काठमाडौं- च्यातिएको अवस्थामा कपडा। शरीरका विभिन्न ठाउँमा चोट र निलडाम। सँगै स्कुले ब्याग। भुईँ र शरीरका विभिन्न ठाउँमा रगतका टाटा। बैतडीको लवलेक जंगलस्थित खोचलेक–गिरेगडा सडकबाट करिब ३० मिटर तलको झाडीमा गत बिहीबार दिउँसो एक किशोरीको शव स्कुले विद्यार्थीले देखे।
‘विभित्स शव देखेपछि विद्यार्थी आत्तिएछन्। स्थानीयलाई खबर भयो। हामीले प्रहरीलाई खबर गर्यौं’ दोगडाकेदार गाउँपालिका अध्यक्ष चक्रबहादुर कार्कीले नेपाल लाइभलाई सुनाए, ‘मृत फेला परेकी किशोरी अघिल्लो दिन हराएकी भागरथी भन्ने थाहा भयो।’
दोगडाकेदार गाउँपालिका–७ चडेपानीकी १७ वर्षीया किशोरी भागरथी भट्ट सधैझैं गत बुधबार पनि विद्यालय गइन्। उनी दोगडाकेदार–३ स्थित् सनातन धर्म मावि खोचलेकमा कक्षा १२ मा अध्ययनरत थिइन्। उनको घरबाट विद्यालय पुग्न करिब १ घण्टाको पैदल दूरी हिँड्नुपर्छ। त्यसमा करिब २० मिनेट जंगलको बाटो हिँड्नुपर्छ।
बुधबार २ बजे स्कुल सकिएपछि उनी घर फर्किइन्। ‘केही वर आएपछि कपाल काट्न भनेर उनका केटा साथी सैलुन छिरेछन्। त्यसपछि उनी एक्लै घरतर्फ लागिछिन्। तर, उनी घर पुगिनन्। भोलिपल्ट शव भेटियो’ अध्यक्ष कार्कीले भने।
बुधबार साँझसम्म भागरथी घर नफर्किपछि उनको खोजी सुरु भएको थियो। मोबाइलमा सम्पर्क पनि हुन नसकेको र मान्छे पनि नभेटिएपछि परिवार र स्थानीयले नजिकैको खोचलेक प्रहरी चौकीमा खबर गरेका थिए। बधुबार रातरभमा पनि उनको अवस्थाबारे केही थाहा भएन। बिहीबार दिउँसो लवलेक जंगलमा उनको शव विद्यार्थीले देखेपछि प्रहरीलाई खबर गरिएको थियो।
स्थानीय प्रहरीले घटनास्थल कर्डन गरेर सुरक्षित गर्यो। त्यसपछि जिल्लाका डिएसपी, सिडिओ, सरकारी वकिल, डाक्टरसहितको टोली घटनास्थल पुगेर अनुसन्धान सुरु गरिएको सुदूरपश्चिम प्रहरी प्रहरी कार्यालयका प्रवक्ता तथा एसएसपी मुकेश सिंहले बताए।
मोबाइल बन्न सक्छ क्लु
किशोरीको शव भेटिएकै ठाउँबाट प्रहरीले उनको मोबाइल समेत फेला पारेको छ। उनको मोबाइल हत्यारासम्म पुग्ने महत्वपूर्ण क्लु हुनसक्ने प्रहरीले विश्वास लिएको छ। मोबाइलमा हुनसक्ने विभिन्न पाटाहरू केलाउन केन्द्रीय अनुन्धान ब्यूरो (सिआइबी)का डिएसपीको नेतृत्वमा एक टोली समेत बैतडी पुगिसकेको छ। उक्त टोलीले प्राविधिक पाटोबारे स्थानीय प्रहरीलाई सहयोग गर्नेछ।
मोबाइलमा हुनसक्ने विभिन्न भिडियो, फोटो, भागरथीको मोबाइलबाट डायल भएका कलहरूको विवरण, उनको मोबाइलमा रिसिभ भएका कलहरूको विवरण समेत केलाएर अनुसन्धान गर्दा नयाँ क्लु फेला पर्न सक्ने प्रहरीले आकलन गरेको छ।
मोबाइलमा भएका प्रमाणहरू डिलेट पनि भएको हुनसक्ने भएकाले मोबाइल फरेन्सिक जाँचका लागि काठामाडौं समेत पठाइने प्रवक्ता सिंहले बताए। ‘केही सबुद प्रमाणहरू फेला परेका छन्। ती सबुदहरूबाट अभियुक्तसम्म पुग्न सकिने हामीले विश्वास लिएका छौं। यी सबुदलाई थप जाँचका लागि काठमाडौं पठाउने तयारी भइरहेको छ’ एसएसपी सिंहले भने।
आशंका बलात्कारपछि हत्याको, पुष्टि हुन बाँकी
शरीका विभिन्न भागमा घाउ चोट लाग्नु, कपडा च्यातिनु, शरीरका भित्रि अंगमा समेत रगत देखिनुजस्ता कारणले भागरथीको बलात्कारपछि हत्या भएको आशंका गरिएको छ। यद्यपि, पोष्टमार्टम रिपोर्ट नआइ केही पनि भन्न नमिल्ने बैतडीका डिएसपी नारायणप्रसाद अधिकारीले बताए।
