कोरोनाको मारमा फिल्म : निषेधाज्ञापछि रोकिए छायांकन, राजधानीबाहिर भने जारी

कोरोना अपडेट

पुष्पा थपलिया आइतबार, वैशाख १९, २०७८ ०७:०२

फिल्म ‘आँधी तुफान-२’ काे छयांकन टोली।

काठमाडौं- कोरोना भाइरस संक्रमण (कोभिड-१९) महामारीका कारण धराशायी बनिरहेको नेपाली फिल्म क्षेत्र कोभिडको दोस्रो लहरबाट झन् मर्कामा पर्ने देखिएको छ। संक्रमण बढेसँगै काठमाडौं उपत्यकासहित विभिन्‍न जिल्लामा निषेधाज्ञा जारी छ।

निषेधाज्ञा सुरू भएसँगै छायांकनमा गएका फिल्महरू पनि प्रभावित बनेका छन्। लकडाउन खुला गरिएको समयमा चलचित्र क्षेत्रलाई चलायमान गराउने भन्दै करिब एक दर्जन नयाँ फिल्मको निर्माण घोषणा गरिको थियो। जसमध्ये केही घोषणामै सीमित भए पनि आधा दर्जन फिल्मले शुभ मुहूर्तसमेत गरिसकेका थिए।

छायांकनमा जाने मिति घोषणा गरेका फिल्महरूमा ‘तिमीसँगै हुने मन छ’, ‘आँधी तुफान-२’, ‘बाबरी’, ‘प्रेमगञ्‍ज’, ‘गोर्खा वारियर-२’, ‘अभियान’, ‘अनन्त’, ‘जार’, ‘क्रस रोड्स- कथा तिम्रो र मेरो’ लगायत छन्।

रोकिए छायांकन
कोरोना संक्रमणको जोखिम बढेका कारण निर्देशक दिवाकर भट्टराईले चलचित्र ‘तिमीसँगै हुने मन छ’ को छायांकन स्थगित गरे। उनले वैशाख ५ गतेबाट फिल्म छायांकनमा जाने बताएका थिए।

भारतीय कलाकार मात्रै हैन, प्राविधिकसमेत उतैबाट ल्याएका भट्टराईले फिल्म छायांकन नगरी सबैलाई फिर्ता पठाए। भारतबाट १२ जनाको टोलीलाई झन्डै एक महिना भट्टराईले खर्च गर्नुपरेको थियो।

‘फिल्मको छायांकन पोखरामा गर्ने तयारी थियो तर, गण्डकी प्रदेशमा कोरोनाको जोखिम उच्च देखिएकाले कलाकार रोहित सुचान्तीसहित सम्पूर्ण प्राविधिक टिमलाई भारत फिर्ता पठाउनुपर्‍यो,’ उनले भने।

उताबाट आएको टोली नेपालमा २० दिन बस्यो। जेठदेखि फेरि छायांकनमा जाने भनेर रोकिएको फिल्मको भविष्य अहिलेको अवस्थाले अन्योलमा पुर्‍याएको भट्टराइले बताए।

त्यस्तै, एक हप्ता पहिलेदेखि छायांकनमा गएको फिल्म ‘आँधी तुफान-२’ ले पनि छायांकन रोकेको छ। सरकारको निषेधाज्ञाको पालना गर्दै छयांकन रोकिएको फिल्मकी निर्मात्री तथा लेखक मौनता श्रेष्ठले जानकारी दिइन्।

फिल्म 'कबड्डी ४' को छयांकन टोली।

फिल्मको छायांकन १५ गतेदेखि रोकेको श्रेष्ठले बताइन्। निर्माण टोलीले फिल्मको २५ प्रतिशत छायांकन भने सकिसकेको छ। अब निषेधाज्ञा खुल्नेबित्तिकै छायांकनमा जाने श्रेष्ठको भनाइ छ।

