काठमाडाैं- नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले विश्वकप २०२२ र एसिया २०२३ को छनोट अन्तर्गत जोर्डनविरुद्ध जितकाे लक्ष्यका साथ मैदान उत्रिने बताएका छन्।
आइतबार भएको प्रिम्याच कन्फ्रेन्समा जोर्डन बलियो भएपनि आफ्नाे टाेलीले पनि सक्दाे मेहनत गरिरहेकाे बताउँदै प्रशिक्षक अलमुताइरीले नेपाली टोलीलाई कममा आँक्न नमिल्ने बताए।
‘कतिपय संचारमाध्यममा जोर्डन निकै बलियो छ भनेर भनिरहेका छन्। हाम्राे कुनै सम्भावना नरहेको भन्ने सुनेकाे छु। तर, फुटबलमा त्यसो हुँदैन। दुवै टोलीका लागि खेल गोलरहित बराबरीमा सुरु हुने हो। मैदानमा गरेको प्रदर्शन अनुसार नै नतिजा आउँछ। हामीले उक्त खेलका लागि आफ्नो तर्फबाट मेहनत गरिरहेका छौं,’ उनले भने।
उनले पुन: युरोपमा भएको खेलबाट समेत प्रभावित भएको बताउँदै नर्थ मेसेडोनियाले जर्मनी २-० ले पराजित गरेको उदाहरण समेत दिए।
‘हामीले उत्तर म्यासेडोनियाले जर्मनीलाई पराजित गरेको देखेका छौं। जोर्डन बलियो टोली हो। हामी खेलको हरेक मिनेट राम्रो प्रदर्शन गर्न लागिरहेका छौं। सुरुवातदेखि नै हाम्रो लक्ष्य जित हासिल गर्नु नै हुनेछ। त्यसका लागि हरेक मिनेट राम्रो प्रदर्शन गर्नेछाैं,’ उनले भने।
समूह ‘बी’मा रहेको नेपालको अब दुई खेल खेल्न बाँकी छ। ६ खेलमा २ जित र ४ हारसहित ६ अंक रहेको छ। जितविहिन चाइनिज ताइपेइको ६ खेलमा कुनै अंक छैन। अष्ट्रेलियाले ४ खेलमा १२ अंक जोड्दा जोर्डन र कुवेतको ५/५ खेलमा समान १०/१० अंक रहेको छ। अब नेपालको अर्को प्रतिस्पर्धी हो जोर्डन र अस्ट्रेलिया।
नेपालले सातौं खेलमा सोमबार जोर्डनसँग खेल्दैछ। यसअघि नेपालले चाइनिज ताइपेईलाई २–० गोलले पराजित गरेको थियो। नेपाल र जोर्डनबीचको खेलको नतिजाले घरेलु टोली कुवेतको एसिया कप खेल्ने सम्भावना पनि जोडिएको छ।
‘कुवेतको एसिया कप खेल्ने सम्भावना पनि हामीसँग जाेडिएकाे छ। कुवेतले जोर्डनलाई पराजित गर्नुपर्ने छ। हाम्राे लक्ष्य पनि एसियन कपमा छनोट हुने हो। म कुवेतकै भएकोले जोर्डनविरुद्धको खेल पनि महत्वपूर्ण हुनेछ। भाेलिकाे खेलमा सबै खुशी हुनेछन्। त्यसका लागि यो खेलमा जित आवश्यक छ,’ उनले भने।
यदि नेपालले जोर्डनलाई पराजित गरे यसको फाइदा कुवेतलाई पनि हुनेछ। अष्ट्रेलिया शीर्ष स्थानमा छ र एसिया कप छनोट नजिक पुगिसकेको छ। त्यसैले कुवेत र जोर्डन समूहमा दोस्रो भएर एसिया कप छनोट हुने छ।
यसअघि चाइनिज ताइपेइविरुद्ध गरेको अध्ययनले जित सम्भव भए अलमुताइरीकाे भनाइ छ।
