नेपाल-भारत भिडन्त : आइतबार ‘विशेष’ बन्ला त दशरथ रंगशाला?

फुटबल

दीप सुवेदी आइतबार, भदौ २०, २०७८ ०७:३०

काठमाडौं- नेपाल र भारत छिमेकी मात्र होइनन्, फुटबलका चिरपरिचित प्रतिद्वन्द्वी पनि हुन्। यसै कारण पनि नेपाल र भारतबीच हुने फुटबल खेलको रौनक नै बेग्लै हुन्छ।

बिहीबार पनि यस्तै रौनक देखिएको थियो, दशरथ रंगशालामा। १९८२ मा भारतकै दिल्लीमा सम्पन्न एसियन गेम्समार्फत् नेपाली फुटबलले औपचारिक रुपमा अन्तर्राष्ट्रिय फुटबलमा पाइला टेकेको थियो।

कोरोना महामारीले घरेलु मैदानमा अन्तर्राष्ट्रिय खेल गतिविधिमा ‘ब्रेक’ लागेका बेला बिहीबार दशरथ रंगशालामा नेपाल र भारत मैत्रीपूर्ण खेलका लागि भिड्दा करिब ५१ सय दर्शकले रंगशाला पुगेरै नेपाली टोलीको समर्थन गरे।

अन्तर्राष्ट्रिय फुटबल यात्रा थालेको चार दशकपछि भारतले नेपालमा आएर मैत्रीपूर्ण खेल खेलेको याे पहिलोपटक हो। यसबीचमा भारतविरुद्ध नेपाल २० पटक आमने-सामने भइसकेको छ। त्यसमध्ये नेपालले यसअगाडि मैत्रीपूर्ण खेल भने तीनवटा मात्र खेलेको थियो। यी तीनै खेल भारतमै भएका थिए।

समग्रमा हेर्ने हो भने नेपालले अहिलेसम्म कूल १८ अन्तर्राष्ट्रिय मैत्रीपूर्ण खेलेको छ। त्यसमध्ये योसम्म गरेर चार खेलमात्र दशरथ रंशगालामा भएका छन्। सन् २०१२ मा बंगलादेशविरुद्ध एक र २०१३ मा पाकिस्तानविरुद्ध दुई खेल नेपालले घरेलु मैदानमा खेलेको हो। अब भारतविरुद्ध हुने दोस्रो खेल नेपालले घरेलु मैदानमा खेल्न लागेको पाँचौं अन्तर्राष्ट्रिय मैत्रीपूर्ण हुनेछ।

नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले बिहीबार भारतविरुद्ध भएको खेल बराबरीका लागि नभई जित्नकै लागि खेल्ने र आक्रमक खेल्ने बताएका थिए। तर, उनले अन्तिम समयमा रणनीति परिवर्तन गर्दै भातरविरुद्ध रक्षात्मक रुपमा खेलाडीलाई प्रस्तुत गरेका थिए। जसको नतिजा निस्कियो, १-१।

बिहीबार पहिलो हाफमा अन्जन विष्टको गोलबाट लिएको अग्रतालाई नेपालले जोगाउन नसक्दा बराबरीमा चित्त बुझाउनु परेको थियो। यद्यपी, राष्ट्रिय टोलीका लागि उनको त्यो पाँचौ गोल हो। यसअघि चाइनिज ताइपेईविरुद्ध विश्वकप छनोटका दुई खेलमा ३ गोल गरेका थिए। यस्तै, अर्को गोल इराकविरुद्धको मैत्रीपूर्ण खेलमा गरेका थिए।

बिहीबार भएको खेलमा भारतीय टिम खेलमा हाबी भइरहेको थियो। पहिलो मिनेटमै गोलको प्रयास गरेको भारतले बल नियन्त्रणमा राखे पनि नेपाली गोलपोस्टमा धावा बोल्न भने सकेन।

नेपाली टिम अगाडि बढ्नै नसकिरहेको अवस्थामा अन्जनले भारतीय डिफेन्डर सिङ्लेनसाना सिंहले गरेको गल्तीको फाइदा उठाए । सिङ्लेनसानाले गोलकिपर गुरप्रितसिंह सन्धुलाई दिएको ‘ब्याकपास’ फितलो बन्यो । त्यसलाई क्लियर गर्ने प्रयासमा गुरप्रितले पनि ढिलाइ गरेपछि अञ्जनले ३६ औं मिनेटमा घरेलु टिमलाई अग्रता दिलाए का थिए।

उनले पेनाल्टी क्षेत्रमा नियन्त्रण गर्ने क्रममा गुरप्रितलाई उछिन्दै बललाई खाली पोस्टको दिशा दिएर खेलमा नेपालको पहिलो आक्रमणमै गोल गरेका थिए ।

