काठमाडौं- काठमाडौं महानगरपालिकाले आगामी आर्थिक वर्ष २०७५/०७६ को बजेट ल्याएको छ।
महानगरपालिकाले आगामी आर्थिक वर्षमा सार्वजनिक–निजी साझेदारी (पिपिपी) मा सम्पन्न गर्नेगरी विभिन्न पूर्वाधार निर्माणलाई प्राथमिकता दिएको छ। पिपिपी मोडलमा विभिन्न प्रकारका सेवा तथा सुविधा विस्तार गर्ने तथा विभिन्न सरकारी तथा गैरसरकारी निकायसँग साझेदारी गरी विकास-निर्माण अगाडि बढाउने विषयलाई प्राथमिकतामा राखेको महानगरपालिकाले जनाएको छ।
महागरपालिकाले मोनोरेल, इलेक्ट्रिक बस, सम्पदा पुन:निर्माण, फ्लाई स्काइ ब्रिज निर्माण, इ–ट्वाइलेट, इ–पार्किङ निर्माणका लागि पूर्व सम्भाव्यता अध्ययन तथा विस्तृत आयोजना प्रतिवेदन (डिपिआर) तयार गर्न बजेट छुट्याएको छ। त्यस्ता आयोजनाका लागि सम्भाव्यता र डिपिआर गर्न महानगरले १५ करोड १० लाख विनियोजन गरेको छ। जस अन्तर्गत १० करोड रुपैयाँ शहरी यातायातका लागि विनियोजन गरेको बजेटमा उल्लेख छ।
त्यस्तै, महानगरले आफ्नो कार्यालयबाट प्रवाह गरिने सेवालाई छिटो-छरितो, प्रभावकारी र गुणस्तरीय बनाउन केन्द्रीय प्रशासनिक भवन (हरिहरभवन) को नयाँ निर्माण, वडा कार्यालयहरूको भवनको पुन:र्निर्माण, महानगरपालिकाका लागि आवश्यक सवारी, फोहोर बोक्ने ठूला गाडी लगायत अन्य हेभी इक्विपमेन्ट खरिद लगायतका लागि २ अर्ब ३६ करोड रुपैयाँ विनियोजन गरेको छ।
काठमाडौं महानगरपालिकाले आइतबार भएको नगरसभाको तेस्रो अधिवेशनमा आगामी आर्थिक वर्ष २०७५/०७६ का लागि १३ अर्ब २ करोड १२ लाख रुपैयाँ विनियोजन गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
