काठमाडौं- किराँत समुदायमा दशैँको टीकाबारे धेरै विवाद भयो। धार्मिक ग्रन्थ मुन्धुममा दशैंबारे कतै उल्लेख नभएकाले टीका लगाउन नहुने कतिपयको तर्क थियो। कतिपय नेपालीको संस्कृति भएकाले टीका लगाउनुपर्ने पक्षमा थिए।
त्यस क्रममा किराँत समुदायका केहीले दशैं बहिष्कार गर्ने अभियान नै चलाए। विवाद उत्कर्षमा पुगेपछि किराँत याक्थुङ चुम्लुङबाट निर्णय भयो– 'टीका ग्रहण गर्ने वा नगर्ने व्यक्तिगत स्वतन्त्रताको विषय हो।'
किराँत समुदायले दशैंको टीका बहिष्कार गर्ने अभियान चलाए पनि पूर्व सभामुख तथा नेकपा एमालेका नेता सुवास नेम्वाङले दशैंमा टीका लगाउन कहिल्यै छाडेका छैनन्। हरेक दशैंमा उनी अनामनगरस्थित फुपूको घरमा टीका लगाउन जान्छन्।
२०५८ सालमा फूपूको घरबाट टीका लगाएर नेम्वाङ बाहिर निस्किएका थिए, गेटमा टुप्लुक्क आइपुगे गोरेबहादुर खपांगी।
दशैं बहिष्कारको अभियान चलाउने अग्रपंक्तिमा थिए खपांगी। नेम्वाङको निधारमा टीका देखेपछि खपाङ्गी कड्किए, ' के हो किराँत समुदायले टीका बहिष्कार गरेको बेला तपाईंको निधारमा टीका?' खपाङ्गीको आक्रोशपूर्ण प्रश्न हरेक दशैँमा नेम्वाङको कानमा गुजन्छ।
२०५९ सालको दशैँ नेम्वाङको अविष्मरणीय दशैँ हो। त्यो साल पनि नेम्वाङ फूपूको घरमा टीका लगाउन गएका थिए। टीका लगाएर सपरिवार टेलिभिजन हेर्दै गर्दा गोरेबहादुर खपाङ्गीले राजाको हातबाट टीका लगाइरहेको दृश्य देखे। दशैं बहिष्कारका अभिन्यताले राजाको हातको टीका लगाएको दृश्य देख्नुपरेपछि नेम्वाङ जिल खाए। फूपूको घरमा खानपिन गरेर के बाहिर निस्किएका थिए संयोगवश गेटमा निधारमा रातो टीका लगाएका खपाङ्गीसँग उनको जम्काभेट भयो।
एक वर्षअघि हप्की खाएका नेम्वाङले मुस्कुराउँदै खपाङ्गीलाई यसपटक साहसपूर्ण रुपमा टीका लगाएको बताए। 'तपाईंले टीका लगाएको देखेर मलाई पनि साहस आयो, साहसपूर्ण ढंगले मैले टीका लगाएँ,' उनले खपाङ्गीलाई भने।
२०५८ सालमा नेम्वाङले टीका लगाएको भन्दै आक्रोश पोखेका खपाङ्गी २०५९ सालको दशैँमा नेम्वाङको कुरा सुनेर मुस्कुराउँदै हिँडे। 'टीका बहिष्कार गरेको बेला मैले टीका लगाउँदा उनी मुरमुरिएको र राजाको टीका ग्रहण गरेर आएपछि मेरो निधारमा टीका देखेर मुस्कुराएको उनको अनुहार झल्लझली सम्झन्छु,' नेम्वाङ भन्छन्।
नेम्वाङको यसपटकको दशैँमा बढी व्यस्तता छ। उनलाई इलाम पनि पुग्नुपर्नेछ। परिवारसँग काठमाडौँमा पनि रमाइलो गर्नुपर्नेछ। प्रदेश र प्रतिनिधिसभाको निर्वाचन समेत नजिक भएकाले दशैँभन्दा बढी चुनावी चटारोमा व्यस्त हुने उनी बताउँछन्। सबै मतदाता दशैँ मनाउन घर आउने भएकाले त्यसको सदुपयोग गर्ने नेम्वाङ बताउँछन्।
'यसपटकको दशैँ अलि भिन्न होला जस्तो छ। सबै मतदाता दशैँ मनाउन घर आउँछन त्यही समयको सदुपयोग गर्ने सोचमा छु,' उनले भने।
नेम्वाङ फुटबलमा औधी रुची राख्छन्। दशैँताका फुटबल म्याच पनि हेर्ने उनी बताउँछन्। विश्वकप छनोटमा उनलाई औधी मनपर्ने अर्जेन्टिना शीर्ष चारमा पर्न सकेको छैन। अर्जेन्टिना शीर्ष चारमा प्रवेश नगर्दा उनलाई चिन्ता लागिरहेको छ। उनी चाहान्छन अर्जेन्टिना विश्वकप छनोटमा शीर्ष चारभित्र प्रवेश गरोस्। नेम्वाङ् त्यो म्याचको प्रतीक्षामा छन्।
'म अर्जेन्टिनाको म्याचको प्रतीक्षामा छु कहिले शीर्षमा पुग्ला, त्यो म्याच कहिले आउला जस्तो भइरहेको छ,' उनले भने।
मतदातासँग मत माग्ने, परिवारसँग रमाइलो गर्ने र फुटबल म्याच हेर्ने नेम्वाङको दशैँ योजना छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
