काठमाडाैं– गत चैतमा घरेलु मैदानमा भएको मैत्रीपूर्ण खेलमा बंगलादेशलाई २–१ गोलले हराउँदै नेपालले आठ खेलको जितविहीन यात्रा टुंग्याएको थियो। त्यसअघि नेपाल लगातार पाँच खेलमा हार र पछिल्ला तीन खेलमा लगातार बराबरी खेलेको थियो। तर, आठ वटै खेलमा नेपालले एक गोल गर्न पनि सकेको थिएन।
बंगलादेशविरुद्ध खेल्दै नेपालले करिब १७ महिनापछि गोल गरेको थियो। बंगलादेशसँगको मैत्रीपूर्ण प्रतिश्पर्धापछि नेपालले थप चार खेल खेलेको छ, जसमा तीन हार र एक जितको नतिजा निकालेको छ।
यी खेलमा १२ गोल खाँदा चार गोल गरेको छ। पछिल्ला दुई खेलमा जोर्डन र अस्ट्रेलियासँग समान ३–० गोलले पराजित भएको थियो। त्यसअघि चाइनिज ताइपेईलाई २–० गोलले हराएको थियो। इराकसँगको मैत्रीपूर्ण खेलमा भने नेपाल ६–२ गोलले पराजित भएको थियो।
यही पृष्ठभूमिमा आगामी महिना हुने साफ च्याम्पियनसिपको तयारीस्वरुप नेपालले चिरप्रतिद्वन्द्वी भारतसँग बिहीबार (आज) र आइतबार दुईवटा मैत्रीपूर्ण खेल खेल्दै छ। साफको पूर्वसन्ध्यामा हुन लागेको यी खेललाई महत्त्वका साथ हेरिएको छ। सन् १९९३ देखि सुरु भएको साफ च्याम्पियनसिपमा नेपाल अहिलेसम्म सेमिफाइनलभन्दा माथि जान सकेको छैन।
‘हेड टु हेड’मा भारत अगाडि
नेपाल र भारतबीच अहिलेसम्म १९ पटक प्रतिश्पर्धा भएको छ। जसमध्ये भारतले १३ खेलमा जित हात पारेको छ भने नेपाल केवल दुई पटक विजयी भएको छ। चार खेल बराबरीमा सकिएका छन्।
भारतले नेपालविरुद्ध ३३ गोल गरेको छ। नेपालले भने नौ गोल मात्र गर्न सकेको छ। दुई टोलीबीचको प्रतिस्पर्धामा सुनिल क्षेत्रीले व्यक्तिगत रुपमा सबैभन्दा बढी गोल गरेका छन्। उनले नेपालविरुद्ध आठ खेल खेल्दै पाँच गोल गरेका छन्।
पछिल्लो पटक यी दुई टोलीबीच ६ जुन २०१७ मा प्रतिस्पर्धा भएको थियो। मुम्बईमा भएको सो खेलमा भारत २–० गोलले विजयी भएको हो। त्यसभन्दा अगाडि नेपालको घरेलु मैदानमा सन् २०१५ मा प्रतिस्पर्धा भएको थियो। विश्वकप छनोटको दोस्रो लेगको उक्त खेल गोलरहित बराबरीमा सकिएको थियो।
नेपालले पछिल्लो पटक सात वर्षअघि भारतलाई पराजित गरेको थियो। सन् २०१३ मा दशरथ रंगशालामा भएको साफ च्याम्पियनसिपमा नेपाल २–१ ले विजयी भएको थियो। भारतविरुद्धको त्यो जित २० वर्षपछि संभव भएको थियो।
घरेलु मैदानमा अलमुताइरीको पहिलो खेल
यो वर्ष नयाँ प्रशिक्षकका रुपमा अब्दुल्लाह अलमुताइरी आएपछि नेपालले फिफा वरीयतामा सुधार गरेको छ। उनको आगमनसँगै खेल्ने शैली पनि फेरिएको छ। आक्रामक फुटबल पनि खेल्न थालेपछि नेपाली स्ट्राइकरलाई ‘गोल हान्न नसक्ने’ भनेर लाग्दै आएको आरोप केही हदसम्म मेटिएको छ। उनको नेतृत्वमा चार खेल खेल्दा प्रदर्शन सुधारिएपछि अखिल नेपाल फुटबल संघ (एन्फा)ले पनि उनको सम्झौता अवधि बढाएको थियो।
अलमुताइरीको प्रशिक्षणमा नेपालले यसअघि बलिया टोलीसँग मात्र प्रतिश्पर्धा गरेको थियो। ती टोलीसँगको हार अनपेक्षित थिएन। यद्यपि, वरीयतामा माथि रहेको चाइनिज ताइपेईलाई पराजित गरेको थियो। अब भारतविरुद्धका दुई खेल प्रशिक्षक अलमुताइरीका लागि वास्तविक परीक्षा हुनेछ।
