आईसीसी क्रिकेट विश्वकप लिग–२ अन्तर्गत् अमेरिकाविरुद्धको एकदिवसीय अन्तराष्ट्रिय (ओडीआई) मा तीव्र गतिका बलर सोमपाल कामी र करण केसी विकेटविहीन भए। करणको प्रदर्शन बिर्सनलायक थियो। सोमपालले पनि सम्झनलायक प्रदर्शन गरेनन्।
करण केसी पछिल्ला चार ओडीआईमा विकेटविहीन छन्। उनले ८ फेब्रुअरी २०२० मा कीर्तिपुरमा अमेरिकाविरुद्ध भएको खेलमा अन्तिमपटक विकेट लिएका थिए। सो खेलमा उनले १५ रन मात्र खर्चिएर चार विकेट लिएका थिए। यो नै उनको अहिलेसम्मको उत्कृष्ट बलिङ हो।
करणको बलिङ प्रदर्शन एकनासको छैन। ११ ओडीआई खेल्दा उनी ६ पटक विकेटविहीन भएका छन्। घरेलु मैदानमा भएका चार ओडीआईमा उनले आठ विकेट लिएका छन्। तर, विदेशी भूमिमा उनको प्रदर्शन चिन्ताको विषय बनेको छ। विदेशमा खेलेका सात ओडीआईमा चार पटक विकेटविहीन भएका छन् भने मात्र पाँच विकेट लिएका छन्। विदेशी भूमिमा उनको सर्वोत्कृष्ट बलिङ २/३१ हो।
सोमबार अमेरिकाविरुद्धको खेलमा उनले आफ्नो कोटाको आधा ओभर मात्र बलिङ गर्न पाए। उनको बलमा अमेरिकाका ब्याट्स्म्यानले विष्फोटक ब्याटिङ गरेपछि कप्तान ज्ञानेन्द्र मल्लले उनलाई पाँच ओभरभन्दा बढी विश्वास गरेनन्। करणले फालेका बलमा अमेरिकाले ८.२ को इकोनोमीमा ४१ रन बनायो।
करणले ओडीआईमा जम्मा एकपटक मात्र आफ्नो कोटाको पूरै १० ओभर बलिङ गरेका छन्। चारपटक त पाँच वा त्योभन्दा कम ओभर मात्र बलिङ गर्न पाएका छन्। पछिल्ला तीन ओडीआईमा उनले पाँच, चार र तीन ओभर बलिङ गरेका छन्।
यता सोमपाल कामीले पनि पछिल्ला चार ओडीआईमा गतिलो प्रदर्शन गरेका छैनन्। उनले ती चार खेलमा तीन विकेट लिएका छन्। उनका लागि सोमबारको खेल आईसीसी क्रिकेट विश्वकप लिग–२ मा ‘डेब्यु’ र समग्रमा नवौँ थियो।
यसअघि उनले खेलेका आठ वटै ओडीआई हरेकमा विकेट लिएका थिए। तर, नवौँ ओडीआईमा त्यो सफलतालाई कायम राख्न सकेनन्।
नेपालबाट एउटै ओडीआईमा पाँच विकेट हात पार्ने सोमपाल पहिलो बलर हुन्। उनले यो सफलता २६ जनवरी २०१९ मा दुबईमा भएको युएईविरुद्धको खेलमा हात पारेका थिए। त्यसबाहेक १ अगष्ट २०१८ मा भएको डेब्यु खेलमा तीन र त्यही वर्ष क्वालालम्पुरमा भएको युएईविरुद्धको खेलमा २ विकेट लिनुबाहेक अन्य खेलमा एक विकेट मात्र लिएका छन्। उनले पाँच पटक एक विकेट लिएका छन्।
सोमपालले घरेलु मैदानमा ओडीआई खेल्न पाएका छैनन्। २०२० फेब्रुअरीमा ओमान र अमेरिका ओडीआई श्रृङ्खला खेल्न नेपाल आउँदा उनी चोटग्रस्त थिए।
सोमपाल नेपालबाट ओडीआईमा सर्वाधिक विकेट लिनेको सूचीमा दोस्रो नम्बरमा छन्। अहिलेसम्म उनले नौ ओडीआईमा १५ विकेट लिएका छन्। जबकि, १३ ओडीआई खेलेका स्पिनर सन्दीप लामिछानेले आफ्नो विकेट संख्या ३५ पुर्याइसकेका छन्। ६ खेल मात्र खेलेका अर्का स्पिनर सुशन भारीले पनि १४ विकेट लिइसकेका छन्। उनी अहिलेसम्म कुनै पनि ओडीआईमा विकेटविहीन भएका छैनन्।
