काठमाडौं– नेपाली महिला राष्ट्रिय फुटबल टोलीले असोजमा एएफसी महिला एसियन कप–२०२२ छनोट खेल्दै छ। दक्षिण एसियाबाहेक विरलै मात्र अन्तर्राष्ट्रिय खेल खेल्ने नेपाली टोलीले यस पटक फिलिपिन्स र हङकङसँग प्रतिश्पर्धा गर्नेछ।
बलिया प्रतिद्वन्द्वी भए पनि राम्रो नतिजाका लागि खेल्ने लक्ष्यका साथ टोलीले तयारी थालेको छ। राष्ट्रिय महिला फुटबल टिमका मुख्य प्रशिक्षक ग्यारी फिलिप्सले भने, ‘हामीले प्रारम्भिक छनोटको क्रममा फिटनेसमा ध्यान दिएका थियौं, हाम्रो लक्ष्य एसिया कपमा छनोट हुनु हो। हामीसँग युवा र अनुभवीको मिश्रित टिम छ।’
उनले प्रिती राई, रश्मी घिसिङ, सविता राना, रजनी थोकर, सिर्जना सिंह, विमला विक र निशा थोकर गरी सात खेलाडीलाई पहिलो पटक राष्ट्रिय टोलीमा समेटेका छन्। यिनै खेलाडीका कारण उनले टिमलाई ‘मिश्रित’ बताएका हुन्।
अखिल नेपाल फुटबल संघ (एन्फा) मुख्यालयको मैदानमा तयारी गरिहेको टिमका २३ खेलाडीमध्ये धेरैको नजर प्रिती राईमा छ। १७ वर्ष लाग्दै गरेकी उनी सबैभन्दा कान्छी सदस्य हुन्। ‘अट्याकिङ मिडफिल्डर’ रहेकी उनी राष्ट्रिय टिमको जर्सीमा ‘डेब्यू’ गर्ने सम्भावना बलियो छ।
तर, डेब्यूका लागि एसियन कप–२०२२ नै कुर्नुपर्ने छैन। त्यसअगाडि नै उनीसँग राष्ट्रिय जर्सीमा मैदान उत्रिने मौका हुने छ। एन्फाका अनुसार नेपालले भदौ २४ र २७ गते बंगलादेशसँग दुई मैत्रीपूर्ण खेल खेल्दै छ।
मैदान उत्रिने मौका पाए आफ्नो खेललाई सुधार गर्ने लक्षमा रहेको उनले बताएकी छिन्। उनी भन्छिन्, ‘जब मौका पाउँछु आफ्नो उत्कृष्ट दिन्छु भन्नेछ, मलाई कुन रुपमा लिनु हुन्छ र कस्तो प्रदर्शन गर्छु त्यो पछि थाहा होला, तर जहाँसम्म लाग्छ राम्रो भइरहेको छ। मौका पाउछु होला।’
प्रितीसँग १५ वर्ष र १६ वर्ष मुनिको राष्ट्रिय टोलीको कप्तान भएको अनुभव पनि छ। त्यस्तै उपमेयर कपमा काठमाडौंको टोली र राष्ट्रिय लिगमा विभागीय टोली एपिएफबाट खेलेको अनुभव पनि उनीसँग छ। उनले एपीएफबाट पहिलो रोजाइमा खेल्दै राम्रो प्रदर्शन गरेकी थिइन्। एपीएफले महिला राष्ट्रिय लिगको उपाधि नै जितेको थियो।
तर, राष्ट्रिय टोलीका लागि भने उनी भने बारम्बार ‘अभागी’ ठहरिँदै आएकी छिन्। दुई वर्षअघि नेपालमा सम्पन्न १३औं दक्षिण एसियाली खेलकुद (साग)मा उनलाई राष्ट्रिय टोलीबाट ‘डेब्यू’ गर्ने मौका थियो। तर व्यवस्थापकको कमजोरीका कारण उनले मौका गुमाइन्। ‘व्यवस्थापकको कमजोरीका कारण राष्ट्रिय टोलीको हिस्सा बन्न थप दुई वर्ष कुर्नुपर्यो। तर, त्यसमा कुनै गुनासो छैन, मिहिनतको फल मिलेकै भएर पुन फर्किएको छु,’ उनले भनिन्। नेपाली टिमका व्यवस्थापकले अन्तिम समयमा उनको नाम दर्ता गर्न छुटाइदिएका थिए।
‘गोल मेसिन’ भनेर चिनिने फरवार्ड सावित्रा भण्डारी यसपटक राष्ट्रिय टिममा हुने छैनन्। राष्ट्रिय लिगमा लागेको चोटका कारण उनी सात वर्षयता पहिलोपल्ट राष्ट्रिय टिमबाट बाहिर छिन्। सागपछि कप्तान नीरु थापा र डिफेन्डर मनमाया लिम्बूले सन्यास लिइसकेका छन्। नेपाली सेनाकी डिफेन्डर कविता धिमाल मिसनमा खटिएकी छन्।
त्यसैले यसपालि प्रितिजस्ता नयाँ खेलाडीलाई आफ्नो क्षमता देखाउने अवसर छ। तर, प्रितीको सोच फरक छ। सावित्री भण्डारीको ठाउँ लिनेभन्दा पनि आफूले आफ्नै ठाउँ बनाउन खेल्ने बताउँछिन्। ‘म आफूलाई जुनियरभन्दा पनि दिदीहरुको टिममेटका रुपमा स्थापित गर्न चाहन्छु। सावित्रा दिदी नेपालको नम्बर एक खेलाडी हुनुहुन्छ। उहाँ नहुँदा राष्ट्रिय टोलीमा उहाँको ठाउँ लिनेभन्दा पनि आफ्नै स्थान बनाउने सोचमा छु,’ उनले भनिन्।
नेपाली फुटबलको भविष्यको पुस्ताका रुपमा हेरिएको प्रितिमाथि चुनौतीका साथै दबाब पनि छ। तर, उनी दबाद लिएर भन्दा पनि ‘इन्जोए’ गरेर खेल्ने बताउँछिन्। ‘क्लब र राष्ट्रिय टिमबाट खेल्नु पक्कै फरक कुरा हो। क्लबमा हुँदा ढुक्कले खेल्न पाइन्छ, तर राष्ट्रिय टिममा खेल्दा मानसिक दबाब हुन्छ। यसलाई दबाबको रुपमा भन्दा पनि सहज रुपमा लैजानु पर्छ,’ उनी भन्छिन्।
प्रशिक्षक फिलिप्स पनि टोलीमा पहिलोपटक स्थान बनाएका खेलाडीले विशेष उर्जा ल्याएको बताउँछन्। सात जना नयाँ खेलाडीलाई समावेश गर्दै २३ सदस्यीय नेपाली टिम मंगलबार नै घोषणा भइसकेको छ।
यसअघि १३औं सागमा स्वर्णको प्रतिस्पर्धामा भारतसँग २–० ले हारेको नेपाली महिला टिम त्यसपछि मैदान ओर्लिएको छैन। एसियन कप छनोटको खेल नेपालमै हुनेवाला थियो। तर, कोरोना महामारीको कारण उज्वेकिस्तानको जेएआर रंगशालामा सारिएको खेलमा नेपालले फिलिपिन्सविरुद्ध सेप्टेम्बर १८ र हङकङविरुद्ध सेप्टेम्बर २१ मा प्रतिश्पर्धा गर्नेछ। आठ समूहका शीर्ष टिमसहित १२ देशले जनवरी–फेब्रुअरी २०२२ मा भारतमा हुने एसियन कपमा प्रतिस्पर्धा गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