पहिलो हाफको इन्ज्युरी समयमा आयुश घलानको पासमा सुमन लामाले प्रहार गरेको बललाई भने भारतीय गोलरक्षक गुरप्रितले समाए । दोस्रो हाफको अन्त्यतिर सुमन अर्यालको क्रसमा मनीष डाँगीले हेडद्वारा प्रहार गरेको बल ‘फ्रेम’मा पर्न सकेन। भारतविरुद्ध घरेलु भूमिमा खेलेको पहिलो मैत्रीपूर्ण खेलमा नेपालले गरेको यही तीन आक्रमण हेर्न लायक थियो।

सुरुमै आक्रामक देखिएको भारतले दोस्रो हाफमा नेपालको किरणलाई निक्कै व्यस्त राख्यो। भारतीय टिमका प्रशिक्षक इगोर स्टिमेकले मिडफिल्डमा अनिरुद्ध थापा र सहल अब्दुल सामद तथा डेब्यु गर्ने अवसर पाएका सेरिटन फर्नान्डेज र रहिम अलीलाई दोस्रो हाफको सुरुमै मैदान पठाएका थिए।

अन्तत: ६०औं मिनेटमा भारतीय कप्तान सुनिल क्षेत्रीले पेनाल्टी बक्स बाहिरबाट गरेको कडा प्रहारलाई गोलरक्षक किरण चेम्जोङले पञ्च गर्दै बचाएपनि अनिरुद्र अघि बढेर गोल गरे र हारबाट जोगाए।

अब नेपालले भारतसँग दोस्रो खेल आइतबार खेल्नेछ। यी दुईबीचको खेल साँझ ५:३० बजेबाट सुरु हुनेछ।

अखिल नेपाल फुटबल संघ (एन्फा) का महासचिव इन्द्रमान तुलाधरका अनुसार बिहीबार जस्तै पाँच हजार १०० दर्शकले मात्र रंगशाला पुगेर फुटबल हेर्न सक्नेछन्। कोरोनाविरुद्धको दुवै खोप लगाएका र कोरोना टेष्ट नेगेटिभ भएकाले मात्र खेल्न हेर्न सक्नेछन्।

नेपालले यसअगाडि भारतसँग उसकै भूमि सिलिगुडीमा सन् २०१३ मा पहिलोपल्ट मैत्रीपूर्ण खेल खेलेको थियो। त्यसपछि २०१५ मा पुणे र २०१७ मा मुम्बईमा खेलेको थियो। यस्तोमा अब दोस्रो पटक नेपाल आफ्नै भूमिमा भारतसँग मैत्रीपूर्ण भिडन्त गर्दैछ।

नेपालका मुख्य प्रशिक्षक अल्मुताइरीका लागि यो खेल विशेष हुनेछ। उनले नेपालविरुद्ध भारतको इतिहास राम्रो भएपनि आफ्नो टोलीले बराबरीको लागि नखेल्ने बताएका छन्। उनले पहिलो खेलमा राम्रो नतिजा निकाल्न नसकेपनि आइतबारको खेलमा सोचेअनुसार प्रदर्शन गर्ने बताए।

‘सबै समर्थकमाझ क्षमा चाहन्छु, हामीले पहिलो खेलमा खुसी बनाउन सकेनौं। मलाई आशा छ, क्षमा स्वीकार्नु हुनेछ। आगामी खेलमा सोचेअनुसार प्रदर्शन गर्ने छौँ,’ उनले भने। उनले साग खेल्नका लागि यो स्तरको प्रदर्शनले नपुग्नेसमेत बताएका छन्। ‘हामीले अझै धेरै सुधार गर्नु पर्नेछ। सागमा यो प्रदर्शनले हामीलाई राम्रो नतिजा दिँदैन,’ उनले भने।

उनको नेतृत्वमा नेपालले अहिलेसम्म ५ खेल खेलेको छ। त्यसमध्ये नेपालले इराकविरुद्ध यसै वर्ष बासरामा पहिलोपल्ट खेलेको थियो। त्यसपछि नेपालले विश्वकप छनोटका तीन खेल कुवेतमा खेलेको हो।

जसमा चाइनिज ताईपेईसँग २-० को जित निकाल्दा प्रशिक्षक अलमुताइरीको उल्लेखनिय योगदान रह्यो भने इराकसँग ६-२ गोलले पराजित हुनु उनको खराब नतिजा रहेको छ। यता, जोर्डन र अस्ट्रेलियासँग समान ३-० गोलले पराजित हुनुलाई फुटबलका पण्डितहरुले ‘एभ्रेज प्रफर्मेन्स’को रुपमा लिएका छन्।

