आफ्नै खर्चमा कुस्ती खेलाडी च्याम्पियनसिप खेल्न नर्वे पुगेको खुलासा

अन्य

दीप सुवेदी बिहीबार, कात्तिक ४, २०७८ १२:४०

काठमाडौं- नेपाल कुस्ती संघले नर्वेमा आयोजना भएको विश्व कुस्ती च्याम्पियनसीपमा खेलाडीबाटै पैसा उठाएको रहस्योद्घाटन भएको छ। २–१० अक्टोबरसम्म नर्वेको ओस्लोमा आयोजना भएको प्रतियोगितामा नेपालबाट सुमिरकुमार साह र सुरेश चुनाराले भाग लिएका थिए।

उनीहरूसँगै व्यवस्थापकमा साहिल अन्सारी र मुख्य प्रशिक्षक धर्मराज यादव पनि संलग्न थिए। उनीहरूले प्लेन टिकट, पीसीआर परीक्षण, होटल र इन्सुरेन्सको खर्च आफैले तिरेका थिए।

सुमिरले ९७ केजी तथा सुरेशले ७४ केजीमा प्रतिस्पर्धा गरेका थिए। नर्वे जाने खेलाडी १२ भदौमा सातदोबाटोस्थित कुस्ती हलमा छनोट भएको दावी संघको छ।

यसमा सुमिर र सुरेशसहित ११० केजीमा राज यादव र ६१ केजीमा भागवत साह पनि छनोट भएका थिए। तर, राज र भागवतलाई पैसा नदिएका कारण प्रतियोगितामा समावेश गराइएन।

संघका अध्यक्ष राज मोहम्मद अन्सारीले छनोट भएका खेलाडीलाई नर्वे लैजान नसक्ने तर, खेलाडी आफैले खर्च बेहोरे लैजाने बताएका थिए।

‘छनोट भएका सबै खेलाडीलाई नर्वे जाने भए पैसा डिपोजिट गर्नु, नत्र हामी आफ्नै खर्चमा तिमीहरूलाई पठाउन सक्दैनौ भनेर अध्यक्षले भन्नुभयो, त्यसपछि केही खेलाडी गए, केही गएनन्,’ संघका एक पदाधिकारीले नेपाल लाइभलाई बताए,‘ विभागीय टोलीबाट खेल्ने भागवतले आफूले खर्च बेहोर्न नसक्ने भन्दै बारम्बार अध्यक्ष अन्सारीलाई भन्दा उनले वास्ता नै गरेनन्।’

भागवत राष्ट्रिय टोलीका प्रभावशाली खेलाडी हुन्। उनले आठौं राष्ट्रिय खेलकुदमा कुस्तीतर्फ स्वर्ण जितेका थिए। उनको आर्थिक स्थिति कमजोर छ। त्यसैले उनले आफ्नो विभागलाई चिट्ठी लेख्न आग्रह गरेका थिए। तर, अध्यक्ष राज मोहम्मदले वास्ता नगरेपछि उनी नर्वे जानबाट बञ्चित भए।

‘किन लेख्नु भएन थाहा भएन। उनले काम गर्ने ठाउँमा चिट्ठी लेखिदिएको भए पैसा उतैबाट जुगाड पनि हुनसक्थ्यो। तर, संघले नै बेवास्ता गर्दिँदा उनी नेपाल मै रहे,’ ती अधिकारीले बताए।

भाइ नै व्यवस्थापक बनेर उडे, राखेपलाई पत्तो छैन
नेपालको राष्ट्रिय टोली अन्तर्राष्ट्रिय प्रतियोगिता खेल्न जाँदा राष्ट्रिय खेलकुद परिषद् (राखेप)बाट अनिवार्य स्वीकृति लिनुपर्ने प्रावधान छ। तर, कुस्ती संघ अध्यक्ष अन्सारीले राखेपबाट स्वीकृति नलिइकनै खेलाडी उडाए।

‘उहाँ एकपल्ट राखेप आउनु भएको थियो। तर, खेलाडी छनोट कहाँ र कहिले भयो भन्ने जानकारी खुलाउन सक्नुभएन,’ राखेपका एक कर्मचारीले नेपाल लाइभसँग भने।

अध्यक्ष अन्सारीले प्रतियोगितामा सहभागी गराउन भन्दै ७ जनाको लिस्ट बोकेर आएको र आर्थिक चाँजोपाँजो मिलाइदिन आग्रह गरेको राखेपका एक कर्मचारीले बताए।

‘हामीले खेलाडी विदेश लैजान र राखेपबाट पैसा स्विकृत गराउन सबै कुरा खुलाउन पर्ने प्रावधान रहेको बताएपछि उहाँ आउनु भएन,’ उनले भने, ‘१० लाखभन्दा बढी पैसाको कुरा सदस्य-सचिवसँग गर्नु भनेर हामीले फर्काएका थियौं।’

संघले व्यवस्थापकको भूमिकामा पठाएका साहिल अन्सारी नाताले अध्यक्ष अन्सारीका भाइ भएको खुलेको छ। उनी केही समय अघिसम्म पौडी संघमा आवद्द भएका थिए। पौडी संघमा हुँदा पनि उनी विवादित भएको राखेप स्रोत बताउँछ।

‘पौडी संघमा हुँदा थुप्रै विवाद खडा गरेका थिए। तर, २०६६ मा संघ पुनर्गठन गर्दा उनलाई कुस्ती संघको सचिव बनाइएको थियो। यता, पनि व्यवस्थापक बनेर विदेश गएको भन्दै बेलाबखत विवादमा तानिने गर्छन्,’ एक पदाधिकारीले भने।

कमजोर संघ, कसबाट पैसा उठाउने?
अध्यक्ष अन्सारीले भने आफूमाथि लागेको आरोपको स्पष्टीकरण दिँदै भने, ‘संघ पुनर्गठन पश्चात नै आर्थिक समस्या छ।’ उनले एउटा संघ बिघटन भएर अर्को हुँदा सरकारले सहयोग नगरेको कारण खेलाडीबाट पैसा उठाउनु परेको स्वीकार गरे।

‘संघ टुक्रिएपछि हामीलाई राखेपले दिँदै आएको रकम रोक्का हुँदै आएको छ। आफ्नै गोजीको पैसा खर्च गरेर सम्भव नहुने भएका कारण केही मात्रामा पैसा उठाएको हुँ,’ उनले भने।

उनले प्रतियोगितामा सहभागी हुन आर्थिक सहयोग माग गर्दै राखेप सदस्य-सचिव रमेश सिलवाल कहाँ गएको तर, सदस्य-सचिवले टिकटको खर्च मात्र बेहोर्ने, अन्य खर्च बेहोर्न नसक्ने बताएपछि आफूले खेलाडीसँगै पैसा उठाउनु परेको बताए।

‘सदस्य-सचिवले अन्य खर्च बेहोर्न नसक्ने बताएपछि खेलाडीसँग कुरा गर्दा उनीहरूले आफ्नो खर्च आफैले उठाउने बताएपछि पैसा उठाएको हुँ। दबाब दिएको छ्रैन,’ उनले दावी गरे।

उनले ठूलो प्रतियोगितामा एक–डेढ लाख खर्च हुनु सामान्य भएको भन्दै नेपाल लाइभसँग भने, ‘हाम्रो आउने बाटो नै माथिबाट बन्द भएको छ। यसरी बाटो नै बन्द गराइदिँदा हामीलाई असर गर्छ नै। आउने दिनमा राखेपले सहयोग नगरे संघ सञ्चालन गर्न गाह्रो छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।