दशक अगाडिको हिट फिल्म ‘आँधी तुफान’को सिक्वेलको रूपमा यो फिल्म बन्‍न लागेको थियो। यसमा पनि बलिउडको ‘साहो’ फिल्ममा खलनायकको भूमिका निभाएका कनिज कोइरालाको अभिनय रहेको छ।

यसैगरी छायांकन रोकिएको फिल्मको सूचीमा अटाएको छ, घिन्ताङ। आठ वर्षसम्म नेपाली फिल्म क्षेत्रबाट बिलाएका दीपक श्रेष्ठले बल्ल फिल्म बनाउन आँटेका थिए। दूर्भाग्य, लामो समय नायिकाको खोजीमै बिताएका श्रेष्ठलाई अहिले फेरि कोरोनाले धोका दियो।

सुरूमा एलिजा गौतमलाई नायिका लिएका श्रेष्ठको घिन्ताङमा एलिजाले हस्ताक्षर गरेर पनि काम गरिनन्। व्यक्तिगत कारण देखाउँदै उनी बाहिरिइन्। त्यसपछि श्रेष्ठले लक्ष्मी बर्देवालाई नायिका भित्र्याए, तर उनी पनि धेरै दिन टिकिनन्। छायांकनमा जाने समयमा अर्को फिल्मको प्रस्ताव स्वीकार गर्दै बर्देवाले घिन्ताङ छाडिन्।

त्यसपछि केकी अधिकारीले फिल्ममा हस्ताक्षर गरेकी थिइन्। छायांकनमा जाने समयमा उनको रिपोर्टमा कोरोना ‘पोजिटिभ’ देखायो र छायांकन स्थगित भयो। फिल्म निर्माण टोली छायांकनस्थल काभ्रेको पनौती पुगेर फर्केको थियो।

यस्तै, असोज १५ मा प्रदर्शन हुने मिति तोकिसकेको फिल्म 'कबड्डी ४' को अवस्था पनि अन्योलमा छ। वैशाख १५ गतेबाट छायांकनमा जाने भन्दै फिल्मको शुभमुहूर्त गरिएको थियो। निषेधाज्ञासँगै यो फिल्मको छायांकन पनि रोकिएको छ।

राजधानीबाहिर पुगेका फिल्मको छायांकन जारी
केही फिल्मलाई भने कोभिड-१९ ले छुन सकेको छैन। ती फिल्मको अहिले पनि छायांकन चलिरहेको छ। विशेषतः छायांकनको सिलसिलामा उपत्यकाबाहिर पुगेका फिल्म युनिटले कामलाई निरन्तरता दिएका हुन्।

वैशाख ६ गतेदेखि छायांकनमा गएको फिल्म ‘बाबरी’ ले काम जारी राखेको छ। झापाको बुधबारेमा फिल्म छायांकनको काम भइरहेको यसका निर्देशक सुरेन्द्र पौडेलले जानकारी दिएका छन्।

विभिन्‍न ठाउँको छायांकन सक्काउँदै यो टोली झापाको बुधबारे पुगेको र त्यता कोभिडको जोखिम नभएकाले छायांकन जारी राखिएको पौडेलले बताए।

यस्तै फिल्म ‘प्रेमगञ्‍ज’ ले पनि छयांकनको काम जारी राखेको छ। छायांकनको सिलसिलमा काभ्रे जिल्ला पुगेको फिल्म ‘प्रेमगञ्‍ज’ ले निषेधाज्ञाको समयमा पनि काम रोकेको छैन।

निर्माण टोलीले काभ्रेमा मात्रै अझै एक साता काम गर्ने जनाएको छ। काभ्रेको काम सकिएपछि भने काठमाडौंमा छायांकनका लागि समय तालिका मिलाइएको थियो। काठमाडौंको समय तालिका भने प्रभावित भएको फिल्मका निर्देशक परिच्छेद सेनले जानकारी दिएका छन्।

काभ्रेमा भएको छायांकनमा पनि सुरक्षाका सबै सावधानी अपनाएरै काम भइरहेको निर्माण टोलीले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।