काठमाडाैं- सन् २०२२ फिफा विश्वकप र २०२३ एसिया कपको दोस्रो चरणको छनोट अन्तर्गतको खेल खेल्न नेपाली फुटबल टोली यतिबेला कुवेतमा छ।
इराकविरुद्ध मैत्रीपूर्ण खेल खेलेको नेपाली टोलीले कुवेतमा बिहीवार सम्पन्न खेलमा चाइनिज ताइपेइविरुद्ध दोहोरो जित निकाल्यो। यी दुवै खेलमा गोल गर्ने एक मात्रै नेपाली खेलाडी थिए फरवार्ड अन्जन विष्ट।
अघिल्लो खेलमा इराकविरुद्ध बराबरी गोल फर्काएका अन्जनले ताइपेइविरुद्ध नेपाललाई सुरुवाती अग्रता दिलाएका थिए। उनले चौथो मिनेटमा नै पेनाल्टीमार्फत गोल गर्दै नेपाललाई बलियो स्थितिमा पुर्याएका थिए।
अन्जनले ताइपेइविरुद्ध जितपछि बोल्दै उनले आफ्नो टोली जित्ने लक्ष्यको साथ मैदान उत्रिएको प्रतिकृया दिए।
‘गोलभन्दा पनि मुख्य लक्ष्य जित्नु थियो। हामी जित्छौं भनेर मैदानमा पसेपछि जित्नकै लागि खेल्छौं,’ उनले भने, ‘जित्ने मनस्थिति भएपछि गोल त जसरी नि निस्किहाल्छ। जित्नु छ भने गोल हान्नुपर्छ। हिजो मैले हाने। अरु दिन अरुले हान्छ।’
उनले प्रशिक्षक अब्दुल्लाह अलमुताइरीको रणनीति पनि सफल भएको बताए।
‘कोचले सिकाउनुभएको अनुसार नै हामीले मैदानमा खेल्ने हो। त्यसको लागि हाम्रो कोचले जे भन्नु भएको थियो हामीले त्यही गर्यौं। कोचले बनाएको रणनीति अनुसार हिजोको खेलमा पनि विपक्षीलाई दबाबमा राख्न सक्यौं। नयाँ रणनीति भएकाले पनि विगतभन्दा फरक रुपमा प्रस्तुत भएका छौं। हामी सफल भयौं,’ उनले भने।
उनले विगतको तुलनमा नेपाली टोलीको खेल्नै शैलीमा परिवर्तन आएको पनि बताए।
‘विगतको तुलनमा नयाँ प्रशिक्षकको आगमनसँगै टोलीमा परिवर्तन आएको छ। पहिला भन्दा अहिले खेल्ने शैली फेरिएको छ। जुन हामीलाई कोचले ट्रेनिङमा सिकाउनु भएको हामीले खेल्ने स्ट्राटेजी, हामीले खेल्ने प्याट्रन, स्टाइल सबै फरक छ। अपोनेन्टहरुलाई डोमिनेन्ट गरिरहेका छौं। त्यो फरक छ,’ उनले भने।
यद्यपि, ताइपेइको तुलनामा आगामी दुई खेल केही कठिन हुने उनको आकलन रहेको छ।
समूह ‘बी’मा रहेको नेपालको अब दुई खेल खेल्न बाँकी छ। ६ खेलमा २ जित र ४ हारसहित ६ अंक रहेको छ। जितविहिन चाइनिज ताइपेइको ६ खेलमा कुनै अंक छैन। अष्ट्रेलियाले ४ खेलमा १२ अंक जोड्दा जोर्डन र कुवेतको ५/५ खेलमा समान १०/१० अंक रहेको छ। अब नेपालको अर्को प्रतिस्पर्धी हो जोर्डन र अस्ट्रेलिया।
‘ताइपेइको तुलनामा आगामी दुई खेल केही कठिन हुनेछ। जोर्डन र अष्ट्रेलिया हामीभन्दा राम्रो छ। हामी स्टेप बाइ स्टेप तयारी गरिरहेका छौँ। अन्त्यसम्म संघर्ष जारी राख्छौं,’ उनले भने।
उनले आगामी खेलहरु प्रेसरमा नलिएको समेत बताए। ‘मलाई त्यस्तो प्रेसर लाग्दैन। किनभने गेममा छिरिसकेपछि मेरो पोजिसन नै त्यही छ गोल हान्नकै लागि खेल्ने हो। ताइपेइसँगको खेलमा पनि प्रेसर थिएन। गोल निस्कियो। टीमले जित्नका लागि खेल्ने हो,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770478002.png)
-1764146706.png)
