मुख्य प्रशिक्षक अल्मुताइरीको 'म्याच विश्लेषण'– भारतसँगको हारलाई स्वाभाविक मान्नुपर्छ

फुटबल

दीप सुवेदी आइतबार, भदौ २०, २०७८ २०:५८

काठमाडौं– नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले भारतसँगको दोस्रो मैत्रीपूर्ण खेलमा बेहोरेको हारलाई स्वाभाविक मान्नुपर्ने बताएका छन्।

खेलपछि आयोजित पत्रकार सम्मेलनमा प्रशिक्षक अल्मुताइरीले आफ्नो प्रमुख लक्ष्य साफ च्याम्पियनसिप रहेको दोहर्‍याउँदै मैत्रीपूर्ण खेलमा हारलाई स्वाभाविक मान्नुपर्ने बताएका हुन्।

छिमेकी राष्ट्र भारतसँगको दोस्रो मैत्रीपूर्ण खेलमा नेपाल २-१ गोल अन्तरले पराजित भएको हो।

भारतका लागि फारुकहाजी कासम चौधरी र कप्तान सुनिल क्षेत्रीले एक एक गोल गरे। नेपालका लागि तेज तामाङले गोल गरेपनि हार टार्न सकेनन्।

‘हाम्रो प्रमुख लक्ष्य साफ च्याम्पियनसिप हो। मैत्रीपूर्ण खेलमा हारलाई स्वाभाविक मान्नु पर्नेछ। रिजल्टलाई बिर्सनुस्, म खुशी छु। नेपाली टिमको प्रदर्शनमा मलाई कुनै गुनासो छैन्। सबैले राम्रो खेले। साफमा नेपालको प्रदर्शन सुधारिएको हुन्छ र राम्रो नतिजा आउने छ,’ उनले भने।

दुवै टिमले आगामी महिना माल्दिभ्समा हुने साफ च्याम्पियनसिपको तयारीस्वरूप मैत्रीपूर्ण खेल खेलेका हुन्।

यसअघि बिहीबार भएको पहिलो मैत्रीपूर्ण खेल १–१ गोलको बराबरीमा सकिएको थियो। नेपालका लागि अन्जन विष्टले गोल गरेका थिए भने भारतका अनिरुद्ध थापाले बराबरी गोल फर्काएका थिए।

भारतविरुद्धको दोस्रो मैत्रीपूर्ण खेलमा नेपालले तीन परिवर्तन गरेको थियो। अघिल्लो खेल खेलेका अन्जन विष्ट, सुमन अर्याल र नवयुग श्रेष्ठको स्थानमा सुजल श्रेष्ठ, मनिष डाँगी र आसिस लामाले पहिलो रोजाइमा स्थान पाएका थिए।

प्रशिक्षक अल्मुताइरीले तेज तामाङको गोल, विशाल श्रेष्ठ र राजन गुरुङको डेब्यू र नेपाली खेलाडीको प्रदर्शन राम्रो पक्ष रहेको बताए। उनले विपक्षीको रणनीतिअनुसार पहिलो हाफमा आफ्नो क्षेत्रमा खेलेको बताए।

‘हामीले सुधारिएको प्रदर्शन गर्‍यौं। विपक्षीको रणनीतिअनुसार पहिलो हाफमा आफ्नो क्षेत्रमा खेलेका थियौं। दोस्रो हाफमा हामीले खुल्ला भएर खेल्यौं। नेपालले गोल गर्ने अवसर पाएपनि फिनिसिङ हुन सकेन,’ उनले भने ।

यता, भारतीय टिमका मुख्य प्रशिक्षक इगोर स्टिकले दोस्रो खेल पहिलेको तुलनामा राम्रो भएको बताए।

‘पहिलो खेलभन्दा आजको खेलमा हाम्रो टोलीले राम्रो खेल्यो। पहिलो हाफभन्दा हाम्रो दोस्रो हाफ राम्रो थियो। खेलाडीहरुले राम्रो खेले। म हाम्रा खेलाडीको प्रशंसा गर्न चाहन्छु। तर, अझै सुधार गर्नपर्ने ठाउँ छ,’ उनले भने।

उनले दोस्रो हाफमा भारतीय टोलीले सम्हालेर खेल्दा गोल निस्केको पनि बताए। ‘हाम्रा खेलाडीले संयमित भएर खेले, त्यसैले गोल निकाल्न सफल रहे,’ उनले भने।

उनले नेपाली टिममा सुधार आएको पनि बताए। ‘नेपाली टिमले लामो समयदेखि प्रशिक्षण गरिरहेका हुनाले राम्रो प्रदर्शन स्वाभाविक हो। हामी दुवै टोलीले राम्रो खेल्यौं,’ उनले भने।

प्रशिक्षक स्टिकले दोस्रो हाफमा आफ्नो टिमले पेनाल्टी पाउनै पर्ने दाबी गर्दै रेफ्री प्रज्ज्वल क्षेत्रीको निर्णय गलत रहेको बताए।

हामीले पेनाल्टी पार्नपर्ने थियौं। तर, रेफ्रीले हामीलाई पेनाल्टी अवसर नदिएका कारण मैले अपिल गरे्र। खेलाडीले कार्ड पाउनुभन्दा मैले पाउनु राम्रो हो। तर, मैत्रीपूर्ण खेलमा यस्तो गल्ती हुनुहुँदैन,’ उनले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।