‘खेलाडीको मानसिकता बदलिएको छ। खेलाडीहरु उच्च मनोबलका साथ खेलिरहेका छन्। हामीले नतिजाका लागि भन्दापनि उच्च प्रदर्शन गर्ने लक्ष्य लिएर खेल्ने हो। चाइनिज ताइपेइको खेलअघि जस्तो तयारी गरिरहेका थियौं, त्यस्तै तयारी गरिरहेका छौं। जोर्डनविरुद्ध पनि आफ्नो स्थानबाट सक्दो तयारी गरिरहेका छाैं,’ उनले भने।
नेपालले सोमबार जोर्डनको सामना गर्दैछ। खेल नेपाली समयअनुसार रातको ९:४५ बजे सुरु हुनेछ। भोली नै अष्ट्रेलिया र चाइनिज ताइपेइ भिड्दैछन्।
एसिया कप समिकरण
नेपालको लक्ष्य एसियन कप खेल्नु हो। एसियन छनोटको प्लेअफ खेल्न तेस्रो चरणमा सिधै प्रतिस्पर्धा गर्न नेपाल चौथो स्थानमा रहिरहनु पर्नेछ।
एसियन कपमा कुल २४ टिमले भाग लिनेछन्। जारी एसियातर्फको विश्वकप छनोटको समूह विजेता भएका आठ टिम र उत्कृष्ट उपविजेता चुनिएका चार टिम स्वतः योग्य हुनेछन्।
एसियन कप छनोटको तेस्रो चरणमा सहभागी हुने कुल २४ टिमलाई आठ समूहमा विभाजित गरिनेछ। र, समूह विजेता र उपविजेता गरी कुल १२ चीनमा हुने एसियन कपका लागि छानिने छन्। जसले एसियातर्फको विश्वकप छनोटको समूह विजेता भएका आठ टिम र उत्कृट उपविजेता चुनिएका चार टिमसँग प्रतिस्पर्धा गर्नेछन्।
विश्वकप छनोट चरणमा उपविजेता भएका अन्य चार टिम र समूह चरणमा तेस्रो भएका आठ टिमले भने छनोटको तेस्रो चरण खेल्नेछन्। त्यस्तै, विश्वकप छनोट चरणमा आआफ्ना समूहमा चौथो भएका उत्कृष्ट चार टिमले पनि छनोटको तेस्रो चरण खेल्ने मौका पाउनेछन्। छनोटको तेस्रो चरण खेल्न पाउने टिमको संख्या १६ हुनेछ।
यी १६ टिमसँग अन्य आठ टिमले तेस्रो चरणमा प्रतिस्पर्धा गर्नेछन्। ती आठ टिम प्लेअफबाट आउनेछन्। विश्वकप छनोट चरणमा आआफ्ना समूहमा चौथो हुने चार टिम र पाँचौँ हुने आठ टिमले प्लेअफमा भाग लिनेछन्।
नेपालको हकमा भने प्लेअफ नखेली सिधै एसियन छनोटको तेस्रो चरणमा स्थान बनाउने अवसर छ। तर, त्यो त्यति सहज भने छैन। नेपालले अब बाँकी रहेको दुई खेलमध्ये कम्तिमा एक खेल जित्नैपर्ने छ। उक्त खेल जितेपछि अन्य समूहको नतिजाले पनि नेपालको भविष्य निर्धारण गर्छ।
समूह ‘एच’मा रहेको उत्तर कोरियाले छनोटबाट नाम फिर्ता लिएपछि उक्त स्थान निर्धारण गर्दा समूहको अन्तिममा रहेको टोलीसँगको नतिजा गणना नहुने एएफसीले जनाएको छ।
हाल चौथो स्थानमा रहने टोलीहरुको तालिकामा नेपाल पुछारमा छ र कम्तिमा जोर्डन र अष्ट्रेलियामध्य एक टोलीलाई पराजित गर्नैपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773837959.png)
