तस्वीर : नेपाल सुपर लिग
काठमाडाैं- नेपाल सुपर लिगको पहिलो संस्करणको उपाधिका लागि शनिबार धनगढी फुटबल क्लब र काठमाडौं रेजर्स फुटबल क्लबबीच प्रतिस्पर्धा हुँदैछ। काठमाडौं र धनगढीबीचको खेल त्रिपुरेश्वरस्थित दशरथ रंगशालामा साँझ ५:३० बजे सुरु हुनेछ।
प्रतियोगिताको फाइनल अघि दुवै प्रशिक्षक र टिमका कप्तानले उपाधि जित्ने योजनासहित मैदान उत्रने बताए। धनगढीका प्रशिक्षक ताेपे फुजा विपक्षीलाई कमजोर नठानी आफ्नो गेम खेल्दै च्याम्पियन बन्ने बताए।
'हामीले काठमाडौंलाई लिग र प्ले अफमा गरी दुईपटक हराइसकेका छौं। तर, फाइनललाई लिएर सचेत छौं। विपक्षीलाई कमजोर नठानी आफ्नो गेम खेल्दै च्याम्पियन बन्नेछौं,' उनले भने।
यी टोली एकै प्रतियोगितामा तेस्रो पटक भिड्न लागेका हुन्। यसअघि लिग चरण काठमाडाैं ३-० ले पराजित भएकाे थियाे भने पहिलो प्लेअफमा पुन: २-१ ले पराजित भएकाे थियाे। त्यसैले फाइलनमा घरेलु मैदानमा काठमाडौंलाई धनगढीविरुद्ध दुई हारको बदला लिने अवसर रहेको छ।
नेपालकै सहिद स्मारक ए डिभिजन लिग खेलेको अनुभव बटुलिसकेका ओलावाले ओलाडिपो अफिज धनगढीका मुख्य हतियार हुन्। उनले जारी लिगमा ४ गाेल गरीसकेका छन्। यद्यपि, उनी पूर्णरुपले ठिक छैन।
काठमाडाैंविरुद्धकाे खेलमा उनी १०५औं मिनेटमा मैदान बाहिरिएका थिए। यद्यपि, उनी रिकभर हुने क्रममा रहेकाे प्रशिक्षक फुजाले संकेत दिए।
'केही खेलाडी घाइते भएपनि रिकभरीमा छन्। आशा छ उनीहरु फर्कनेछन्,' उनले भने।
यता, धनगढीका कप्तान किरण चेम्जोङले लिगमा फाइनलमा काठमाडौं बढी प्रतिस्पर्धा हुने बताए। 'काठमाडौं राम्रो टोली हो। भोलिको खेल पनि रोमाञ्चक र प्रतिस्पर्धात्मक हुनेछ,' उनले भने। धनगढी लिग चरणकाे पहिलाे खेलमा विराटनगर सिटीसँग ३-० ले पराजित भएको थियाे। त्यसपछि दोस्रो खेलमा काठमाडौं रेजर्सलाई ३-० ले हरायो।
त्यस्तै तेस्रो खेलमा ललितपुर सिटीसँग १-१ को बराबरी, चौथो खेलमा एफसी चितवनमाथि ३-० को जित, पाँचौं खेलमा पोखरा थण्डर्समाथि १-० को जित निकालेको धनगढीले अन्तिम खेलमा बुटवल लुम्बिनी एफसीसँग १-० को हार ब्यहोरे पनि प्लेअफमा पुग्यो।
प्लेअफमा पुन: धनगढीले काठमाडाैंलाई २-१ ले पराजित गरेकाे थियाे।
यता, ललितपुर एफसीलाई ३-० ले हराउँदै उपाधि नजिक पुगेकाे काठमाडौंले यसपाली ट्रफी पर बाहिर जान नदिने बताएकाे छ। काठमाडाैंका प्रशिक्षक बालगोपाल महर्जनले बिगतकाे हारबाट आफूहरुले पाठ सिकेकाे भन्दै यसलाई पुन: नदाेहर्याउने प्रतिवद्धता व्यक्त गरे।
'लिग र प्ले अफमा हामी पराजित भयौं। त्यसको कमी कमजोरीलाई मध्यनजर गर्दै खेल्नेछौं। फेरि धनगढीसँग खेल्ने अवसर आएको छ। हार्ने मानसिकताले खेल्ने छैनौं। यो अवसरलाई गुमाउने छैनौ। आशा छ यो ट्रफी भ्यालीमै राख्नेछौं,' उनले भने।
यता, कप्तान विकेश कुथुले फाइनलमा धनगढीलाई कडा टक्कर दिने बताए। 'धनगढीसँगको दुई हारले पाठ सिकेको सुधार्दै खेल्नेछौं। उपाधि जित्ने हिसाबले नै खेल्नेछौं। आशा छ नतिजा सकरात्मक नै हुनेछ,' उनले भने।
काठमाडौंले उद्घाटन खेलमै ललितपुर सिटीलाई १-० ले पराजित गर्दै उपाधिको दाबेदारी प्रस्तुत गरिसकेको थियो। यद्यपि, काठमाडौंले दोस्रो खेलमा भने धनगढीसँग ३-० को फराकिलो हार ब्यहोर्यो।
उसको ब्याडलक यतिमै रोकिएन। तेस्रो खेलमा पोखरा थण्डर्ससँग गोलरहित बराबरीमा रोकियो काठमाडौं।
काठमाडौंले चौथो खेलमा बुटवल लुम्बिनी एफसीमाथि १-० को जित निकाल्यो भने अर्को खेलमा विराटनगर सिटीमाथि ५-४ सनसनीपूर्ण जित निकाल्दै फाइनलको यात्रा तय गरेको थियो। त्यस्तै लिग चरणको अन्तिम खेलमा एफसी चितवनलाई २-१ गोलअन्तरले हराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