‘शवको प्रकृति हेर्दा बलात्कार पछि हत्या जस्तो देखिए पनि पोष्मार्टम रिपोर्ट नआइ केही भन्न मिल्दैन’ डिएसपी अधिकारीले भने, ‘त्यसपछि अनुसन्धान कता मोडिने भन्ने प्रष्ट हुुन्छ।’ बलात्कार लुकाउन हत्या गरिएको हुनसक्ने स्थानीयको आशंका छ।
तालिमप्राप्त कुकुरपछि सिआइबी र प्रदेशको टोली बैतडीमा
घटना भएको जानकारी पाउनसाथ नेपाल प्रहरीका तालिमप्राप्त कुकुर लगेर अनुसन्धान सुरु गरिएको थियो। धनगढीबाट बिहीबारै तालिमप्राप्त कुकुर लगेर प्रहरीले अनुसन्धान सुरु गरेको थियो। त्यसपछि घटनाको अनुसन्धानका लागि प्रदेशका एसएसपीको नेतृत्वमा छुट्टै प्रहरी टोली बनाएर बैतडी पठाइएको छ। सुदूरपश्चिम प्रदेश प्रहरी कार्यालयमा कार्यरत एसएसपी जनकराज पाण्डेको नेतृत्वको टोली घटनास्थल पुगिसकेको प्रवक्ता सिंहले बताए।
देशैभरका जधन्य ठूला अपराधको अनुसन्धान गर्ने जिम्मा पाएको सिआइबीबाट पनि डिएसपीको नेतृत्वमा एक टोली घटनास्थल पुगिसकेको छ। प्रदेश अन्तर्गतकै विभिन्न युनिटमा रही इन्टेलिजेन्समा काम गरेका प्रहरी अधिकारीलाई पनि अनुसन्धानका विभिन्न पाटाहरूको अध्ययनका लागि खटाइएको छ।
भागरथीका हत्यारालाई कारबाही गर्न माग गर्दै शनिबार काठमाडौंमा नेकपाको प्रचण्ड–माधव पक्षीय विद्यार्थीले गरेको प्रदर्शन।
अपराधीलाई कानूनी दायरामा ल्याउन माग
भागरथी भट्टको हत्यामा संलग्नलाई कारबाहीको दायारमा ल्याउन भन्दै प्रदर्शन समेत भएको छ। शुक्रबार मात्रै बैतडी सदरमुकाममा विद्यार्थी, सर्वसाधारण, राजनीतिक दल र तिनका भ्रातृ संगठनहरूले प्रदर्शन गरेका थिए। सोक्रममा महाकाली राजमार्ग समेत ४ घण्टासम्म अवरुद्ध भएको थियो।
छिटो अनुसन्धान गरी हत्यारालाई सार्वजनिक गरिनुपर्ने उनीहरूको माग छ। त्यसैगरी शनिबार काठमाडौंस्थित् माइतीघरमा नेकपाको प्रचण्ड-माधव पक्षीय अनेरास्ववियूले समेत घटनाको विरोध गर्दै हत्यारालाई छिटो पक्राउ गरी सार्वजनिक गरिनुपर्ने माग राख्दै प्रर्दशन गरेको थियो। प्रचण्ड र माधवकुमार नेपालले घटनाको तत्काल अनुसन्धान गरी दोषीलाई कडा कारबाही गर्न माग गर्दै विज्ञप्ति पनि निकालेका छन्।
उता सोही गाउँपालिकाका अध्यक्ष कार्कीले समेत एक विज्ञप्ति जारी गरी विभित्स हत्या गर्नेलाई तुरुन्त पक्राउ गरी हदैसम्मको कारबाही गरिनुपर्ने माग राखेका छन्। हत्याको विरोधमा शुक्रबार उक्त गाउँपालिकाका सबै विद्यालहरूमा सार्वजनिक विदा समेत दिइएको थियो।
भागरथीकै भरमा थियो परिवार
मृत किशोरीको परिवारको आर्थिक अवस्था कमजोर छ। उनका बाबु कृष्णानन्दले आर्थिक अभावका कारण राम्रोसँग उपचार समेत नपाई दुई महिनाअघि मृत्युवरण गरेका थिए। ५२ वर्षीय कृष्णानन्दको करिब २ महिना अघि मधुमेहका कारण ज्यान गएको थियो।
बाबुको सहारामा जेनतेन चलेको भागरथीको परिवारमा त्यसपछि भने झन् दु:खका दिन सुरु भए। भागरथीकी आमा अहिले पनि पति शोकमै छिन्। त्यसपछि भागरथीकै भरमा परिवार चल्नुपर्ने अवस्था आयो। ‘छ न त उनका एक दाइ पनि छन्। उनी भारततिरै भएकाले घरको सबै जिम्मा भागरथीकै काँधमा आएको थियो’ गाउँपालिका अध्यक्ष कार्की भन्छन्, ‘खेतिपाती गरेर जसोतसो चलिरहेको परिवारमा अहिले फेरि अर्को शोक पर्यो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
