काठमाडौं– राष्ट्रिय महिला फुटबल टिमका मुख्य प्रशिक्षक ग्यारी फिलिप्सले बंगलादेशविरुद्धको मैत्रीपूर्ण खेलमा महत्वपूर्ण खेलाडी टिममा नहुँदा सोचेजस्तो नतिजा आउन नसकेको बताएका छन्।
आइतबार दोस्रो मैत्रीपूर्ण खेलमा गोलरहित बराबरीमा रोकिएपछि प्रशिक्षक फिलिप्सले खेलको नतिजामा निराशा व्यक्त गरेका हुन्।
यो खेलमा राष्ट्रिय टोलीका भर्पदा फरवार्ड सावित्रा भण्डारी अनुपस्थिति थिइन्। गत वर्ष भएको महिला राष्ट्रिय लिगका क्रममा घुँडामा चोट लागेपछि सावित्रा हाल कतारमा उपचाररत छिन्। उनको घुँडाको शल्यक्रिया भइसकेको छ।
‘एसियन कप छनोटको तयारीका लागि बंगलादेशसँगको दुई खेल महत्वपुर्ण रह्यो। तर, नतिजाबाट निराश छु। महत्वपूर्ण खेलाडी टिममा नहुँदा पनि जित गाह्रो भएको हो,’ उनले भने, ‘मेरो गल्ती हुन सक्छ। मैले पोजिसन परिवर्तन गरेँ।’
उनले नेपालले सिर्जना गरेका अवसरको सदुपयोग गर्न नसक्दा गोल हुन नसकेको स्वीकार गरे। साथै, उनले फरवार्ड लाइन नमिल्दा गोल हुन नसकेको पनि स्पष्ट पारे।
‘लामो समयपछि महिला फुटबलले अन्तराष्ट्रिय प्रतिस्पर्धामा उत्रिएका हौँ। हामीले जित्ने कोसिस गरेका थियौँ। अझै राम्रो खेल्न सक्थ्यौँ। आक्रामक खेलेर पनि बल नियन्त्रणमा राख्न नसक्दा गोल भएन। बंगलादेशले राम्रो डिफेन्डिङ पनि खेल्यो,’ उनले भने।
यता, नेपाली टोलीका कप्तान रेनुका नगरकोटीले पुराना खेलाडी नहुँदा र नयाँ खेलाडीका बीचमा मैदानमा राम्रो समन्वय नहुँदा फितलो प्रदर्शन भएको स्वीकारिन्।
‘हाम्रो पुरानो खेलाडी टिममा छैनन्। नयाँ आएकासँग कम्बिनेसन पनि मिलिरहेको छैन। त्यसैले सोचे जस्तो खेल भएन। स्कोरिङमा समस्या भयो,’ उनले भनिन्।
उनले टिममा रहेको कमजोरीलाई उज्वेकिस्तानमा सुधार्ने आशा व्यक्त गरेकी छन्।
यता, बंगलादेशी प्रशिक्षक गोलाम छोटनले दोस्रो मैत्रीपूर्ण खेलमा नेपाल जस्तो बलियो टिमलाई बराबरीमा रोक्न सक्नु नै आफ्नो उपलब्धी भएको बताए।
‘नेपाली फुटबल टोलीले उमेर समूहदेखि नै राम्रो खेलिरहेका छन्। त्यसैले नेपाली टोली दक्षिण एसियाकै बलियो भएको छ। यो टिमसँग हाम्रा खेलाडीले ९० मिनेट पूरा राम्रो खेले,’ उनले भने।
मैत्रीपूर्ण खेल आयोजनाका लागि उनले अखिल नेपाल फुटबल संघ (एन्फा)लाई धन्यवाद समेत दिए।
‘महत्वपुर्ण कुरा खेलाडीले खेल्न पाए। एन्फालाई धन्यवाद। एएफसीको तयारी राम्रो भयो। आत्मविश्वास आएको छ। बंगलादेशले पछिल्लो समय महिला फुटबलमा राम्रो लगानी गरेको छ। आगामी दिनमा राम्रो खेल्न सक्छौँ भन्ने लागेको छ,’ उनले भने।
उनले एसियन कप छनोटमा आफ्नो पहिलो प्रतिद्वन्द्वी जोर्डन रहेको उल्लेख गर्दै अबको तयारी सोही प्रतिद्वन्द्वीविरुद्ध रहने बताए।
एसियन कप छनोटको तयारीस्वरुप नेपाल र बंगलादेशले दुई अन्तर्राष्ट्रिय मैत्रीपूर्ण फुटबल प्रतियोगिता खेलेका हुन्।
अन्तर्राष्ट्रिय प्रतियोगितामा पहिलोपल्ट दशरथ रंगशालामा उत्रिँदा महिला टिमले बिहीबार बंगलादेशमाथि २–१ को संघर्षपूर्ण जित हात पारेको थियो।
सिनियर टिममा पहिलोपल्ट अवसर पाएका सविता राना र प्रीति राईले पहिलो हाफमा गोल गरेपछि नेपालले बंगलादेशविरुद्ध छैटौं जित हात पारेको थियो।
नेपाललले बंगलादेशसँग दोस्रो पटक बराबरी खेलेको हो। यसअघि सन् २०१९ मा भएको ओलम्पिक छनोटमा नेपालले बंगलादेशसँग १–१ को बराबरी खेलेको थियो। नेपाल र बंगलादेशबीच अहिलेसम्म ८ खेल हुँदा नेपाल अपराजित छ।
उज्वेकिस्तामा हुने महिला एसियन कप छनोटको समूह ‘एफ’ मा नेपाल, फिलिपिन्स र हङकङ रहेका छन् भने बंगलादेश रहेको समूह ‘जी’ मा जोर्डन र इरान छन्।
समूह विजेताले सन् २०२२ जनवरी २० देखि फेब्रुअरी ६ सम्म भारतमा हुने एएफसी महिला एसियन कप प्रतियोगितामा स्थान बनाउनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
