विराटनगर– विराटनगर महानगरपालिकाले आर्थिक वर्ष २०७५/०७६ का लागि ४ अर्ब ४७ करोड ८ लाख ४९ हजार रुपैयाँको बजेट सार्वजनिक गरेको छ।
महानगरपालिकाका मेयर भीम पराजुलीले प्रस्तुत गरेको बजेटमा आन्तरिक स्रोतबाट ५४ करोड ३ लाख, राजस्व बाँडफाडबाट ३७ करोड ५ लाख ४ हजार, संघीय र प्रदेश सरकार वित्तीय समानिकरण अनुदानबाट ५३ करोड ८७ लाख ९५ हजार, विषयगत कार्यालयबाट ४४ करोड ९६ लाख, विशेष र समपुरक अनुदानबाट १० करोड, संघीय सरकार सशर्त अनुदान शिर्षकबाट ३६ करोड १५ लाख, वैदेशिक तथा अन्य संघसंस्था अनुदानबाट ४ करोड ४६ लाख ५० हजार, जनसहभागिताबाट ३ करोड ५० लाख, नगरविकास कोष ऋण सहयोग कार्यक्रममबाट १ करोड ८० लाख र नगर मौज्दात ७ करोड गरी कुल २ अर्ब ५२ करोड ८३ लाख ४९ हजार रुपैयाँ आयआर्जन हुने अनुमान गरिएको छ।
चालु खर्चका लागि कुल बजेटको ७ दशमलब ५३ प्रतिशत अर्थात ३३ करोड ६८ लाख ५२ हजार रुपैयाँ बजेट विनियोजन गरिएको छ। सामाजिक सुरक्षा भत्ताका लागि २० करोड रुपैयाँ विनियोजन भएको छ भने भौतिक पूर्वाधारतर्फ ३ अर्ब २५ करोड ३ लाख ३३ हजार रुपैयाँ बजेट विनियोजन भएको छ।
वातावरण, सरसफाई, वित्तिय व्यावस्थापन, सूचना प्रविधि, संस्थागत विकास, सेवा प्रवाह र सुशासनका लागि ५ करोड ९३ लाख ३० हजार रुपैयाँ बजेट विनियोजन भएको छ भने सामाजिक विकास, महिला तथा बालबालिका, स्वास्थ्य, शिक्षा, कृषि तथा पशुपन्छी कार्यक्रमका लागि ६२ करोड ४३ लाख ३४ हजार रुपैयाँ बजेट छुट्याइएको छ।
एसियाली विकास बैंकको ऋण सहयोगमा सञ्चालित २ परियोजनातर्फ १ अर्ब ९४ करोड २५ लाख गरी बजेटको कुल आकार ४ अर्ब ४७ करोड ८ लाख ४९ लाख पुगेको महानगरपालिकाले जनाएको छ।
शहर ब्यवस्थापन, बाढीका कारण समस्यामा परेका पीडितको व्यवस्थापन, खोला नियन्त्रण, सूचना प्रविधि तथा पर्यटनको विकासमा बजेटले जोड दिएको छ।
विराटनगर महानगरपालिकाले आगामी आर्थिक वर्षका लागि बजेटसँगै ‘सफा, सुन्दर, सुरक्षित र सक्षम विराटनगर’ नारा सहितको नीति तथा कार्यक्रम पारित गरेको छ। नीति तथा कार्यक्रममा सुशासन, शिक्षा, स्वास्थ्य, कृषि तथा गरिवी निवारणलाई प्रमुख आधार बनाइएको मेयर पराजुलीले बताए।
महानगरपालिकाले सार्वजनिक गरेको निती तथा कार्यक्रममा २ वर्ष भित्रमा विराटनगरको सबै कच्ची सडकमा ग्राभेल गरी महानगरलाई हिलोमुक्त बनाउने योजना छ।
त्यस्तै महानगर क्षेत्रमा ३ वटा अन्तराष्ट्रिय मापदण्डको पौडी पोखरी निमार्ण गर्ने र सहीद रङ्गशालामा रात्रिकालीन खेलकुद सञ्चालनको लािग ‘फ्लड लाइट’ जडानको लागि प्रदेश सरकारसँग सहकार्य गरिने कार्यक्रममा उल्लेख छ।
निती तथा कार्यक्रममा विराटनगर १५ र १९ नम्बर वडामा रहेको प्राथामिक स्वास्थ्य केन्द्रलाई १५ शय्याको नगरस्तरीय अस्पतालमा स्तरोन्नती गर्ने योजना अगाडी सारिएको छ। स्थानीय स्तरमै सेवाग्राहीलाई सहज रुपमा सेवा प्रदान गर्न नगरस्तरीय अपस्तालको रुपमा स्तरोन्नती गर्ने योजना ल्याइएको पराजुलीले बताए।
नगरबासीको लागि निःशुल्क मोतिविन्दु रोगको उपचार गर्ने व्यवस्था मिलाएको छ। विराटनगरमा रहेको कोशी अञ्चल अस्पताललाई प्रदेशस्तरको अस्पताल तथा मेडिकल कलेज बनाउने दीर्घकालीन योजनाका लागि प्रदेश सरकारसँग आवश्यक सहकार्य गर्ने कार्यक्रममा समेटिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