सोमपाल नेपालका सुरुआती बलर पनि हुन्। उनको बलिङले विपक्षी सुरुबाटै दबाबमा पर्न सक्यो भने त्यसको असर इनिङको अन्तिमसम्मै पर्छ। तर, विपक्षीले सुरुमा नै ब्याट चलाउन थाले भने बलियो मानिएको नेपाली स्पिनलाई पनि रनको गति रोक्न हम्मे पर्छ।
ओमान भ्रमणका क्रममा ओडीआईमा नेपालको राष्ट्रिय टिमबाट डेब्यु गर्न पाएका अर्का फास्ट बलर विक्रम सोबले भने सन्तोषजनक प्रदर्शन गरिरहेका छन्। २९ वर्षको उमेरमा गएको ७ सेप्टेम्बरमा पपुवा न्यू गिनीविरुद्ध डेब्यु गरेका उनले पहिलो बलमा नै विकेट लिएका थिए। उनले ओमानमा खेलेका तीन ओडीआई सबैमा विकेट लिएका छन्। उनको विकेट संख्या पाँच पुगेको छ।
हिजो अमेरिकाविरुद्ध उनले सुरुमा नै दबाब बनाउन सकेका थिए। सोमपालसँग अर्को एन्डबाट बलिङ ओपनिङ गरेका उनले आफ्नो दोस्रो ओभरमा नै अमेरिकाका स्टेभन टेलरको विकेट लिए। शतक बनाउने अमेरिकाका अर्का खेलाडी मनान्क पटेललाई पनि उनले नै पभेलियन पठाएका थिए।
तर, हिजो उनीसमेत महङ्गो साबित भए। उनले ६ ओभरमा ३३ रन खर्चिए। ओमान भ्रमणका क्रममा अहिलेसम्म भएका तीन खेलमध्ये पपुवा न्यू गिनीविरुद्ध २० रन दिएर दुई विकेट लिनु नै उनको उत्कृष्ट बलिङ प्रदर्शन हो।
उनीहरुबाहेक फास्ट बलिङ सम्हाल्न अहिले नेपालको टिममा अबिनाश बोहरा र गुल्सन झा पनि ओमानमा छन्। उनीहरुले अहिलेसम्म मौका भने पाएका छैनन्। नेपालले अरु तीन ओडीआई खेल्न बाँकी छ।
अबिनाश ओडीआई डेब्यु गरिसकेका खेलाडी हुन्। उनले दुई खेल खेल्दा कुनै विकेट लिन सकेनन्। दुवै खेल २०२० फेब्रुअरीमा दुई दिनको अन्तरमा कीर्तिपुरमा खेलेका थिए। ती खेल अमेरिका र ओमानकै विरुद्ध थिए।
गुल्सन झाले भने अहिलेसम्म राष्ट्रिय टिमबाट डेब्यु गर्न पाएका छैनन्। उनीसँग घरेलु प्रतियोगिताको पनि पर्याप्त अनुभव छैन।
क्लोज क्याम्पमा रहेर यसपटक राष्ट्रिय टिममा नपरेका कमलसिंह ऐरीले ओडीआईमा डेब्युको मौका पाइसकेका छन्। उनले २०२० फेब्रुअरी ९ मा कीर्तिपुरमा ओमानविरुद्ध ओडीआई डेब्यु गरेका थिए। उक्त खेलमा उनले चार ओभर बलिङ गर्दा २९ रन खर्चिए। तर, विकेट लिन सकेनन्। त्यसपछि उनले अन्तिम–११ मा स्थान बनाउनै सकेनन्।
नेपालका फास्ट बलरले अहिलेसम्म चार पटक मात्र कुनै पनि खेलमा तीन वा तीनभन्दा बढी विकेट लिएका छन्। सबैभन्दा धेरै विकेट र एउटै खेलमा धेरै विकेट लिने सफलता लेग स्पिनर सन्दीप लामिछानेको नाममा छ। १३ ओडीआई खेल्दा उनी दुई पटक मात्र विकेटविहीन भएका छन्। उनले एकै खेलमा ६ विकेट लिने सफलता दुई पटक हासिल गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