आइतबारको खेलमा पनि नेपाली टोलीका लागि टाउको दुखाइ भारतीय कप्तान सुनिल क्षेत्री हुन्। नेपाली मुलका ३६ वर्षीय क्षेत्री ६९औं मिनेटमा बाहिरिएका थिए। उनलाई बिपिन सिंहले परिवर्तन गरेका थिए। क्षेत्री अन्तर्राष्ट्रिय खेलमा धेरै गोल गर्नेमा अग्रस्थानमा छन्। क्षेत्रीले ११८ खेलमा ७४ गोल गरेका छन्।

त्यसैले नेपाली टोली क्षेत्रीलाई रोक्नेमा बढी केन्द्रित देखिएको थियो। क्षेत्रीले नेपालसँग हालसम्म ९ खेलमा पाँच गोल गरेका छन्। भारतीय टोली क्षेत्रीका साथै अनिरुद्र थापा, ब्रान्डन फर्नान्डेज, प्रितम कोटललगायत खेलाडीमाथि निर्भर रहने छ। अनिरुद्रले बिहीबार भारतलाई हारबाट जोगाएका थिए।

शुक्रबार वर्षा भएपछि दशरथ रंगशालमा दुबै टोलीलाई अभ्यास गर्न दिइएको छैन। आयोजक जतिसक्दो मैदानलाई राम्रो ‘कन्डिसन’मा राख्न एन्फा लागिपरेको छ।

यस्तो अवस्थामा दुवै टोली अन्तिम मैत्रीपूर्ण खेल जित्न चाहन्छन्। पहिलो खेल बराबरी भएकाले दुबै टोलीलाई अग्रता लिने अवसर छ। अझ घरेलु दर्शकमाझ नेपाललाई त्यो अवसर बढी नै हुन्छ।

यता, भारतीय टोलीका प्रशिक्षक इगोर स्टिम्याकले पानी नपरेको खण्डमा आइतबार खेल आफ्नो पक्षमा हुने दाबी गरेका छन्।

‘पहिलो पाँच मिनेटमै गोल हुनुपर्ने थियो, भएन। हामीलाई नेपालको काउण्टर खेलसँगै मैदानलेसमेत दबाब दियो। निरन्तर पानी परेको कारण हामीले सोचे जस्तो राम्रो खेल्न सकेनौं। अबको खेल हाम्रो पक्षमा हुन्छ,’ उनले भने।

यता, कप्तान किरण चेम्जोङका लागि यो खेल उत्तिकै विशेष हुनेछ, किनभने यस अन्तर्राष्ट्रिय मैत्रीपूर्ण खेलसँगै उनले नेपालका लागि सर्वाधिक खेल खेलेको कीर्तिमान भंग गर्नेछन्। किरणले बिहीबार खेल्दै पूर्वकप्तान विराज महर्जनको ७३ खेलको कीर्तिमानसँग बराबरी गरेका थिए।

नेपाली टिम
गोलकिपर : किरणकुमार लिम्बू, विशाल श्रेष्ठ, दीप कार्की, विकेश कुथु
डिफेन्डर : सुमन अर्याल, दिनेश राजंवशी, गौतम श्रेष्ठ, अनन्त तामाङ, रोहित चन्द
मिडफिल्डर : सुरज जिउ ठकुरी, सुमन लामा, कमल थापामगर, नितिन थापा, तेज तामाङ, राजन गुरुङ, पुजन उपरकोटी, विशाल राई, सन्तोष तामाङ, सुजल श्रेष्ठ, सुनिल बल, आयुष घलान
फरवार्ड : मनिष डाँगी, अञ्जन विष्ट, नवयुग श्रेष्ठ, आशीष लामा

भारतीय टिम
गोलकिपर : अम्रिन्दर सिंह, धीरज सिंह, गुरप्रीत सिंह सान्धु
डिफेन्डर : प्रितम कोतल, चिंलेसना सिंह, मन्दर राओ देसाई, आकाश मिश्रा, राहुल भेके, शुभासिश बोसे, सेरिटन फर्नान्डेस
मिडफिल्डर : ललेङमाविआ, विपिन सिंह, अनिरुद्र थापा, सहल अब्दुल सामद, ब्रान्डन फर्नान्डेज, लिस्टन कोलाको, यासिर मोहमद, ग्लान मार्टिन्स, सुरेश सिंह, जेकसन सिंह, प्रोनय हल्दर
फरवार्ड : मनवीर सिंह, रहिम अली, सुनील क्षेत्री, फारूख चौधरी

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।