उनले साफका लागि दुई महिनादेखि खेलाडीलाई तयार पारिरहेका छन्। उनले खेलशैलीमा पनि केही परिवर्तन गर्ने अड्कल काटिएको छ। उनले भारतविरुद्धको खेल विगतभन्दा फरक हुने बताइसकेका छन्। ‘हामी सबै अन्तर्राष्ट्रिय खेलका लागि तयार हुनुपर्छ, जित्नु पर्छ। भारतीय टिमको विषयमा अध्ययन गरेका छौं। हाम्रो लक्ष्य साफ च्याम्पिनसिप हो। एसिया र विश्वलाई रियल गोर्खाली भन्ने देखाउन चाहन्छौं,’ प्रशिक्षक अलमुताइरीले भने।
उनले भारतसँगको खेलबाट टोलीमा रहेको कमीकजोरी पत्ता लगाउने पनि बताए। ‘यी दुई मैत्रीपूर्ण खेलबाट साफका लागि शिक्षा लिनेछौं। यो हामी कस्तो स्तरमा पुग्यौं भन्ने थाहा पाउने कडी पनि हो। यी खेलपछि भविष्यमा के गर्न सकिन्छ भन्ने सोच्नेछौं। साफअघि कमजोरी पत्ता लगाउनेछौं,’ उनले भने।
घरेलु मैदानमा व्यक्तिगत रूपमा उनको यो पहिलो खेल हो। त्यसैले यो खेलका लागि आफू उत्साहित भएको उनले बताएका छन्।
यता, कप्तान किरणकुमार लिम्बूले पनि टिम राम्रो अवस्थामा रहेको भन्दै खेलले आगामी प्रतियोगिता लागि सहयोग पुग्ने आशा व्यक्त गरेका छन्। ‘एक महिनापछि हुने साफ च्याम्पियनसिपका लागि यो अवसर हो। हामी कति बलियो छौं भन्ने भारतसँगको खेलले देखाउनेछ,’ उनले भने, ‘प्रशिक्षकले राम्रो तयारी गराउनु भएको छ। पहिलाभन्दा मानसिक रुपमा बलियो भएका छौं।’
यसअघि अन्तर्राष्ट्रिय गोल गरेका सात खेलाडी भारतविरुद्ध हुने मैत्रीपूर्ण खेलका लागि टोलीमा समावेश गरिएको छ। टीममा भएका नवयुग श्रेष्ठले सबैभन्दा बढी सात गोल गरेका छन्। अन्जन विष्टले चार, विशाल राईले तीन, अनन्त तामाङ र सुजल श्रेष्ठले दुई–दुई गोल गरेका छन्। सुनिल बल र मनीष डाँगीले पनि एक–एक गोल गरेका छन्।
पछिल्लो जितमा चाइनिज ताइपेईविरुद्ध अन्जन र नवयुगले गोल गरेका थिए। त्यसअघि इराकसँग अन्जन र मनीषले गोल गरेका थिए। घरेलु मैदानमा गत मार्चमा भएको मैत्रिपूर्ण खेलमा बंगलादेशविरुद्ध दुवै गोल अन्जनले गरेका थिए।
के छ भारतको लक्ष्य?
अन्तर्राष्ट्रिय फुटबलमा भारतले पछिल्लो समय १३ खेलमा ६ हार, ६ बराबरी र एक जितको नतिजा निकालेको छ। उसले पछिल्ला २२ खेलमा भने ११ हार, आठ बराबरी र तीन जित हात पारेको छ।
पछिल्लो खेलमा भारतले अफगानिस्तानसँग १–१ गोलको बराबरी खेलेको थियो। त्यसअघि बंगलादेशलाई २–० गोलले पराजित गरेको थियो।
भारतीय प्रशिक्षक इगोर स्टिमाकले नेपालसँग खेल्नका लागि आफ्ना खेलाडी तयार रहेको बताएका छन्। उनले खेलअगाडि भारी वर्षा नभए राम्रो नतिजा निकाल्ने पनि बताएका छन्। ‘हामी राम्रो फुटबल खेल्नेछौं। हामीसँग मोहन बगान र बेंगलुरु एफसीका केही खेलाडी छैनन्। उनीहरु एएफसी कपका खेल खेलिरहेका छन्। त्यसैले हाम्रा लागि कठिन हुनेछ,’ उनले भने, ‘तर, मैले टिममा रहेका खेलाडीबाट आशा गरेको छु। उनीहरूले जित्नको लागि मिहिनेत गर्ने छन्।’
भारतीय कप्तान सुनील क्षेत्रीले पनि नेपालविरुद्ध उत्कृष्ट खेल्ने बताएका छन् ‘महत्वपूर्ण खेलहरु आउँदैछन्। यो मैत्रीपूर्ण खेल सिजनको राम्रो सुरूवात हो। नेपाल बलियो प्रतिद्वन्द्वी हो। परिस्थिति जस्तो भए पनि नेपालविरुद्ध खेल्न कठिन हुन्छ। तर, उत्कृष्ट खेल्नेछौं,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
