढिला भएको पाइएको छ।
सप्तकोशी नगरपालिकाका मेयर उत्तमकुमार गौतमले प्रमुख प्रशासकीय अधिकृत राजकुमार चौलागाईको गैरजिम्मेवारीका कारण योजना छनौटदेखि अन्य तयारी पूरा गर्न नसकिएका कारण बजेटमा ढिलाइ भएको बताए। ‘कर्मचारीको केन्द्रीय मानसिकताका कारण नगरको बजेट प्रभावित भयो,’ गौतमले भने, ‘बजेट ल्याउनुपर्ने महत्वपूर्ण समयमा प्रमुख प्रशासकीय अधिकृत छुट्टी स्विकृत नै नगरी घर पुगेका छन्।’
प्रथम नगरसभामा समेत कुनै जिम्मेवारी पूरा नगरेका चौलागाईले दोस्रो नगरसभा सम्पन्न गर्नुपर्ने दायित्वलाई लत्याएर घर हिँड्नु गैरजिम्मेवारीको पराकाष्ठा भएको उनको भनाइ छ। ‘बजेटको काम नसकी कसैले छुट्टी नलिने निर्देशनविपरीत प्रमुख प्रशासकीय अधिकृत भागेर घर पुगेका छन्,’ उनले थपे।
डाकनेश्वरी लगायतका अन्य नगर/गाउँपालिकमा भने आवश्यक जनशक्तिको अभावका कारण तयारी नै नपुगेकाले तोकिएको समयमा बजेट ल्याउन नसकिएको सम्वन्धित मेयर/अध्यक्षहरुले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
